¹ Fi al sena nimra itniin ta Darius al melik, fi al sahar sita , fi awel yom ta al sahar, al kelima ta Yahuah ja be al ida ta Haggai al nebi le al hakim ta Yahuzah, Zerubbabel welet ta Shealtiel, wa le al rais kahana Joshua welet ta Jehozadak, kelim, ² ''Yahuah ta junud kelim zede: Nas delin kelim, 'De yau ma zaman le nina le ja au le abinu al bet ta Yahuah.''' ³ Biga al kilima ta Yahuah ja be ida ta Haggai al nebi, kelim, ⁴ ''Se yau zaman le nefsa takum le geni fi biut takum giafa, ze ma bet de bi geni karban? ⁵ Kida hasa Yahuah ta junud kelim zede: Iktebiru turuk takum! ⁶ Itakum kalas zarau buzur ketir, lakin jibu hasad besit; itakum akulu lakin ma bi saban; itakum asurubu lakin ma bi tala sekeran. Itakum libisu gumasat lakin ma bi sakinu nefsatakum, wa gurus mehiya al ligo bes bi kutu fi jeba al gidu! ⁷ Yahuah ta junud kelim zede: ''Iktebiru turuk takum! ⁸ Rua fok le al jebel, jibu kasabin , wa abinu bet tai; biga Ana bi geni mokosut be uwo, wa Ana biga bi mejidu!_Yahuah kelim.'' ⁹ Itakum fetisu le al ketir, lakin bekida! itakum kalas bi jibu besit le bet, lianu Ana afuku uwo bara! Le?'' Yahuah ta junud kariru. ''Ashan bet tai bi geni karban, zema kulu wahid min itakum biga sakal fogo bet tao. ¹⁰ Ashan be de al samawat wogifu al motor min itakum, wa al ard wogifu intaj tao. ¹¹ Ana kalas nadi jafaf fogo al ard wa fogo al jubal, fogo al dura wa fogo al mosurub jedid, fogo al zet wa fogo al hasat ta al ard, fogo rujal wa fogo haiwanat, wa fogo kulu al sokol ta idenat takun!'' ¹² Biga Zerbbabel welet ta Shealtiel, wa al rais kahan Joshua welet ta Jehozadak, kaman ma kulu al bagi ta nas, tii al sort ta Yahuah Allah tomon wa al kalamat ta Haggai al nebi, ashan Yahuah Allah tomon kan rasulu uwo wa nas kafu usa ta Yahuah. ¹³ Biga Haggai, al murasil ta Yahuah, wonusu risala ta Yahuah le al nas wa kelim, ''Ana ma itakum!_de Yahuah yau alinu!'' ¹⁴ Kida Yahuah hariku roho ta al hakin ta Yahuzah fok, Zerubbabel welet ta Shealtiel, wa al roh ta al rais kahana Joshua welet ta Jehozadak, wa al roh ta kulu al bagi ta al nas, kida gali umon rua wa istakal fogo al bet ta Yahuah ta junud, Allah tomon ¹⁵ fi al yom arba_isrin ta al sahar sita, fi al sena nimra itniin ta Darius al melik.