¹ Kitab al awel al Ana katibu, Ya Saufilius, gi weri kulu hajat al Yesua bada amulu wa derisu, ² lakadi fi yom al shilu uwu fuk, baat ma uwu wedi wasiya bewasat Roho al Kudus le talamis al uwu iktaru. ³ Baat taab tuo, uwu zahiru nefsa tuo hai le umun be isbatat al mugni. Le arbain yom uwu geni zahir le umun, wa wonusu an mulukut ta Allah. ⁴ Zaman uwu kan bi limu ma umun, uwu wesi umun kede ma sibu Urshelim, lakin bi istena waad ta al Ab, al uwu wonusu anu, ``Itakum asuma min ana <sup>5</sup> inu Yohanna hagigatan amidu be moyo, lakin bi amidu itakum be Roho al Kudus baat ayom besit.`` ⁶ Zaman umun limu sawa umun asalu uwu, ``Rabana, hal de zaman al ita bi rija mamlaka le Israel?`` ⁷ Uwu kelim le umun, ``Ma le itakum ashan bi aruf azmina wa mawasim al al Ab hadidu be sultan tuo. <sup>8</sup> Lakin itakum bi akudu gowa, kan Roho al kudus nezil fugu itakum, wa itakum bi kun shuhudien tai fi Urshelim wa kulu Yahudia wa Samira, wa le akir wata.`` ⁹ Wekid Rabana Yesua kelim kalamat de, ze ma umun gi ayinu fuk, arfau uwu fuk, wa sihab kati uwu min Eyun ta umun. ¹⁰ Ze ma umun gi ayinu le samawat shedid ze ma uwu ruwa , sutfa, itnin rujal wegif safa umun be gumas abiyad. ¹¹ Umun kelimu, Itakum ya Jeliliien, malu itakum gi wegif hini gi ayinu le sama? Yesua de al shilu min itakum le sama, bi rija be nefsu teriga ze ma itakum ayinu uwu gi ruwa le sama.`` <sup>12</sup> Baat kida umun rija le Urshelim min Jebel Zaitun, al uwu gerib le Urshelim, mushwar ta yom sebit. <sup>13</sup> Zaman umun wusul, umun ruwa fi gurfa al fuk, mahal al umun kan gi geni fugu. Umun kan Butrus, Yohanna, Yagub, Andraus, Philibus, Thoma, Bartilimaus, Matta, Yagub jena ta halfa, Samaan al gayur, wa Yahuza jena ta Yagub. <sup>14</sup> Umun kan mutwahidin, ze ma umun bi istemir fi salawat be nefs wahid. Ma nusuwan al ma umun, Mariam uma ta Yesua, wa akuana tuo. <sup>15</sup> Fi ayom dak Buturus wegif fok fi nus ta akwana, kulu 120 nas, wa kelim, <sup>16</sup> Akwana, uwo kan mohim inu kede kamilu kitab, inu Roho al Kudus wonusu gabul kida be wasat kasma ta Daoud be kusus Yahuza, al gedimu delin al gubudu Yesua. <sup>17</sup> Ashan uwu kan wahid min nina wa akudu nisba tuo ta kidima de.`` ¹⁸ (hasa zol de biu mahal zara ma maksab al uwu ligu min gurush ta sher, wa inak uwu waga be usa tuo, wa faga min nus, wa musuran tuo kulu dufugu bara. ¹⁹ Delin kulu al bi geni fi Urshelim asuma an kalam de, ashan kida umun nadi isim ta mahal zara de ``Akeldama, al mana tuo ``Mahal zara ta dom.``) ²⁰ Ashan katibu fi kitab ta Mazamir, 'Kede bed tou karabu, wa kede mafi zol geni fogo'; Kede zol tani shilu wazifa tuo ta giada.' ²¹ Uwo dururi, ashan kida, de al geni dowuru ma nina kulu wekid al Rabana Yesua dakalu wa tala min nus ta nina, ²² bada min mamodia ta Yohanna lakadi fi yom al shilu uwo fok min nina, lazim uwo bikun shahid ma nina an giama tou.'' ²³ Umon azilu itnin rujal, Yusuf al gi nadi Barsaba, al lagab tou kaman Yustus, wa Matias. ²⁴ Umon seli wa kelim,'' Ita, Rabana, aruf gulub ta nas kulu, keli ita weri yatu min itnin del al ita iktaru ²⁵ ashan bi shilu mahal fi kidma wa rasulia de al Yahuza sibu wa ruwa fi makan tou.'' ²⁶ Umon jada gura le jama de, wa gura waga le Matias, wa idu uwo ma talamis al idasar.