¹ ຢາໂກໂບ, ຜູ້ຮັບໃຊ້ຂອງພຣະເຈົ້າ ແລະ ພຣະເຈົ້າອົງເຈົ້ານາຍພຣະເຢຊູຄຣິດ, ທັກທາຍ ເຖິງສິບສອງ ຕະກຸນທີ່ກະຈັດກະຈາຍຢູ່ນັ້ນ ² ຈົ່ງຖືວ່າເປັນເລື່ອງທີ່ຫນ້າຍິນດີທັງຫມົດ, ອ້າຍນ້ອງຂອງເຮົາເອີຍ, ເມື່ອພວກເຈົ້າພົບການທົດລອງຕ່າງໆ. ³ ພວກເຈົ້າຮູ້ວ່າ ການຖືກທົດລອງ ຕໍ່ກັບຄວາມເຊື່ອຂອງພວກເຈົ້າ ກໍເຮັດໃຫ້ເກີດມີຄວາມພຽນອົດທົນ. ⁴ ຈົ່ງໃຫ້ຄວາມພຽນອົດທົນຂອງພວກເຈົ້ານັ້ນສຳເລັດຜົນ, ເພື່ອວ່າພວກເຈົ້າຈະໄດ້ກາຍເປັນຄົນທີ່ສຳເລັດ ແລະ ຄົບຖ້ວນທຸກປະການ, ໂດຍບໍ່ຂາດເຂີນສິ່ງໃດ. ⁵ ແຕ່ຖ້າຄົນໃດໃນພວກເຈົ້າຂາດສະຕິປັນຍາ, ກໍໃຫ້ຜູ້ນັ້ນຂໍຈາກພຣະເຈົ້າ, ຜູ້ຊົງປະທານໃຫ້ແກ່ຄົນທັງປວງດ້ວຍພຣະກະຣຸນາ ໂດຍບໍ່ກ່າວຕິຕຽນແກ່ຜູ້ທີ່ຂໍ, ແລະ ພຣະອົງກໍຈະປະທານໃຫ້. ⁶ ແຕ່ໃຫ້ຜູ້ນັ້ນຂໍດ້ວຍຄວາມເຊື່ອ, ຢ່າໃຫ້ມີໃຈສົງໃສສິ່ງໃດ. ເພາະຜູ້ທີ່ສົງໃສນັ້ນເປັນເຫມືອນຟອງນໍ້າທີ່ຖືກລົມພັດຊັດໄປມາ. ⁷ ຢ່າໃຫ້ຜູ້ນັ້ນຄິດວ່າຕົນຈະໄດ້ຮັບສິ່ງໃດຈາກພຣະເຈົ້າອົງເຈົ້ານາຍ. ⁸ ເພາະເປັນຄົນສອງໃຈບໍ່ແນ່ນອນໃນທຸກສິ່ງທີ່ຕົນກະທຳ. ⁹ ໃຫ້ພີ່ນ້ອງທີ່ຕໍ່າຕ້ອຍ ຈົ່ງອວດອ້າງໃນການທີ່ພຣະເຈົ້າຍົກຕົວໃຫ້ສູງຂຶ້ນ, ¹⁰ ແຕ່ໃຫ້ຄົນ ຮັ່ງມີຈົ່ງອວດອ້າງ ໃນການທີ່ພຣະເຈົ້າຊົງໃຫ້ຕົກຕໍ່າລົງ, ເພາະວ່າຕົນຈະຕ້ອງລ່ວງລັບໄປເຫມືອນດັ່ງດອກຫຍ້າ. ¹¹ ເມື່ອຕາເວັນ ຂຶ້ນດ້ວຍຄວາມຮ້ອນອັນແຮງກ້າ ແລະ ເຮັດໃຫ້ຕົ້ນຫຍ້າຫ່ຽວແຫ້ງໄປ. ດອກຫຍ້າກໍຫລົ່ນລົງ, ແລະຄວາມງາມກໍສູນສິ້ນໄປ. ໃນທຳນອງດຽວກັນ, ຄົນຮັ່ງມີຈະຈາງຫາຍໄປໃນຂະນະທີ່ດຳເນີນງານຂອງຕົນເຫມືອນກັນ. ¹² ພຣະພອນກໍ່ເປັນຂອງຄົນທີ່ພຽນອົດທົນຕໍ່ການທົດລອງ. ເພາະເມື່ອຜູ້ນັ້ນທົນໄດ້ແລ້ວ, ເຂົາກໍຈະໄດ້ຮັບມົງກຸດແຫ່ງຊີວິດ, ຊຶ່ງພຣະເຈົ້າໄດ້ສັນຍາໄວ້ແກ່ຄົນທັງຫລາຍທີ່ຮັກພຣະອົງ. ¹³ ເມື່ອຜູ້ໃດຖືກລໍ້ລວງໃຫ້ຫລົງ ຢ່າໃຫ້ຜູ້ນັ້ນເວົ້າວ່າ, “ພຣະເຈົ້າຊົງລໍ້ລວງຂ້ອຍໃຫ້ຫລົງ” ເພາະວ່າພຣະເຈົ້າບໍ່ໄດ້ຖືຢົ່ວຍຸໂດຍຄວາມຊົ່ວ ແລະ ພຣະອົງເອງກໍບໍ່ຊົງທົດລອງຜູ້ໃດໃຫ້ຫລົງຈັກເທື່ອ. ¹⁴ ແຕ່ວ່າທຸກຄົນທີ່ຖືກທົດລອງໃຫ້ຫລົງ ກໍຍ້ອນຄວາມປາຖະນາຂອງເຂົາເອງ, ຊຶ່ງຊັກຈ່ອງ ແລະ ຫລອກລວງເຂົາໃຫ້ເຮັດຕາມ. ¹⁵ ເມື່ອຄວາມປາຖະນາຊົ່ວຕັ້ງຮາກແລ້ວ, ກໍ່ໃຫ້ເກີດຄວາມຜິດບາບ, ແລະ ເມື່ອຄວາມຜິດບາບໃຫຍ່ຂຶ້ນເຕັມທີ່ແລ້ວ, ກໍ່ໃຫ້ເກີດມີຄວາມຕາຍ. ¹⁶ ພີ່ນ້ອງທີ່ຮັກຂອງເຮົາເອີຍ, ຢ່າໄດ້ຫລົງຜິດໄປເລີຍ. ¹⁷ ຂອງປະທານອັນດີທຸກຢ່າງ ແລະ ຂອງຂວັນອັນປະເສີດທຸກປະການ ຍ່ອມມາຈາກເບື້ອງເທິງ. ສິ່ງເຫລົ່ານັ້ນລົງມາຈາກພຣະບິດາແຫ່ງຄວາມສະຫວ່າງ. ໃນພຣະອົງນັ້ນບໍ່ມີການ ປ່ຽນແປງ ແລະ ບໍ່ມີເງົາເນື່ອງຈາກການຫມູນວຽນ. ¹⁸ ພຣະເຈົ້າເລືອກທີ່ຈະໃຫ້ກໍາເນີດພວກເຮົາ ດ້ວຍພຣະຄໍາແຫ່ງຄວາມຈິງ, ເພື່ອພວກເຮົາຈະເປັນຢ່າງຜົນທຳອິດແຫ່ງສິ່ງທັງຫລາຍທີ່ ພຣະອົງໄດ້ສ້າງ. ¹⁹ ພີ່ນ້ອງທີ່ຮັກເອີຍ, ຈົ່ງຈົດຈຳຂໍ້ນີ້ໄວ້: ໃຫ້ທຸກຄົນວ່ອງໄວໃນການຟັງ, ຊ້າໃນການເວົ້າ, ຊ້າໃນການຮ້າຍ. ²⁰ ເພາະຄວາມຮ້າຍຂອງມະນຸດບໍ່ໄດ້ເຮັດໃຫ້ ຄວາມຍຸດຕິທໍາຂອງພຣະເຈົ້າເກີດມາ. ²¹ ເຫດສະນັ້ນ ຈົ່ງຫລີກຈາກຄວາມຊົ່ວມົວໝອງທຸກຢ່າງ ແລະ ຄວາມຊົ່ວຮ້າຍອັນເຫລືອຫລາຍ. ຈົ່ງນ້ອມໃຈຮັບເອົາ ພຣະຄໍາທີ່ປູກຝັງໄວ້ແລ້ວນັ້ນ, ຈຶ່ງສາມາດຊ່ວຍ ຈິດໃຈຂອງພວກເຈົ້າໃຫ້ພົ້ນໄດ້. ²² ຈົ່ງເປັນຜູ້ປະຕິບັດຕາມພຣະຄໍານັ້ນ ແລະຢ່າເປັນພຽງຜູ້ຟັງ, ພຽງແຕ່ຫລອກລວງຕົວເຈົ້າເອງເທົ່ານັ້ນ. ²³ ສຳລັບຜູ້ໃດ ທີ່ເປັນຜູ້ຟັງພຣະຄໍາແລ້ວ ແຕ່ບໍ່ເຮັດຕາມ, ລາວກໍເປັນດັ່ງຄົນທີ່ແຍງແວ່ນ ເບິ່ງເຫັນຫນ້າຂອງຕົນເອງເທົ່ານັ້ນ. ²⁴ ເຂົາແຍງເບິ່ງຕົນເອງ ແລ້ວກໍອອກໄປ ແລະ ກໍລືມໃນທັນທີນັ້ນໂລດວ່າຕົນເອງເປັນແນວໃດ. ²⁵ ແຕ່ຜູ້ໃດທີ່ພິຈາລະນາເບິ່ງຢ່າງລະມັດລະວັງໃນກົດບັນຍັດ ອັນຄົບຖ້ວນແຫ່ງອິດສະລະພາບນັ້ນ, ແລະ ສືບຕໍ່ປະຕິບັດຕາມ ຕັ້ງຫມັ້ນຢູ່ໃນກົດບັນຍັດຂອງພຣະເຈົ້າ, ບໍ່ແມ່ນພຽງແຕ່ເປັນຜູ້ທີ່ໄດ້ຍິນແລ້ວລືມໄປ, ຄົນນັ້ນແຫລະຈະໄດ້ຮັບພຣະພອນຈາກພຣະເຈົ້າ ໃນສິ່ງທີ່ເຂົາກະທຳ. ²⁶ ຖ້າຜູ້ໃດຄິດວ່າຕົນເປັນຄົນມີສາສະໜາ, ແລະບໍ່ໄດ້ຫ້າມລີ້ນຂອງຕົນ, ຜູ້ນັ້ນກໍຫລອກລວງ ໃຈຕົນເອງເທົ່ານັ້ນ, ແລ້ວສາສະໜາຂອງຜູ້ນັ້ນກໍບໍ່ມີປະໂຫຍດຫມົດ. ²⁷ ສາສະໜານັ້ນບໍຣິສຸດ ແລະ ບໍ່ມີການຊົ່ວມົວຫມອງຕໍ່ໜ້າພຣະເຈົ້າ ແລະພຣະບິດາຂອງເຮົາຄື ການຊ່ວຍເຫລືອລູກກຳພ້າ ແລະ ຍິງໝ້າຍທີ່ມີຄວາມທຸກຍາກລຳບາກ, ແລະ ຮັກສາຕົວໃຫ້ພົ້ນຈາກການຊົ່ວມົວໝອງຂອງທາງໂລກ.