¹ Fi sena nimra talata le hukom ta melik ta Yahuza Yahoiakim, Nabukhaznasr melik ta Babil ja le Orshalim wa gufulo medina min ai haja. ² Allah wodi nusra le Nabukhaznasr huwo gilibo Yahoiakim melik ta Yahuza, wa juzo min afashat al muqaddas min bed ta Allah. Huwo shelo hajat de ma huwo le ard Babil, le bed ta illah tou, wa huwo kutu fi makhzan ma hajat ta illah tou. ³ Melik amiro ashfanz, mosuol ta maktab tou, kede jibo baad min shab Israel, min usra ta melik wa min shurafa- ⁴ shabab ma indo lom, shikil tumon giafa, indo maharat ta kulu hikma, malian be marafa wa fehim, bi agder wogif wa ishtakal fi kasr ta melik. Huwo bi deriso humon lugga wa kitaba ta kaldaneen. ⁵ Melik kutu le humon kulu yom min akil ta tu wa juzo min khamr al huwo bi ashrab. Shabab sukerin de bi deribo le muda talata sena, wa bad daak, humon bi akhadimo melik. ⁶ Fi nus ta jama de juzu min shaba ta Yahuza Daniel, Hanania, Mishael, wa Azaria. ⁷ Reis ta maktab tuo kutu le humon asami: Daniel semi Baltashasir, Hanania nadi Shadrakh, Mishael nadi Meshakh, wa Azaria isim tou Abdanengo ⁸ Lakin Daniel kutu fi mukh tou ino huwo ma bi nejiso jisim tou be akil al semeh wa khamr ta melik. Ashan keda huwo asalo min rais ta maktab kede afi huwo min akil ta melik. ⁹ Allah kan wodi le Daniel rahma wa hinia al kutu reis maktab de bi ihtaramo huwo. ¹⁰ Reis de kan kelimo le Daniel, "Ana bi kafo min sead ta al melik. Huwo wodi awamir yatou akil wa sharab kede wodi le intum. Kan huwo aino shekil takom batal min bagi shaba al fi umor takum, huwo ma bi amiro kede gatao ras tai?" ¹¹ Daniel gom wonuso le moshrif al wodi le huwo musolia tumon Daniel, Hanania, Mishael, wa Azaria. ¹² Huwo kelimo, "Jeribo enna, khudam taki, fatra ta ashara yom. Wodi le enna khadarawat bes ma moya le akil washarab. ¹³ Bad daak amolo mokarana beano shikil tanna ma shilik ta shabad al bi akulu akilat ta melik, wa hakilo khudam taki be haja al ita aino." ¹⁴ Mushrif de rudu fi kalam tou, wa jeribo humon ashara ayam. ¹⁵ Fi nihaya ta ashara ayam de shikli humon kan fi saha tamam, wa jisem malian akter min shabab al kan bi akulu akil al semeh ta melik. ¹⁶ Fa mushrif de shelo akil al semeh wa khamr tumon de wa wodi le humon khadarawat bes. ¹⁷ Allah kan wodi le shabab de maraf wa fihim le kulu kitaba wa ilim ta Babil wa kaman hikma, wa le Daniel magdira ta fahimo kulu ruya wa hilim. ¹⁸ Fi nihaya ta zaman al kutu be melik ashan humo be wogif fi gidam tou, reis ta maktab jebo humon gidam ta Nabokhaznasr. ^{19 20 21} Melik kan wonuso ma humon, wa fi nos ta majmuwa de kulu mafi ahsen min Daniel, Hanania, Mishael, wa Azaria. Humon yao wogif gidam ta melik, ashan bi akhdim huwo. Fi kulu suaal fi hikma wa marafa al melik asalo humon, huwo ligo shabab de ashara marat ahsen min bagi nas ta sihir wa al nadi nefa tou ino huwo bi agder wonuso ma meiteen, fi mamlaka tou kulu. ²¹ Daniel kan hinak lahadi awel sena ta melik Korash.