¹ Zaarsǝ monda taa larshi tǝ vǝr a dulgam gya ngǝtn won ɗaŋ taa yungar a dlei wom, ² ɗaŋ gyo tǝ vǝrmi a taas,gyo ɗaŋ a gǝmgǝn daɗi cin murgǝ gya tlaghǝn zha tǝ monsǝ kǝ shingǝn wos. ³ Tǝ cik ɓasǝm maa ɗaŋ a yaal ndaara ɗaŋ mǝ paŋ mǝ yeli ndaara vya ngǝtn yo ɗaŋ a kǝn ɓuruk ngǝshi gya gin ɗi keni mǝdlyaad kǝ mǝn avii-avii, gyo ɗaŋ a mob vartǝ Tiyofilas. ⁴ Gin yi tu a yisǝŋ jom -jomeshi a dulgam ngǝtn yo ɗaŋ ta kuub kǝ ghai ⁵ A mbudkǝn ghǝ Hiridus, Guŋ mǝn Judiya, pǝris won ɗa ɗan ɗaŋ sǝm wos tu Zakariy,a gibdǝn kǝ Abija. Gǝdi wos a ta yi namboŋ a gibkǝ mǝrǝ gudi ghǝ Haruna,tǝ cik sǝm wos ta yi tu Elizabatu. ⁶ Tǝ tayi nǝ zaarsǝ zaari a ken Cogn,mǝnlankǝn ɓorki ɓuruk tǝ kǝ gya labkǝn Daadǝn. ⁷ Bed tǝ gii tǝ ta yi tǝ ŋaa hŋ, a duryo tu Elizabatu a taya ɓwa hŋ, tǝ ik taa ta nɗwatǝi bed wasǝŋ a kiles. ⁸ A ta man a kili yo ɗaŋ Zakariya a tayi a ken ghǝ Cogn a fighǝn laa ghǝ Pǝris a tǝmp ngǝ laa wos. ⁹ A laabkǝn duul yo ɗaŋ caa bwa pǝris,yo ɗaŋ wo fi laa, she caa gǝm bwagǝn ghǝn ta tǝ fi laa a dǝn ghǝ Daadǝn duryo tu tǝ gǝǝp mir ghǝ dlǝrǝŋ-dlǝrǝŋ. ¹⁰ Ɓuruk gutuli zarses tǝ tayi a karaghǝn cogn ɓǝlǝm akili yo ɗaŋ cigha gepm kǝn mir ghǝ dlǝrǝŋ -dlǝrǝŋes ¹¹ A kili ges murghǝ shi gǝ Cogn a ta ɓǝl gamas cigha dlǝrghǝn a te taghǝ ghǝ zari mir ghǝ dlǝrǝŋ -dlǝrǝŋ ghǝ dakci vin ghǝ labkǝn . ¹² Ɗaŋ Zakariya yel tǝ ,a ta kogharti vǝrtǝ ta nda tǝ vwa. ¹³ Bed tǝ gii murghǝ shigǝn Cogn a ta wultǝ tu, "Vǝrtǝ tǝ ngab kǝ hŋ ,Zakariya, duryo tu karaghǝn wa taa wumi. Gǝɗi wa Elizabatu wo ɓwa ghǝ ŋaa mǝn.Ka cim sǝm wos tu Yohanna. ¹⁶ Zaarsǝ monda mǝn Israila ta a Daadǝn cognvon wasǝŋ. ¹⁷ Wo rin taŋ -taŋ a ken ghǝ Daadǝn a gib kǝ var tǝ var tǝ vartǝ Iliya . Wo fi cik duryo tu,tu sughǝd ɓi talghǝn gya Daawasǝn adlii mǝri wasǝŋ, duryo muryo ɗaŋ caa wum kǝǝm hŋ tǝ rii a yasǝŋ riighǝn mǝn wumnghǝn vartǝ Cogn. Duryo tu tǝ caa zaarsǝ tǝ ndǝr tǝ nai yir gwam nǝ yani." ¹⁸ Zakariya wul zhipti shingǝn Cogn tu, "Wuri ghǝn ma yisǝŋ gine? Ya yighǝ nin ma ndwatsǝi gǝden bed citǝ voni monda." ¹⁹ Zhipti shingǝn