¹ Aumur ta Yuwash kan Saba sina zaman al howo bada hukum; Howo hukumu le muda Arbein sina fi Ureshelim. Isim ta Auma tuo kan Zabiya, min Beir sabaa. ² Yuwash kan amulu haja al sah fi ena ta Yahwah fi kulu ayam ta Yehuyadaa, al Kahen. ³ Yehuyadaa juwuzu le howo itniin Nusuwan, wa howo biga Abu ta Abna wa Banat. ⁴ Wa baad de, Yuwash fekir ashan bi istarrejaa Beit ta Yahwah. ⁵ Huwo lemu Kahana wa Laween, wa howo kelim le homon, "Kulu sina keli intum ruwa fi kulu mudun ta Yahuza wa keli intum lemu gurush min kulu Israel ashan bi amulu siyana fi Beit ta Allah takum. Keli intum itaakad inu intu bada lemu towali." Fi bedaya al Laween ma amulu haja. ⁶ Wa Melik nadi al kahen al Aala Yehuyadaa wa kelim le howo, "Leh inta ma talabu min al laween ashan bi jebu deriba min Yahuza wa Ureshelim deriba ta Musa khadim ta Yahwah wa mujtamaa ta Israel le khima ta shehada al Aahdi?" ⁷ Leanu Iyal ta Aasaliya, al mara al sherira, homon kasuru Beit ta Allah wa wodi hajat al mughadusa kulu le baal. ⁸ Wa melik wodi Amr, wa homon sanduk wa kutu bara fi Bab ta Beit ta Yahwah. ⁹ Wa homon amulu ealan fi Yahuza wa Ureshelim, ashan shaab bi jebu le Yahwah deriba ta Musa khadim ta Allah al faredu le Israel fi al Barriya. ¹⁰ Ghaada kulu wa shaab kulu afrah wa homon jebu gurush wa kutu fi sanduk lahadi homon mala sanduk de. ¹¹ Wa zaman al Laween jebu sanduk de le wukalla ta melik, wa wokit homon kan ainu wa legu gurush ketir fi sanduk, katib ta al melik wa wukalla ta al kahen bi jaa, wa fadi sanduk d, wa bi arfau wa rejaau fi nefsa al mahal tuo. amulu zi deyom baad yom, homon lemu kemiya kabier ta gurush. ¹² Al melik wa Yehuyadaa wodi gurush de le nas al kan amulu shukul ta khidma fi Beit ta Yahwah. Nas de ajearu Nahateen wa Najareen ashan bi jedidu Beit ta yahwah, wa kaman nas al gi ishtakal fi hadid wa Nihas. ¹³ Biga Aumal ta shukul, wa shukul ta siyana de ruwa le gedam fi edan tomon; homon wogifu Beit ta Allah fi sura tuo al asili wa sabit. ¹⁴ Zaman homon kalasu, homon jebu bagi ta gurush le Melik wa Yehuyadaa. Bagi fedda de kan istakhdimu fi amulu asasat ta beit ta Yahwah, Aafashat al ta khidma wa gedimu zabaeh- maalagat wa Aafashat min Dahab wa Fedda. homon gedimu Zebiha al gi haragu fi Beit ta Yahwah bi istemrar fi kulu ayam ta Yehuyadaa. ¹⁵ Yehuyadaa biga Ajuz wa howo iesh aumur towil, wa howo mutu; Aumur tuo kan Miya wa teletiin 130 sina zaman howo mutu. ¹⁶ Dufunu howo fi medina ta Daud wasat muluk, ashan howo amulu kwes fi Israel, Le Allah, wa le Beit ta Allah. ¹⁷ Hasa baad mutu ta Yehuyadaa, Ghaada ta Yahuza jaa wa gedimu mejeed le melik. wa melik asuma le homon. ¹⁸ Homon sibu Beit ta Yahwah, Allah ta Judud tomon, wa abiedu aaliha ta al sawari wa al asnam. Zalaan ta Allah nezil le Yahuza wa Ureshelim ashan hajat al ghalat tomon ( Atham). ¹⁹ Lisa howo rasulu Anbieyaa le homon ashan bi rejaa homon tani le Howo, Yahwah; al anbieyaa wodi shihada le shaab, lakin homon ma asuma. ²⁰ Ruhu ta Allah nezil le Zakariya jena ta Yehuyadaa, al kahen; Zakariya wogif gedam ta shaab wa kelim le homon, "Allah kelim keda: Leh intum gi khalifu wasaya ta Yahwah, wa intum ma gi najah? min zaman intum sibu Yahwah , Huwo kaman sibu intum." ²¹ lakin homon amulu muamara deed howo; wa bi amr min al melik , homon rejimu howo bi hujaar fi midan ta Beit ta Yahwah. ²² Wa bi teriga de, Yuwash, Al melik, jahilu shukul kwes ta Yehuyadaa, Abu ta Zakariya, al amulu kwes le howo. badal keda, huwo katulu jena ta Yehuyadaa. zaman Zakariya gi mutu, howo kelim, "Keli Yahwah ainu haja al inta amulu de wa kelin nadi inta le hisab." ²³ Wa fi nihaya ta sina, Jesh ta Aaram jaa fi harib deed Yuwash. homon jaa le Yahuza wa Ureshelim; homon katulu ghaada ta shaab wa rasulu kulu al qhanaem min homon le Melik ta Demishque. ²⁴ Min raqhmi Jesh ta Aarameen jaa maa asakiir besiten, Yahwah wodi le homon intesar alla jesh al kebir shedid, ashan Yahuza sibu Yahwah, Allah ta Judud tomon. wa bi teriga de Aaramen jebu hukum le Yuwash, ²⁵ Wa fi zaman al Aarameen kalas ruwa, Yuwash kan auwgu shedid. khudam tuo amulu le howo muamara ashan ketil ta jena ta Yehuyadaa, al kahen.homon katulu howo fi serir tuo, wa howo mutu; homon dufunu howo fi medina ta Daud, lakin ma fi magabier ta muluk. ²⁶ De yahu nas al amulu muamara deed howo: Zabad jena ta shimaa, Mara al Ammoniya; wa Yehuzabad jena ta shimirta, Mara al Moabiya. ²⁷ Wa ama Iyal tuo, Ahama Nubuat al kan kelimu aan howo, watejdid ta Beit ta Allah, yahu, homon muktub fi ahdas ta kitab ta muluk. Amasiya jena tuo biga melik fi mahal tuo