1

¹ Павеллэсь, Иисус Христос понна пытсэт улын пукисьлэсь, но Тимофей братлэсь - милям яратоно Филимон юлтошмылы,

² Апфия яратоно сузэрмылы но Архипп тыршисьмылы но тынад гуртысьтыд черкедлы:

³ асьмелэн Инмар Атаймылэсь но Иисус Христос Кузёмылэсь благодать тӥлед но мир.

⁴ Аслысьтым Инмарме, мон вӧсяськыкум, котьку тау карисько тон понна ,

⁵ кылыса тынад Инмарлы оскемед но Иисус Христосэз но вань святойёсты яратэмед сярысь,

⁶ Вӧсяськисько, миленым ӵошен оскемед тыныд пайда мед сётоз шуыса Иисус Христослэсь котькыӵе ӟечсэ тӥляд тодонады.

⁷ Малыке шуоно ми туж шумпотӥськомы но тынад яратонад буйгатскиськом, уго тынад юрттэменыд, брат, Инмарлы оскисьёслэн сюлэмъёссы буйгазы.

⁸ Соин ик, Христослэн сётэм властеныз мон быгатӥсько тонэ кужмысь косыны - шонер лэсьтыны,

⁹ нош мон пересь Павел, али Иисус Христос понна пытсэт улын пукись, ӟеч гес лэсьто, тонэ яратыса кури ке;

¹⁰ курисько тонэ мынам Онисим пие понна, кудӥз мыным пи луиз пытсэт улын пукыкум:

¹¹ со куке соку кулэтэм вал тон понна, нош али пайда ваёз тыныд но мыным но; мон берен келясько сое тон доры;

¹² нош тон пумита сое мынысьтым сюлэмме кадь.

¹³ Ӟеч Ивор понна пытсэт улын пукыкум, мынам потэ вал воземе сое бордам, тон интые, мыным мед юрттоз шуыса;

¹⁴ нош тынысьтыд юатэк номыре но лэсьтэме уг поты. Уго ӟеч уж лэсьтэмед кужмысь косыса медам луы нош ас мылкыд каременыд мед быдэсмоз.

¹⁵ Но со поди со понна ик вакчи дырлы кошкылӥз тон дорысь, тон мед быгатод шуыса сое дорад басьтыны пыраклы,

¹⁶ нош рабез кадь эн пумита, тросполлы вылӥынгес раблэсь, яратоно братэз кадь. Со дуно мыным, нош тыныд уката но дуногес ужась кадь но, Кузё-Инмар пыртӥ брат кадь.

¹⁷ Соин ик, тон лыдъяськод ке монэ аслыд юлтошеныд, соку дорад басьты сое, монэ кадь.

¹⁸ Нош солэн тон азьын вань ке кыӵе ке но янгышез яке тыронэз, тыронзэ мон вылэ гожты.

¹⁹ Мон, Павел, гожтӥ аслам киыным: мон берыкто тыныд ыштэм; вератэк тынад аслад но мыным ачиныд тыронэд вань шуыса.

²⁰ Озьыен братэ, лэзь монэ Кузё-Инмар понна тынысьтыд пайда поттыны но буйгатыны мынысьтым сюлэмме соин.

²¹ Оскисыса тынад кылзӥськемедлы, гожтӥ тыныд, тодыса, тон лэсьтод троссгес, мынысьтым куремелэсь.

²² Озьы ик дася мыным но улонни инты; малпасько тӥляд вӧсяськеменыды мон ӝоген дорады лыкто.

²³ Ӟечкыла тонэ Епафрас, Иисус Христос понна монэным пукись,

²⁴ озьы ик мынам тыршисьёсы: Марк, Аристарх, Димас но Лука.

²⁵ Асьмелэн Иисус Христос Кузёмылэн благодатез тӥляд духеныды. Аминь.