¹ Bad dak kalam ta Yahwa ja le ana, bi gul, ² "Ibin al insan, kelimu le rais ta Tyre, Rabuna Yahwa kelimu: Gelib taki mutukebir! Inta kelimu, "Ana rabuna! Ana bi geni fi kursi ta rabanat fi geliba(nus) ta bihar!" Hata lo inta insan wa ma rabuna, inta amulu geliba taki ze geliba ta rabuna; ³ inta fikir gali inta negit min Daniel, wa mafi haja bi kutu inta istagrab! ⁴ Inta amulu nefsak ghani ma hikma wa maharat, wa ligo dahab wa fidah fi kazina taki! ⁵ Be hikma azim wa be tijara taki, inta zidu mali taki, yala gekiba taki indu kibiria ashan mali taki ⁶ Ashan kida, Rabuna Yahwa kelimu: Leanu inta kutu geliba taki ze geliba ta rabana, ⁷ Ashan kida ana bi jibu ajanib did inta, nas ta irhab min dual tanin. Humon bi jibu siyuf tomon did jamala ta hikma taki, wa humon bi kutu azama taki bikun nijis. ⁸ Humon bi rasulu inta tehet le hufura, wa inta bi mutu mut ta del al mutu fi nus bihar. ⁹ Hal inta hagiga bi gul, "Ana rabana" fi gidam ta nas al bi katulu inta? Inta insan wa ma Allah, wa inta bikun fi idan ta zol al bi atanu inta. ¹⁰ Inta bi mutu mut ta nas al ma teheiru be idan ta ajanib, fa ana kariru- de karar min Rabuna Yahwa.'" ¹¹ Kalam ta Yahwa ja le ana tanimara, bi gul," ¹² Ibin al insan, arfa waja le melik ta Tyre wa kelimu le huwo, ' Rabuna Yahwa kelimu: Inta kan misal ta tahara, malayan be hikma wa tahir fi jamala. ¹³ Inta kan fi Eden, jinena ta Allah. Ai hajer mulawan bi khati inta: yakut, topaz, zumurud, zaytuni, Aqick yamani, yasab, yakut azrak, fayroz, wa al beril. Teriga ta terkib taki amulu be dahab. Jahizu min yom al kalagu be inta. ¹⁴ Ana kutu inta fi jebel al mukadas ta Allah ze melik ta malaikat al ana masau ashan harisu nas. Inta kan fi nus hujar al sukun(har) al inta bi douru fogo. ¹⁵ Inta indak istkhama fi sikat taki min yom al kalagu inta lahadi zulum ligo min inta. ¹⁶ Be wasat tijara taki al azim inta kan malyan be unf, wa inta amulu khatiya. Yala ana jada inta bara min jebel ta Allah, ze zol al nijisu, wa ana demiru inta, malaika al haris, wa talau inta min nus hujar al sukun. ¹⁷ Inta kan mutukebir be jamala taki; inta karabu hikma taki ashan azama. Ana rasulu inta tehet ard. Ana kutu inta gidam muluk ashan humon bi ainu inta. ¹⁸ Ashan khatiya taki al ketir wa tijara taki al ma amin, inta nijisu mahal taki al mukadas. Yala ana sibu nar tala bara min inta; huwo bi abula inta. Ana bi geiru inta le rumat fi ard fi uyun ta nas kulu al bi suf ile inta. ¹⁹ Nas kulu al arufu inta beinu nas al bi regif le inta; humon bi kafu, wa inta bikun mafi tanimara."' ²⁰ Bad dak kalam ta Yahwa ja le ana, gali, ²¹ Ibin al insan, aglibu wusa taki le Sidon wa itnaba did huwo. ²² Gul, ' Rabuna Yahwa kelimu: Suf! Ana did inta, Sidon! Ana bi zahiru mejid tai fi nus takum ashan nas taki bi arufu inu ana Yahwa zaman ana nafisu adala fi nus takum. Bi ainu mejid tai fi nus takum. ²³ Ana bi rasulu bala(karisa) le intum wa dom fi sikat takum, wa al dabau bi waga fi nus takum. Zaman shakila(harib) ja did intum min kulu tija, bad dak intum bi arufu inu ana Yahwa. ²⁴ Bad dak shok al bi atanu wa bi waja bikun mafi tanimara le bet ta Israel min kulu del al hawlu al bi alisu nas tou, biga humon bi arufu inu ana Rabuna Yahwa!' ²⁵ Rabuna Yahwa kelimu, 'Zaman ana limu bet ta Israel min nas al humon kan shetetu fogo, wa kan shilu ana beid min humon, biga dual bi ainu , bad dak humon bi amulu biyut tomon fi ard ana bi wodi le khadam tai Yacub. ²⁶ Bad dak humon bi ish be aman fi ardi de wa abinu biyut, zarau ginena inab, wa ish be aman kan ana nafisu adala fi ras ta kulu nas al hasa alisu humon; yala humon bi arufu inu ana Yahwa Allah tomon!'"