¹ Yushia kan umor tuo temeniya sena zaman huwo bada hakimu; huwo hakimu wahid wa teletin sena fi Urshelim. ² Huwo amulu al sah fi ena ta Yahwah, wa durur fi sika ta Dauod jidi tuo, wa ma lifu yemin wele shamal. ³ Wa fi sena nimra temeniya ta hukum tuo, ligu huwo lisa suker, huwo bada fetishu Ilah ta Dauod, jidi tuo. Fi sena nimra itnashar, huwo bada nedifu Yahuza wa Urshelim min murtafaat, wa Sawari wa timsalat wa asnam. ⁴ Shaab hadimu mazabih ta Baal gidam tuo; huwo gata timsal al kan fi rasa ta mazbah. Huwo kasuru timsal ta shemis wa sawari kasuru suker suker. Huwo turab de fi ras magabir ta nas al gi gedimu zabaeih fugu. ⁵ Huwo haragu udam ta kahana tumon fi ras mazabih de. Be teriga de huwo tahiru Yahuza wa Urshelim. ⁶ Huwo amulu nefsa haja fi mudon ta Manassa, Afraim, Shamoun, lahadi le Nafatali, wa mahalat al karabu hawil umon. ⁷ Huwo kasuru mazabih, wa dugu sawari wa kasuru timsalat lahadi biga degig, wa kasuru kulu, mazabih ta ta bakur al fi ard Israel kulu. Yala huwo rija fi Urshelim. ⁸ Wa fi nimra tamantashar ta hukum tuo, baat ma Yushia tahiru ard wa haikal, huwo rasulu Shafan jena ta Asslia rais ta medina ma Yuwak jena ta Yawahas al sikirter, ashan bi salaw bet ta Yahwah Ilah tuo. ⁹ Umon ruwa le Hilkiah kahin al kebir, wa wedi le huwo gurush al jibu fi bet ta Allah, al Lawin al bi harisu abuab, limu min Manassa, Afraim, wa min bagi ta Israel, min Yahuza wa Beyamin, wa min sukan ta Urshelim. ¹⁰ Umon wedi gurush de le rujal al ayinu shukul fi haikal ta Yahwah. Rujal dafa nas al sala haikal. ¹¹ Umoin dafa le najarin wa banayin kede ruwa biu hujar al munhut wa kashab al bi ja rubutu sawa, wa ashan bi amulu segif fi biut al muluk ta Yahuza karabu. ¹² Rujal de amulun shukul de be amana. Muragibin tumon Yahas wa Obadiah al min Lawin, min iyal ta Marari; wa Zechariah wa Mashulam jena ta Gahatiin. Baad min Lawin, kulu delin al kan baaruf musika kues, umon kan bi wajihu nas min gerib. ¹³ Lawin delin kan musulin min delin la bi arfa hajat ta abinu, wa bagi nas tanin al ishtakal baru baru. Kaman kan fi Lawin al kan sekertariin, wa idariin, wa gufara ta bab. ¹⁴ Wekit umon jibu gurush al akn wedi kle bet Yahwah, Hilkiah al kahin ligu kitab ta ganoon ta Yahwah al kan wedi be wasat ta Mosa. ¹⁵ Hilkiah kelim le Shafan al katib, ''Ana ligu kitab ta ganoon fi bet ta Yahwah.'' Hilkiah jibu kitab de le Shafan. ¹⁶ Shafan shilu kitab de le mwlik wa gedimu tagrir, kelim, kadamin taki bi amulu ayi haja al wedi le umon. ¹⁷ Umon fadi gurush al ligu fi bet ta Yahwah, wa umon selimu fi iden ta muragibin wa rujal al bi ishtakal.'' ¹⁸ Shafan al katib weri le melik, ''Hilkiah al kahin wedi le ana kitab'' Yala Shafan agara min fugu le melik. ¹⁹ Wekit melik asuma kelimat ganoon, huwo sheretu gumashat tuo. ²⁰ Melik wedi awamir le Hilkiah, wa Ahikam jena ta Shafan, Abdon jena ta Micah, wa Shafan al katib, wa Asaiah kadam tuo, ²¹ ''Ruwa takum wa asalu irada ta Yahwah le Ana, wa le delin al fadulu fi Israel wa fi Yahuza, be sabab ta kelimat ta kitab al ligu de. Lanu kelimat de azim, zalan ta Yahwah al kubu fugu anina. Azim lanu judud ta nin ma asuam le kelimat ta kitab de ashan bi teii kulu haja al katibu fugu.'' ²² Yala Hilkiah, ma delin al melik weri le umon, ruw le Kaldah al nebiya , mara ta Shallum jena ta Tokhas jena ta Hasra, al bi harisu dulab (Mara de bi geni fi Urshelim fi mentiga nimra itnin), umon wunuso ma mara de be teriga de. ²³ Mara de kelim le umon, ''De haja al Yahwah, Ilah ta Israel kelim: Kelim le rujal al rasulu itakum le Ana, ²⁴ 'De kalam al Yahwah wunuso: Ana bi ruw jibu Karisa fi mahal de wa le sukan tuo, kulu lanat la katibu fi kitab gidam ta melik ta Yahuza. ²⁵ Hajat de bi hasil lanu umon sibu Ana wa aragu bakur le rabunat tanin, wa umon kutu Ana biga zalan be kulu hajat al iden tumon amulu, ashan kida zalan tai bi kubu fi mahal de, wa ma bi ageder batulu.' ²⁶ Lakin le melik ta Yahuza al rasulu itakum ashan bi asalu Yahwah an haja al huwo bi amulu, de kalam al itakum bi kelim le huwo, Yahwah, Ilah ta Israel kelim kida: An kalam al itakum asuma, ²⁷ lanu geliba taki kafu wa ita rija nefsa taki gidam tai wa ita sheretu gumashat taki wa kure gidam tai, Ana kaman asuma le ita de yao elaan ta Yahwah- ²⁸ ayinu Ana shilu ita le judud taki. Wa bi kutu ita fi gubur taki be salam, wa uyon taki ma bi ayinu karisa al Ana bi jibu fi mahal de wa le sukan tuo.''' Rujal de shilu risala de wara le melik. ²⁹ Yala melik rasulu rusul wa limu shiuk ta Yahuza wa Urshelim kulu. ³⁰ Yala melik ruwa fuk fi bet ta Yahwah, ma kulu rujal ta Yahuza wa sukan ta Urshelim, wa kahana, Lawin, wa shaab kulu, min kebir le suker. Yala huwo agara kulu kelimat ta kitab ta ahad al ligu fi bet Yahwah fi adana tumon. ³¹ Melik wegif fi mahal tuo wa amulu ahad gidam ta Yahwah, ashan bi hafiso wasaya tuo, wa gawanin tuo wa nuzum tuo, ma geliba tuo wa nefsa tuo kulu, wa bi tei kelimat ta ahad al katibu fi kitab de. ³² Huwo sibu kulu delin al fi Urshelim wa Benyamin wegif jambu ahad. Sukan ta Urshelim ish fi taa ta ahad ta Allah, Ilah ta judud tumon. ³³ Yushia shilu kulu wasaka bara min ard ta shaab Israel. Huwom kutu ayi zol fi Israel abudu Yahwah, Ilah tumon. Fi ayamat tuo kulu, umon ma rija wara min duria wara Yahwah, Ilah ta judud tumon.