6

¹ Кызьы тӥ дӥсьтӥськоды, ог огеныды одӥг кыл ке уд быгатӥське шедьтыны, судится кариськыны шонерлыкъя улӥсьтэм адямиос дорын, нош святойёс дорын уд быгатӥське?

² Тӥ уд тодӥське шат, святойёс дуннеез судить карозы шуыса? Нош тӥ кулэ берес дуннеез судить карыны, тӥ уд быгатиське шат сэрттыны-пертчыны чыры-пыры ужъёсты?

³ Тӥ уд тодиське шат, асьмеос судить каромы шуыса ангелъёсты, нош улон пушкысь чыры-пыры ужъёсты сэрттыны-пертчыны ум быгатэ шат?

⁴ Нош тӥляд куке луо улон-вылонады споръяськонъёсты, мыниськоды дуннеысь судьяос доры, кудъёсыз Церкен кусып уг возё.

⁵ Тӥ мед возьдаськоды шуыса верасько: тӥ пӧлын ӧвӧл шат визьнодо адями, кудыз быгатысал судить карыны Инмарлы оскисьёс куспын вожвылъяськонъёсты?

⁶ Нош тӥ сётӥськоды судэ ог огдэс, но тӥледыз судить каро Инмарлы оскисьтэм адямиос.

⁷ Тӥлед возьыт луыны кулэ со, тӥ ог огеныды судится кариськиськоды ни шуыса. Тилед ӟечгес ой-а луысал кыльыны ултӥямен но ыштонъёс чиданы?

⁸ Нош тӥ асьтэос ултӥяськоды но таласькоды асьтэлэн вынъёстылэсь.

⁹ Тӥ уд тодӥське шат землыкез кин уг лэсьты, соос Инмарлэсь Царствозэ наследовать карыны уг быгато? Эн йыромелэ: аземъёс но, идолъёслы йыбырттӥсьёс но, калгисьёс но, пиосмуртъёсын кышноен кадь улӥсьёс но,

¹⁰ лушкаськисъёс но, асьсэлы гинэ пайда поттӥсьёс но, мултэссэ вина юисьёс но, урод кылъёсын вераськисьёс но, муртлэсь таласа басьтӥсьёс но - Инмарлэсь Царствозэ унаследовать уз каре.

¹¹ Нош куд огез тӥ пӧлысь сыӵеесь ик вал, нош тӥ миськемын, освятить но оправдать каремын вал асьмелэн Инмармылэн Духеныз Кузё Инмармылэн Иисус Христослэн нимыз понна.

¹² Мыным котьма лэсьтыны лэземын, нош ваньмыз ик мыным пайда уг сёты, мыным котьма лэсьтыны лэземын, нош номыр но монэным кивалтыны кулэ ӧвӧл.

¹³ Сиён кӧтпуш понна, но кӧтпуш - сиён понна, нош Инмар сойзэ но тайзэ но быдтоз. Мугор кылдытэмын ӧвӧл азыса-калгыса улон понна, нош Кузё Инмар понна, нош Кузё Инмар мугор понна.

¹⁴ Инмар Аслаз кужыменыз кулэмысь улӟытыса ӝутӥз асьмелэсь Кузё Инмармес Иисус Христосэз, озьы ик асьмедыз но кулэмысь улӟытыса ӝуто

¹⁵ Тӥ уд тодӥське шат, тӥляд мугоръёсты Иисус Христослэн мугорызлэн лукетъёсыз луо шуыса? Соку кызьы мон быгато басьтыны Иисус Христослэсьсэ, но сётыны - калгись кышномуртлы?

¹⁶ Яке уд тодӥське тӥ, калгись кышномуртэн кӧлась мурт, соин одӥг мугор луэ шуыса? Шуэмын уго:" Кыкез одӥг мугор луозы",

¹⁷ нош со, кин герӟяське Кузё Инмарлэн, луэ Соин одӥг дух.

¹⁸ Пегӟелэ азон- калгон сьӧлыклэсь, котькыӵе сьӧлыкъёсты адями лэсьтэ-ке, соос уг луо солэн мугорызлы пумит, нош азэ-калге ке, со сьӧлык лэсьтэ аслаз мугорызлы пумит.

¹⁹ Тӥ уд тодӥське шат тӥляд мугорды Святой Духлэн храмез луэ шуыса, Кудыз улэ тӥ пушкын но Кудзэ тӥ басьтӥды Инмарлэсь? Та бере тӥ уд ни луиське кузё асьтэлы.

²⁰ Тӥ дуно дун тырыса басьтэмын.Соин ик данъялэ Инмарэз асьтэлэн мугорады но духады, кудъёсыз Инмарлэн луо.