¹ Wa de yau isimat ta iyal Israel ali ja min Masir ma Yakub, kul zol ja ma bet bitau; ² Raubin wa shamaun wa lawi wa Yahuza. ³ Wa Yasakir wa Zabolon wa Benjamin ⁴ Wa Dan nafta le wa Jad wa Ashir. ⁵ Wa kulu nas ali tala min suluba ta Yakub humon kan sebein nefsa. Wa Yusif lakin kan geni fi Masir. ⁶ Wa Yusif kan mutu ma kulu akwana too wa dufa dak kulu. ⁷ Wa iyal ta Israel kan weledu war aba ketir ketir khalis, wa humon mala Dunia kulu. ⁸ Yala melik jedid tala fi Masir ali kan ma arufu Yusif. ⁹ Melik de kelemu le nas too; “yau iyal ta nas to Israel biga ketir we futu nina. ¹⁰ Taali takum keli nina kabasu humon asan keli humon ma raba, leanu badin kan fi dusuman keli humon ma limu ma adu to nina asan dusuman ma nina wa nyakamu beled ta nina de” ¹¹ Humon gum amulu le iyal ta Israel ruasa ali bi taabu humon wa kutu humon abinu itnin medina ta makhazin le melik Foraun; fathom wa Ramsis. ¹² Wa likin fi sa ali gi azibu humon, humon raba wa tala ketir khalia, fadia kan amusuku melik ma nas too min kalam ali humon kan gi amulu le iyal to nas ta Israel. ¹³ Masirin istamiru iyal ta Israel big guwa, ¹⁴ Humon kan silu haya ta iyal ta Israel fi Istimar butal fi leben wa fi tin wa fi kulu sokhol fi jinanat. Kulu shokhol ali iyal ta Israel kan gi amulu kan bi guwa batal wa istimar. ¹⁵ Melik kan kelemu le itinin min dayat ta Ibranin isim ta wahid min humon shifra wa ta ni de isim bitoo kan Foua, ¹⁶ Melik gali; “kan itakum gi weledu nuswan ta Israel wa itakum gi ainu humon fi wokit ta weledu humon fi kursi, kan jena de weled keli itakum katulu, wa jena de biniya keli itakum sibu hai.” ¹⁷ Wa dayat de lakin gi kafu Rabuna Allah wa humon ma amulu ze melik ta Masir kelemu le humon, humon sibu iyal ali awlad geni hai. ¹⁸ Melik ta Masir nadi humon wa asalu humon gali ‘le itakum gi amulu zede wa sibu awlad hai? ¹⁹ Humon juwabu le melik gali ‘nuswan ta Israel ma ze Nuswan ta Masir, humon indu guwa ali bi sibu humon gi weledu guwam gubal lisa dayat ma wosulu” ²⁰ Wa Rabuna Allah amulu kuwes le dayat de, wan as ta Israel tala ketir shedid. ²¹ Wa Allah kan gi Jahizu le Nuswan de biyut asan humon gi kafu Allah. ²² Melik Faraun nadi nas too we kelemu le humon gali; ‘keli humon jada jena weledu uwo weled fi bahar, we sibu banat hai.