¹ Fi bedaya Allah kalagu al samawat wa al ard. ² Wa kan al ard bedun shekil wa fadi. Wa kan ala satha duluma ameeg au shedid. Al Roho ta Allah kan gi harik ala satha ta miya. ³ wa Allah kelimu, keli yekun Nur, wa kan fi nur. ⁴ Allah ainu al nur, wa kan nur de kwes. Huwo fasilu nur min duluma. ⁵ Allah nadi nur “nahar” wa al duluma huwo nadi “lel” de kan mesa wa sabah, al yom al awel. ⁶ Allah kelimu, keli yekun fi fasha beina al meya, wa keli fasha de gesimu al meya min al meya. ⁷ Allah sala al fasha. Wa gesimu al meya al kan fok al fasha. Wa kan de hasil. ⁸ Allah nadi fasha de “sama” de kan mesa wa sabbah, al yom al tani. ⁹ Allah kelimu, “keli al meya al tehet al sama lemu ma baad fi wahid mahal, wa keli mahalal abis beyenu, de kan hasil. ¹⁰ Allah nadi mahal al abis de “Ard”, Wa meya al lemu de huwo nadi “behar”huwo ainu inu de kan kwes. ¹¹ Allah kelimu, keli al ard bikun mahal ta nabatat: nabatat al gi weledu buzur wa samar ashjar al gi weledu samar al buzur tou fi al samar, kulu wahid hasab shekil tou, wa de hasil. ¹² Al ard weledu nabatat, nabatatgi weledu buzur ze shekil tomon, wa ashjar gi weledu samar al kan buzur tou se shekil tou. Allah kan ainu hajat de kwes. ¹³ De kan mesa wa sabbah, de yom al talit. ¹⁴ Allah kelimu,keli bi kun fi anwar fi al samah ashan bi fasil nahar min lel wa keli humon bi kun ze alamat, le muwasim, le ayam wa seniin. ¹⁵ Keli humon kun anwar fi sama ashan bi wala ala al ard. Wa kan de hasil. ¹⁶ Allah sala itnin anwar al aziim, al nur al akbar ashan bi hukumu nahar, wa al nur al askhar ashan bi hukumulel. Huwo Kaman sala nujum. ¹⁷ Allah kutuhumon fi sama ashan bi wala nur fi al ard. ¹⁸ ashan bi hukumule nahar wa bi lel, wa ashan bi fasilu al nur min al duluma. Allah ainu dekan kwes. ¹⁹ de kan mesa wa sabah, al yom al arba. ²⁰ Allah kelimu,kelial meyamala ma adad kebir ta kainat al haya, wa keli teyur teri fok al ard fi al fasha ta sama. ²¹ Allah kalagu mukhulugatta bahar al kebir, wa Kaman kulu al kainat al haya ze jensi tomon, mukhulugat al gi harik wa al gi mala al meya fi kulu mahal, wa kulu teyur al indu jenah ze jensi tomon. Alla ainu inu de kan kwes. ²² Allah bariku humon, gal, “keli inta kum kun ketir, wa mala takum al meya al fi bahar. Keli tuyur tala ketiir fi ard” ²³ De kan mesa wa sabbah al yom al kamsa. ²⁴ Allah kelim, keli ard tala kainatal haya, kulu wahid hasab jenis tomon, bahaim dababat wa wohosh ta al ard, kulu wahid hasab jenis tomon, wa kan de hasil. ²⁵ Allah sala whoosh ta ard ze jenis tomon, bahaim ze jenis tomon wa kulu dababat al gi dowuru fi wata ze jenis tomon, huwo kan ainu kwes. ²⁶ Allah kelim, keli nina salah insaan ze sura ta nina, ze shekil ta nina, keli umon kun musul le samaga ta bahar, le tuyur ta sama, le bahaim, le kulu al ard, le kulu dababat al gi dowuru fi ard. ²⁷ Rabuna kalagu insaan ze sura tou. Fi sura tou huwo kalagu Insaan. Zakar wa insa huwo kalagu humon. ²⁸ Allah bariku humon wa kelim le humon. “Keli intum weledu, wa keli intum bikun ketiir, mala takum ard, wa keli ard geni tehet musuliya takum.kun musul le samaga al ta bahar, le tuyur al ta sama, wa le kulu kainat al haya al gi harik ala ard. ²⁹ Allah kelim, “ainu, ana wodi le inta kulu al nabatat al gi weledu buzur al fi ard kulu, wa kulu shejera al samar tou indu buzur, humon bi kun akil le intum. ³⁰ Le kulu wohosh ta ard, le kulu tuyur ta samawat, wa le kulu ai dabatat al fi ard, wa le kulu kainat al indu nefes ta haya, ana wodi kulu nabatat al akdar le akil.” Wa kan de hasil. ³¹ Allah ainu kulu hajat al huwo sala, bel hagiga humon kan kwes shedid. De kan mesa wa sabah, al yom al sita.