¹ Abram tala min Masir wa ruwa safa ta junub, uwu ma mara tuo, wa kulu hajat al indu. Lot bardu ruwa ma umon. ² Abram kan ganiyan fi mawashi, fi fidda, wa fi dahab. ³ Uwu istemir fi rihila tuo min junub le bait Il, le mahal al kan kaima tuo fugu gubal kida, bainu Bait Il wa Ai. ⁴ Uwu ruwa le mahal al uwu kan abinu fugu mazbah bediri. Heni uwu nadi be isim ta Yahweh. ⁵ Hasa Lot, al kan bi safir ma Abram, kaman indu ganamayat wa bagarat wa kiam tuo. ⁶ Wata ma agder shilu umon sawa, lanu mumtalakat tuomun kan ketir, umon biga ma agder geni sawa. ⁷ Wa kaman kanfi kurekure hasil bainu ruwa ta Abram wa ruwa ta Lot. Al kanaanieen wa al Frezeein kan fi beled dak fi wekit dak. ⁸ Abram kelim le Lot, ''Kede ma hasil mukasamat bainu itta wa ana, wa bainu ruwa taki wa ruwa tai; fi nihaya anina usura. ⁹ Hal wata de ma yau gidam taki? Ruwa wa ferigu nefsa taki moij ana. Kan itta ruwa safa shumal, Ana bi ruwa safa yemin, wa kaman kan itta ruwa yemin ana bi ruwa shumal.'' ¹⁰ Lo ayinu, kulu daira ta Ordun kan kulu fugu muya le safa ta Sugar, geni ze Jenna ta Aden, ze beled ta masir. De kan gubal Allah ma demiru Sodom wa Gomorrah. ¹¹ Yala Lot iktar le uwu safa ta Ordun wa safir le sherik, wa ahal gesimu badum. ¹² Abram geni fi Kanaan , wa Lot geni fi nus ta nas ta beled dak. Uwu dukgu kaima bait min kalis min Sodom. ¹³ Hasa nas ta Sodom kan ashrar kalis gidam ta Allah. ¹⁴ Allah kelim le Abram baat ma Lot ruwa min uwu, ''Ayinu min makan al itta bi wegif fugu le safa ta shamal, junub, sherik wa garib. ¹⁵ Wata de kulu al itta bi ayinu de, Ana bi wedi le itta wa le eyal taki lel abad. ¹⁶ Ana bi sibu eyal taki tala ketir ze turab ta wata, ashan kan insan bi ageder iddu turab ta wata, eyal taki bardu bi ageder iddu. ¹⁷ Gum, duoru safa tul wa urd ta wata de, ashan Ana bi ruwa wedi le itta.'' ¹⁸ Abram shilu. Kaima tuo wa ja geni fi Balutat Mamra al fi Habron, wa uwu abinu mazbah hinak le Yahweh