Cogn a suɗa tu a wul tǝ tu ," Myani ǝŋ mini Jibrailu , gyo ɗaŋ caa dlǝǝr a ken Cogn. Tǝ shinǝmdi mǝ fughǝ vimuri kǝ wusni gin. ²⁰ Sad tǝ cik ka nai nǝ bǝndǝŋ,ka ɗyaka ka wul vii hŋ ,she dzaŋ gyo ɗaŋ nghǝshig gya gin caa yughǝi . A na cik tu bak kǝ caa raa a gǝŋan hŋ ,gyo ɗaŋ ta yungari a kiles nɗaɓ." ²¹ Zaarsǝ tǝ ta yi a ɓubkǝn Zakariya . A nashi mǝn tǝ kwasarghǝn tu angalai monda a gib dǝn Cogn. ²² Bed tǝ gii ɗaŋ a ta nyolɗi ɓǝdlǝm a ta ɗya wul vii cimshi hŋ. Tǝ ta ɓital tu a yel gidkǝn Cogn a kiliyo ɗaŋ a ta yi ɗa gibdǝn Cognkes.A ciken tǝ fighǝn wasǝŋ taas vi nǝ ŋabkǝn. ²³ A ta tuli ɗaŋ dzaŋsǝ laa wos tǝ ɓani a ta tlii dǝn wos. ²⁴ A kar ghǝ ɓudkǝn gya gin, gǝdi wos Elizabatu a ta mbi ŋaavwa tǝ lǝpm nandam a ta waɗar gamashi. A wul tu, ²⁵ "Gin ghǝn nǝ nghǝtn yo ɗaŋ Daadǝn fim mǝn ɗaŋ a yelǝm tǝ shid shiɗi ɗaŋ tu tǝ kaɗǝ dzuutanmǝni a ken Zaarsǝ." ²⁶ A lǝpm lim ,Jibrailu mǝn shigǝn Cogn. Cogn ta shin tǝ agib kǝ yatl Galili sǝmes tu Nazarat, ²⁷ a lǝb ŋiiwon ɗaŋ a yisǝŋ mwamwan hŋ gyo ɗaŋ ta shiil murwon ɗaŋ sǝm wos tu Yusufu. Cinǝ kuni dǝn gya Dauda tǝ ŋiies sǝm wos tu Maryamu. ²⁸ A ta man ɓastǝ a ta wul tǝ tu ," Mya wuru ghǝ ,kyan ɗaŋ ki tǝ shidshidi mbun-mbun! Daadǝn ci tǝ kyan." ²⁹ Bed tǝ gi a ta vui ɓuruk nǝ gya gǝŋ wos a ta natǝ mǝn tǝ kosarghǝn tu nǝ naa wurughǝn gyo ǝŋdyo. ³⁰ Murghǝ shingǝn Cogn a ta wul tǝ tu,"ɓak ci vǝrtǝŋ,Maryamu ,duryo tu ka tu shidshidi a Cogn. ³¹ Yeli,ka mbi ŋaavwa a gib vwa vwa ka ndǝr ka ɓwaa ŋaa mwan ka cim wos 'Yesu'. ³² wo nai nǝ vari ta ndǝr ta tǝ tu ŋaa ghǝ gyo ɗaŋ a mob lughǝn . Cognvon wo vǝrtǝ guŋdu ghǝ kǝ wusuli wos Dauda. ³³ Wo fi guŋdu wos a dǝn ghǝ Yakub hal nǝ kǝ nɗok- nɗoki, tǝ cik guŋdu wos wo ɓan hŋ. ³⁴ Maryamu a wul zhipti shingǝn Cogn tu,"Wuri ghǝ gin wo fe,hal ɗaŋ tu ɓak ma mbud mwamwan hŋaa?" ³⁵ Murghǝ shingǝn Cogn suɗa a wultǝ tu ," Zhipti var wo shidi a dul gama ,tǝ cik vartǝ ghǝ gyo ɗaŋ a mob lughǝn wo man ɗaghǝ gam.Tǝ cik ŋaaghǝ dzǝkkǝnin ɗaŋ ta ɓwai ta cim tǝ tu ŋaa ghǝ Cogn. ³⁶ Yeli,dǝŋgi wa Elizabatu a mbi ŋaavwa