¹ Huwo kelim le ana, ''Jena ta isaan, sunu inta ligo, akulu. Akulu ketab de, yala ruwa wonusu le bet ta Israel.'' ² Fa ana fata kasma tai, wa huwo akilu ana ketab dak. ³ Huwo kelim le ana, ''Jena ta insaan akilu batna taki wa mala maedda taki ma ketab de al ana wodi le inta!'' Fa ana akulu, wa huwo kan helu ze asal fi kasma tai ⁴ Yala huwo kelim le ana, ''Jena ta insaan, ruwa le bet ta Israel wa wonusu kelimat tai le humon. ⁵ Leanu inta ma rasulu inta le nas kalam gharib aw lugha al saab, lakin le bet ta Israel__ ⁶ ma le nas ketir ta kalam gharib aw lugha al saab, al kelimat tomon inta ma bi fahim. Hagiga kan ana rasulu inta le humon, humon bi asuma le inta. ⁷ Lakin bet ta Israel ma indu nia ashan bi asuma le inta, leanu humon ma indu nia ashan asuma le ana. Fa kulu bet ta Israel huwo guwi wa gelib saab ⁸ Kun gowi! ⁹ Ana kutu wosa taki gowi ze wosa tomon wa jabin taki ze al mas, guwi min aja! Ma ta kafu homon aw ma ta kun taban ma wosa tomon, ze ma homon bet mutamarid.'' ¹⁰ Yala huwo kelim le ana, Jena ta insan, kulu kelimat al ana alinu fi gelba taki wa asuma humon ma adna taki! ¹¹ Yala ruwa le sabi, le nas taki, wa wonusu le humon. Kelim le humon, De yau haja al Rabuna Yahwa kelim; kan humon bi asuma wele laa.'' ¹² Yala roho arfa ana fok, wa ana asuma min wara tai swat ta zalzal kebir: ''Baraka huwo majid ta Yahwa min mahal tou! ¹³ ''Huwo kan swat ta jinah ta mukuluk al hai ze ma humon bi lemesu bado, wa swat ta ajalat al ma humon, wa swat ta zal zal al kebir. ¹⁴ Al roho arfa ana fok wa shilu ana beit, wa ana ruwa ma marara fi roho tai zalan, leanu ard ta Yahwa kan bi asuru bi guwa fogo ana! ¹⁵ Fa ana ruwa le sabi fi Tel Abib al bi ish sawa ma Kebar Canal, wa ana geni hinak fi nus tomon kati ana ajib le saba ayam, ¹⁶ Yala hasil bad saba ayam inu kelima ta Yahwa ja le ana gal, ¹⁷ ''Jena ta insan, ana kutu inta haris le bet Israel, fa asuma le kalam al min kasma tai, wa wodi le homon inzar. ¹⁸ Wokit ana kelim al shar, 'be hagiga in bi mutu' wa inta ma anziru huwo aw anziru al sharr an amayiel al sharir tou ashan huwo bi ish__al sharir bi mutu an katiya tou, lakin ana bi asalu dom tou min yadan taki. ¹⁹ Lakin kan ita anziru al sharir aw min amayiel tou al sharir yala huwo bi mutu an katiya tou, lakin inta bi alagu haya taki. ²⁰ Kan insan al salih gilibu min shokul kwes tou wa ma amulu adala, wa ana jzhizu asara gedam tou, huwo bi mutu. Leanu inta ma anziru huwo, huwo bi mutu fi katiya tou, wa ana bi zekir amayiel al zol kwes de amulu, lakin ana bi asalu dom tou min yadan taki. ²¹ Lakin kan inta anziru al insan al salih ashan bi wogifu katiya ashan huwo amulu katiya tani, huwo hagigtan bi ish ze anziru huwo; wa inta bikun anqizu haya taki.'' ²² Fa yadan ta Yahwa kan fogo ana hinak, wa huwo kelim le ana, ''Gum! ruwa bara adi, wa ana bi wonusu ma inta hinak!'' ²³ Ana gum wa ruwa bara bi wadeh, wa hinak majid ta Yahwa kan gaid, ze majid dak al ana ayenu bi jambo Kebar Canal; fa ana waga fi wosa tai. ²⁴ Al Roho ja le ana wa wogifu ana fok fogo kura tai; wa huwo wonusu ma ana, wa kelim le ana, ''Ruwa wa gofulu nefsa taki fi juwa taki, ²⁵ leanu hasa jena ta insan, humon bi kutu habil fogo ita wa robutu ita biga ita ma bi ruwa bara min nus tomon. ²⁶ Ana bi kutu lisan taki lesegu le fok ta kasma taki, fa inta bi kun abkam, wa inta ma bi agder ashan wabikh humon, ze ma bet mutamarrid min zaman. ²⁷ Lakin zaman ana wonusu ma inta, ana bi fata kasma taki ashan inta bi kelim le humon, 'De yau haja al Rabuna Yahwa kelim. Al wahis al bi asuma; al wahid al bi asuma ma bi asuam, leanu humon bet mutamarrid!''