¹ Hasa Yahushafat biga indu Qhina wa Mejeed kebier; howo itehid nefsa tuo maa Ahab bi wasat wahid min usura ta Ahab jouzu Biniya tuo. ² Baad kam sinawat, howo ruwa le Ahab fi Samariya. Ahab dabahu khurfan wa abgar ketier le howo wa shaab al kan maa howo. Ahab kaman talabu min howo ashan bi ruwa hajimu Ramut gilaad maa howo. ³ Ahab, melik ta Israel, kelim le Yahushafat, melik ta Yahuza, " Hal inta bi ruwa maa ana le Ramut Gilaad?" Yahushafat juwabu le howo, "Ana zi inta, wa shaab tai zi shaab taki. nina bi ruwa maa inta fi harib." ⁴ Yahushafat kelim le melik ta Israel, " Min fadlak keli inta fetishu kalam ta Yahwah ashan inta bi ligu ijaba." ⁵ Biga melik ta Israel limu Anbiya sawa, Aurbumiyaa nafar, wa kelim le homon, " Hal keli nina ruwa fi harib maa Ramut Gilaad, aw keli nina ma ruwa?" homon kelim, "Hajimu, ashan Allah bi wodi Ramut Gilaad fi eda ta Melik." ⁶ Lakin Yahushafat kelim, " Hal lisaa fii Nebie ta Yahwah tani al nina bi asalu min howo irshad?" ⁷ Melik ta Israel kelim le Yhaushafat, " Lisa fii wadih zol al nina bi asalu irshad ta Yahwah min howo, Mikha jena ta Yimla, lakin ana gi akrahu howo ashan howo abeden ma gi nabaa le ana hajat al kwes, lakin daiman hajat al shar." lakin Yahushafat kelim, " Keli melik ma kelim keda." ⁸ Wa melik ta Israel nadi wahid Ghaed wa kelim, "Ruwa jibu Mikha jena ta Yimla." ⁹ Wa Ahab melik ta Israel wa Yahushafat melik ta Yahuza homon lebisu gumashat tomon wa kan gi geni kulu wahid fi kursi tuo fi mahal wasie gedam ta Bab ta Samariya, wa Anbiyaa kulu kan gi itnabaa gedam tomon. ¹⁰ Seghiya jena ta Kanaanaamulu le nefsa tuo ghurun min hadid wa kelim, " Yahwah kelim keda; Inta bi dugu Arameen bi ghurun de lahadi homon bi mutu kulu" ¹¹ Anbiyaa kulu itnabaa nefs al nubuaa, Kelim, " Hajimu Ramut Gilaad wa int bi intesiir, ashan Yahwahwodi howo le eda ta melik." ¹² Marasula al ruwa nadi mikha de kelim le howo, " Asuma, Al Anbiya kan wonusu kalam wahid kulu kan le kwes ta Al melik. Keli kalam taki kun sawa maa kalam al homon wonusu de, wa wonusu Nubuaa al kwes." ¹³ Mikha juwabu, "Yahwah hai, kalam al Alla kelim yahu ana bi kelim." ¹⁴ Zaman al howo jaa le melik, melik kelim le howo, Ya Mikha, Hal keli nina ruwa le Ramut Gilaad ashan harib, wele Laa?" Mikha juwabu howo, " Haribu wa bi kun Intesarat! leanu bi kun intesar azim." ¹⁵ Biga Melik kelim le howo," Kam mara keli ana talabu min inta ashan bi halifu enu inta ma bi wonusu illa al hagiga fi Isim ta Yahwah?" ¹⁶ Biga Mikha kelim, " Ana ainu Israel kulu shititu fi jebal, zi khurfan al ma inum raie tomon, wa YYahwah kelim,' Deel ma inum raie keli ayi zol rejaa le khima tuo fi salam."' ¹⁷ Wa melik ta Israel kelim le Yahushafat, " Ana ma kelim le inta inu howo ma nabaa aan ana haja al kews, ella musiba bes?" ¹⁸ Wa Mikha kelim, "Ashan keda intum kulu keli asuma kalam ta Yahwah: Ana ainu Yahwah geni fi Aarish tuo, wa junud ta sama wagifeen min yamin tuo wa min shimal tuo. ¹⁹ Yahwah kelim, ' Munu yahu bi shejau Ahab, melik ta Israel, ashan howo bi ruwa wa waga fi Ramut Gilaad?' wahid malak kelim de wa al tani kelim dak. ²⁰ Wa ruhu tala wa wogif gedam Yahwah wa kelim, 'Ana bi shejau howo.' Yahwah kelim le howo, 'Kef?' ²¹ Al ruhu kelim, ' Ana bi tala bara wa ana bi kun ruhu ta kezib fi kasma ta Anbiyaa tuo kulu.' Yahwah juwabu, 'Inta bi shejau hwow, wa inta kaman bi Najah. Keli inta ruwa hasa wa amulu.' ²² Hasa ainu, Yahwah wodi ruhu ta kezib fi kasma ta Anbiyaa taki deel kulu,wa Yahwah Aalinu musiba le inta." ²³ Wa Sedkiya jena ta Kenaana, jaa, dugu Mikha fi wosa tuo, wa kelim,"Ruhu ta Yahwah tala min ana keif ashan bi wonusu le inta?" ²⁴ Mikha kelim, " Asuma, inta bi arufu gal fi yom dak, zaman inta bi jere min maljaa le maljaa." ²⁵ Melik ta Israel kelim le baad min khudam, "Keli intum amsuku Mikha wa shilu howo le Amon, Hakim ta medina, wa Yuwash, weled tai. ²⁶ Keli intum kelim le howo, 'Melik kelim: kutu zol de fi sejeen wa wodi le howo akil besit wa moyo shuwiya, lahadi ana bi rejaa bi salama."' ²⁷ Biga Mikha kelim, "Iza inta rejaa bi salama, maanatu Yahwah ma wonusu wasat ana." Wa howo zidu. "Keli intum asuma kalam de, Ya shaab kulu." ²⁸ Wa Ahab, melik ta Israel, wa Yahushafat, melik ta yahuza, ruwa deed ramut Gilaad. ²⁹ Melik ta Israel kelim le yahushafat, " Ana bi kati nefsa tai wa bi ruwa fi al harib, Lakin inta bi lebisu gumashat ta melik." wa melik ta Israel dusu nefsa tuo, wa ruwa fi harib. ³⁰ Biga melik ta Aaram amiru ghada ta markibat tuo, kelim gal, "Ma keli intum hajimu asakiir al ma muhim aw al muhim, lakin, hajimu takum melik ta Israel bes." ³¹ Wa zman al ghaada ta markibat ainu Yahushafat homon kelim, "Dak yahu melik ta Israel." homon rejaa wara wa hajimu howo, lakin Yahushafat kori shedid, wa Yahwah saidu howo. Allah qhiru homon min howo. ³² Wa zaman ghaada ta markibat ainu inu dak kan ma melik ta Israel, homon rejaa min turudu wara Yahushafat. ³³ Lakin fii zol tani wazinu nishab tuo bi dun gasied wa durubu melik ta Israel beina mafasiil ta daraga tuo. Biga Ahab kelim le zol al gi sugu markiba tuo de. " Rejaa wa jere maa na bara min mahal ta harib, ashan auwgu ana." ³⁴ Harib biga sukhun shedid fi yom dak, wa melik ta Israel kan wogifu fi markiba tuo mugabil Aarameen lahadi fi misaa. Howo mutu, fi zaman al kan .shemish gi waga