a voni ghǝ ɗwaatsǝ wos. Gin ngǝn lǝpm na limi ǝŋni, ɗaŋ yan tǝ ta ya wul tǝ tu caa ɓwa hŋ. ³⁷ Tǝ gi ɓak ngǝtn won ɗa ɗaŋ wo ɗak Cogn hŋ." ³⁸ Maryamu wul tu, "Yeli , myan minǝ ŋaagǝd mon ghǝ Daadǝn.Tǝ nam mǝn ɗaŋ gyo ɗaŋ kǝ koni." She zhipti shingǝn Cogn ta tlii gaa tǝ. ³⁹ She mɓudkǝn gya gi Maryamu ta shishi vatǝ tlii a dandi ghǝ yatl, agib dǝllǝ yatl kǝ Judiya. ⁴⁰ A tlii gib dǝn gya Zakariya she wuru Elizabatu. ⁴¹ She a kili yo ɗaŋ Elizabatu ta wum wurughǝn Maryamu, ŋaai ɗa vwai a ta dim, tǝ cik Elizabatu ta yughǝi tǝ zhipti var ⁴² A ta ndǝrǝ vii wos wul tla-tlya, "Shidshidi nǝ gwa a gib kǝ guɗi, tǝ cik shidshidi nǝ ŋaa vwa wa. ⁴³ Nini ghǝn a tume tu naaghǝ Daadǝnen tǝ man ɓasma? ⁴⁴ Yeli ,a kili yo ɗaŋ mǝ wum yer ghǝ wurughǝn wa a kǝǝman, ŋaa ɗaŋ ci ɗam vwa a dim nǝ durghǝ polghǝn. ⁴⁵ Shidshidi nǝ yan gyo ɗaŋ a caa raai tu dzaŋ ngǝ yuŋar ghǝn caa maghǝnɗi nǝ gya ghǝtn won ɗaŋ tǝ ta fu tu a Daadǝn." ⁴⁶ Maryamu wul tu, "Raan luu Daadǝn, ⁴⁷ tǝ cik gib raan a poltǝ a Cogn murghǝ vumghǝnen. ⁴⁸ Tǝ cik a paŋ yelii a bungǝn yo ɗaŋ cighai kǝ mon wos ŋaa gǝd. Tǝ cik yeli, ɗaŋnin a ngab ɓuruk gya wusuli ta cim mǝm tu murghǝ shidshidi. ⁴⁹ Tǝ cik gyo ɗaŋ ci nǝ vari a fim nghǝtn mbuni mǝn monda ,tǝ cik sǝm wos yi tǝ dzǝkkǝn. ⁵⁰ Yelghǝn gwandǝ wos caa ngalai nǝ kǝ wusuli tǝwusuli nǝ gya gyo ɗaŋ caa wum vartǝ wos. ⁵¹ A zhid tlyaaghǝn tǝ gaŋ wos ;a basaŋ gya gyo ɗaŋ tǝ tayi tǝ mbitǝgam a mbitalgǝn ghǝ raa wasǝŋ. ⁵³ A shilar gya mǝri guŋsu a daan guŋdu wasǝŋ tǝ cik a shisher gya gyo ɗaŋ cin mǝn buŋghǝn. ⁵² A yuŋghar mǝn kusuŋ tǝ gya nghǝtn mbuni , bed tǝ gii a shin gya mǝn tughǝn taas vati. ⁵⁴ A som mon wos ɗa Israila, duryo tu tǝǝ mɓital tǝ zhid gwandǝ ⁵⁵ (ɗaŋ gyo ɗaŋ a fuu gya Daagom) Ibrahim tǝ gya wusuli wos kǝ ndok-ndoki." ⁵⁶ Maryamu a ta tsǝtn tǝ Elizabatu nǝ kǝ lǝpm maai ǝnda a ta sutu ɗaa tǝ dǝn. ⁵⁷ Ɗaŋ kili ghǝ ɓwaghen ghǝ Elizabatu ta tulidi she a ta bwa ŋaa mwan. ⁵⁸ Mǝn meli tǝ yan tǝ gya dǝngi wos tǝ ta wum tu Daadǝn zhid gwandǝ nǝ vari ɗaa tǝ,tǝ ta fi polghǝn tǝ yan. ⁵⁹ Ɗaŋnin a ta fii a dzaŋ ngǝ kǝ tantani ɗaŋ tǝ ta man tǝ sǝrǝ ŋaashi. A ta yin tu ta cim tǝ tu "Zakariya"akar ghǝ sǝm daagwas. ⁶⁰ Bed tǝ gii nagwos ta suɗa she wultu,"O,oi; ta cim tǝ tu Yohanna." ⁶¹ Tǝ ta wultǝ tu ," ɓak gon a gya dǝngi wan ɗaŋ caa cim tǝ tǝsǝmi gin hŋ ŋaa." ⁶² Tǝ ta fii taas Daagwos wuri ghǝn caa su tǝ caa tǝ sǝm mǝ ne. ⁶³ Daagwos ta ced tǝ lǝǝr tǝ ghǝtn dlyaadkǝn mǝndi she dlyaad ,"Sǝm wos tu Yohanna." Ɓuruk wasǝŋ nhǝshi ta kosarshi. ⁶⁴ Kyaad vii wos ta ɗǝrǝi risǝŋ wos a ta tǝrǝŋǝi ɗaŋ.A ta wul vi she luu Cognvon. ⁶⁵ Vertǝ ta ngab konu ɗaŋ ci gha tsǝnghǝn adlei wasǝŋ.Ɓuruk ves ta bǝli a dandi yatl kǝ Judiya. ⁶⁶ Ɓuruk gya gyo ɗaŋ tǝ ta wum ves tǝ ta gai a raa wasǝŋ, caa wultu ,"Wuri ghǝn ŋaai gin wo man nae?" Duryo tu taas kǝ Daadǝn a tayi tǝ yan. ⁶⁷ Daagos Zakariya ta yughǝi tǝ zhipti var she fi kon ghǝn jan tu, ⁶⁸ "luughǝn tǝ na nǝ kǝ Daadǝn ,Cogn kǝ Iseaila tu a man tǝ a somshiɗa a nder yuŋar cobkǝn ghǝ zarsǝ woshi a malghǝn." ⁶⁹ A ta dlilar ŋeri ghǝ vum ghǝn nǝ durghǝ myaani a gibdǝn ghǝ monwos Dauda, ⁷⁰ ɗaŋ gyo ɗaŋ a kon vik kǝ monwos kǝ dzǝkkǝn gya gyɗaŋ tǝ ta yiɗ ɓaandǝŋ, ⁷¹ wo kǝǝn vum ghǝn ɗia dlǝk mǝn gaghǝn gǝǝbtǝ myaani tǝ taaghǝ mǝn won ɗaŋ tǝ nyaŋngasmi. ⁷² Wo gin tǝ zhid gwandǝ a gya daagom tǝ ndǝr tǝ ɓital mbiɗa rai wos kǝ dzǝkkǝn. ⁷³ ŋaaskǝn pus ɗaŋ a ta fuu daagom Ibrahim. ⁷⁴ A ta ŋas pus tu wo kab mighai ,a karyo ɗaŋ caa vummi wopi a tass kǝ mǝn gagǝn gǝǝb wom,mǝ ɓuu tǝ mǝn tǝ vǝrtǝ hŋ, ⁷⁵ a gib kǝ dzǝkkǝn tǝ zari a ken wos ɓuruk mɓudkǝn wom. ⁷⁶ Cik,kyan ɗaŋ ,ŋaa ,ta cim ghǝ tu kinǝ murghǝ kongǝn jan gyo ɗaŋ a mob luughǝn,duryo tu ka tlǝ a ken ghǝ Daadǝn ka ndǝr tǝ gya tǝpm wos mǝni, a ɓumtsǝ zarsǝi nǝ durghǝ maghǝn wos, ⁷⁷ tǝ vǝr yisǝŋgǝn ghǝ vumghǝn zarsǝ wos a tǝpm ghǝ dlagǝn loŋsǝ kǝ kusǝŋsǝ ghǝtn wasǝŋ. ⁷⁸ Gin wo cik nǝ dueghǝ yelghǝn gwandǝ ghǝ Chognvon wom, duryo tu gyo ɗaŋ dzaŋ wo nyolɗi gaami wo man tu tǝ sommiɗa, ⁷⁹ tǝ mɓaa a gya gyo ɗaŋ tǝ tsǝtn a lǝǝb jii tǝ shiis kǝ mǝskǝn. Wo gin tǝ yal nǝ yasǝŋ wom a gib kǝ tǝpm raa wusni."