¹ Solomona wodi amiru ashan keli abinubed be iisim ta Yahwah wa ashan bi abinu qasr le mamlaka bitou. ² Solomona wokilu sebein alf rujal ashan bi arfa humula, wa tamaniin alf rujal al bi gata ujar fi jubal, wa 3,600 rujal ashan bi ainu wara shokol toumon. ³ Solomona rasulu risala le Hiram, melik ta Tyre, wa gal “zei ma inta amulu ma abu bi tai Dau, wa inta rosulu le huwo kasab ta sayidaan ashan bi abinu bed al huwo bi geni fogo. Kaman amulu zede ma ana. ⁴ Ainu, ana de bada abinu bed be isim ta Yahwah Allah bitai, ashan be qerisu le huwo, ashan bi haragu fogo bohurat al bi afin hilu gidam tou, ashan bi kutu fi gidam tou rekif, wa zebiha al bi haragu saba wa ashiya. Fi yom al sebit wa kan gamara jedid tala wa bardo fi yom ta iqtifal ta ed le Yahwah , Allah Ta nina. De bi geni ilel abat le Israell. ⁵ Juwa al ana bi abinu de bikun kebir leanu Rabuna tanina de kebir min kulu rabunat tannin. ⁶ Lakin de munu yau biakder abinu bed le Allah, yaude dunia kulu wa samawat ma biakder shilu huwo? Ana munu ashan bi abinu Juwa ile ashan bi haragu fogo zebiha gidam bitou? ⁷ Ashan kida, Rasulu le ana rojul wahid al endu kibra fi shokol ta dahab, fida, barunz, Hadid wa fi lon al arijwani, qarmzi, wa sawf al zahar, rojul al bi arufu amulu kulu shikil ta kasab al bi afiru. Huwo bi geni be rujal al mualimin fi shokol de al fi Yahuza wa Jerusalem, al abu tai Daud kan wodi. ⁸ Rasulu le ana Kaman Sayidaan, qubrus, wa Shejera tahalib min Lebanon, ana arufu gali kadamin taki arufu gata loho min Lebanon. Ainu, kudam tai bi ishtakal be kudam taki, ⁹ Ashan bi amulu le anal oho ketir, leanu juwa al ana masi abinu de bi geni kebir wa azim. ¹⁰ Ainu, ana bi wodi le kudam taki, rujal al bi gata loho, ishirin alf kuris ta geme al atanu, ishirin alf ta kuris ta Shaeir, ishirin alf jerdel ta qamra, wa ishirin alf jerdel ta zed. ¹¹ Hiram, melik ta Tyre juwabu be waraga, al huwo rasulu le Solomona:” Leanu Yahwah hibu nas tou, huwo kutu inta ashan bi geni le humon melik” ¹² Zaida min de, Hiram gal, “keli bariku Isim ta Yahwah Allah ta Israel, al kalagu samawat wa ard, al wodi le melik Daud jena al negit, al endu hadia ta marafa wa fahimu kalamat, huwo al bi abinu juwa le Yahwah wa Kaman qasr ne su. ¹³ Hasa, ana rasulu rajil al mualim, Huram – Abi, al endu hadiya ta fihim. ¹⁴ Huwo weled ta mara min banat Dan. Abu tou kan rajil min Tyre. Huwo mualim shedid fi shokol ta dahab, fida, barunz, hadid, hajer wa loho cirijwani, zahar wa sawf al qarmzi, wa jelabia tamam. Huwo bardo endu kibra fi amulu shikil hajar al bi afiru wa amulu shikil ta hajatbe no giafa. Keli salou le huwo mahal fi nus ta rujal taki al mualim de, wa ma nas seid al Daud Abu taki. ¹⁵ Hasa, kida ma zei inta asalu yom de, ana bi rasulu geme wa shaeir, zed wa qamra zei ma seid bitai wonusu le kadim tou. ¹⁶ Nina bi gata loho min Lebanon ketir goduru al inta der. Nina bi shilu le inta zei tawwafat be bahar le Joppa, wa intum bi arfa humon le Jerusalem.” ¹⁷ Solomona idu kulu ajanib al kan fi ardi ta Israel, be nebsu teriga al kann Daud abu tou kan idu humon. Ja ligo adad toumon wosulu 153,600. ¹⁸ Huwo wokilu min umon sebein alif ashan bi arfa hajat tugal, Tamanin alif ashan gata-gata ojar min jubal, wa 3,600 ashan be geni nas al gi ainu nas ta shokol.