¹ Asma takum kalam de al ana selu fok ze kore ta huzun ,ya bet ta Israel ² Israel al azra kalas waga , hiya ma be gum dani mara ,sebu hiya fi ard tou,mafi zol tani al be arfa hiya fok ³ De yau haja al elah Yahweh kelim ,medina al tala ma alf be fadul be meya min umon ,le de al ruwa ma meya be fadul lomon asara bes al tabi le bet ta Israel . ⁴ Yala de yau kalam al elah Yahweh kelim le bet ta Israel ,fetisu takum ana asan itakum be hai ⁵ Mata takum fetisu Bethel ,wele keli itakum dakalu fi Gilgal ,mata takum ruwa fi Beersheba ,lanu Gilgal be ruwa fi abudia ,Bethel bekun ma endu aii haja . ⁶ Fetisu Yahweh asan itakum be hai ,aw Yahweh be kun ze nar fi bet ta Joseph,be demiro yala mafi zol bagder istahmal hajat de fi Bethel. ⁷ Nas de umon gelibu adala le hajat al mur (batal ), Kaman umon jada kadasa fi turab. ⁸ Rabuna salau mesahat fi wasat ta nujum ,hwo geyeru dalam le sabha, Kaman hwo salau yom geli kun asuet be belel ,Kaman nadi moyu min bahar ,yala hwo kubu moyou de bara fi turab, Yahweh yau isim tau. ⁹ Yahweh jebu demar le nas al goween ,asan demar be ja fi kulu medan . ¹⁰ Umon bakrah kulu zol al be adilu umon fi bab ta medina,Kaman umon ma der aii zol al be kelim hagiga. ¹¹ Asan itakum dusu nas al masakin tehet kaman itakum selu hajat al kan be kun tomon ,hata kan itakum abinu juwa ta sukul min hajer, itakum ma be geni fogo, itakum endu mazari lakun itakum ma be asrab merisa min fogo. ¹² Ana aruf adad ta nas min wasat takum al amulu hajat al batal ,Kaman godur sunu katiya takum , itakum al amulu batal le adala ,selu rosuwa,Kaman itakum selu nas al muhtajen ,wa itakum kutu umon fi bab ta medina. ¹³ Asan keda zol al hadi wa al kuwes kan umonn askut fi zaman dak ,lanu de kan zaman al serir. ¹⁴ Keli itakum fetisu hajat al kues ,ma hajat al batal asan itakum be hai, yala Yahweh elah ta junud be kun ma itakum , ze ma itakum kelim gali ,hwo yau. ¹⁵ Aba takum hajat al serir ,hibu takum hajat al kues ,keli itakum abinu adala fi bab ta medina , Yahweh ,Rabuna ta junud be kum kues le bagi nas ta Joseph . ¹⁶ Asan keda de yau kalm al Rabuna kelimu ,Rabuna ta junud , kore ta elah be kun fi kulu murabat ,yala umon be kelim fi sawari kulu ,tab ,tab , umon be nadi muzarin le kore ,wa las al be kore le korerat . ¹⁷ Fi kulu mazari nas fi korerat , ana be ruwa min wasat takum ,Yahweh yau kelim . ¹⁸ Tab le itukum al endu near fi yom ta Yahweh , malu itakum be fekir le yom ta Yahweh ? yom de be kun zalam ,nur mafi . ¹⁹ Ze zol al be jere min ased yala morfoyen lego zol de, aw zol ruwa fi juwa ,yala wadi eden tou fi heta ,yala debeba adi zol de. ²⁰ Hal yom ta Yahweh ma be kun dalam Kaman mafi nur? Dalam sedid mafi dow . ²¹ Ana karaw Kaman ana ma der ehtifalat takum, ana ma be kun fi tajomu takum . ²² Hata kan itakum wodi lana zebiha takum al mahruk wa zebiha ta degig ,ana ma be rudu ,ana zatu ma be ayenu le zebiha takum min haewanat al suman ze zebiha ta estrakia . ²³ Selu takum ezaj ta agani takum de bara min ana ,ana zatu ma be asma le sot ta logarat takum . ²⁴ Al saa kan itakum be sebu adal be harik ze moyou ,wa kadasa be jere mustedem ze ze moyou ta kur . ²⁵ Hal itakum kan jebu lana zebiha wa ataya for sahara le fatara ta arbeyen sena, ya bet ta Israel? ²⁶ Intum arfa fok suwar (asnam ) ta Sikkuth , melik takum Kaman Kaiwan , nejma al yau Rabuna takum ,al intum salu le nufus takum . ²⁷ Asan keda ana be selu itakum beyet min Damascus , Yahweh yau kelim al isim tou Rabuna ta junud.