12

¹ Вынъёсы, кельтэме уг поты тӥледыз, тодытэк духлэн даръёсыз сярысь.

² Тодӥськоды, куке тӥ язычникъёс вал, ветлылӥды вераськыны быгатӥсьтэм идолъёс доры озьы, тӥледыз кинке нуэ кадь вал.

³ Соин ик валэктӥсько тӥледлы, нокин но, Инмарлэн Духеныз вераськись, уг вера проклятие Иисус вылэ, но нокин но уг быгаты вераны Иисусэз Кузёен, куе солэн ӧвӧл Святой Духез.

⁴ Даръёс пӧртэмесь, нош Дух одӥг кадь котьку;

⁵ служениос но пӧртэмесь, нош Кузё Инмар одӥг котьку;

⁶ ужъёс но пӧртэмесь, нош Инмар одӥг котьку, ваньзэ лэсьтэ ваньмызлы.

⁷ Нош котькудызлы сётэ Духлэсь возьматӥськемзэ пайдалы.

⁸ Одӥгезлы Духен сётӥське визьлыко кыл, мукетызлы тодон кыл, со Духен ик;

⁹ мукетызлы оскон, сыӵе ик Духен; мукетызлы катьяны быгатон даръёс, сыӵе ик Духен;

¹⁰ мукетызлы кужым чудоос лэсьтыны, мукетызлы пророчествовать карыны, мукетызлы духъёсты тодманы быгатон, мукетызлы пӧртэм кылъёс, мукетызлы кылъёсты валэктон.

¹¹ Ваньзэ тае лэсьтэ одӥг кадь Дух, висъяса котькудызлы нимысьтыз, кызьы Со кулэ каре.

¹² Уго, кызьы мугор одӥг, но трос люкетъёслэсь луэ, но ваньмыз соос одӥг мугорлэн люкетъёсыз, соос трос ке но, одӥг мугор луо,- озьы ик Христос но.

¹³ Озьы ик ми но одӥг Духен крестится кариськимы одӥг мугор пушкын, Иудейёс но Еллинъёс, рабъёс но свободнойёс, но ваньмыз одӥг Духен сектамын.

¹⁴ Уго мугор уг луы одӥг люкетысь, нош трос люкетъёсысь.

¹⁵ Пыд шуиз ке:" Мон мугорлэн ӧвӧл, ки мон ӧвӧл шуыса", соин сэрен со мугорлэн ӧвӧл шат?

¹⁶ Но пель шуиз ке:" Мон мугорлэн ӧвӧл, мон син ӧвӧл шуыса", соин сэрен со мугорлэн ӧвӧл шат?

¹⁷ Быдэс мугор син ке, соку маин кылзыны? Быдэсэз пель ке, соку маин адӟыны?

¹⁸ Нош Инмар котькуд люкетсэ мугорлэсь пуктӥз озьы, кызьы Со малпаз.

¹⁹ Нош ваньмыз луысалзы ке мугорлэн одӥг люкетэз, соку кытын мугор?

²⁰ Нош табере мугорын трос пӧртэм люкетъёсыз, нош мугор одӥг.

²¹ Син уг быгаты вераны килы:" Тон мыны кулэ ӧвӧл шуыса"; озьы ик йыр но пыдъёслы:"Тӥ мыным кулэ ӧвӧл".

²² Мугорлэн люкетъёсыз, кудъёссэ малпаськом лябесь шуыса, тужгес но кулэесьгес,

²³ но кудъёсэ ми малпаськом мугорын йоно ӧвӧл шуыса, соос сярысь чакласькиськом тросгес;

²⁴ чебер адскисьтэм мугорлэсь люкетъёссэ тужгес но дано дӥсясько, нош синмаськымоноосыз кулэ ӧвӧл дӥсяны. Нош Инмар кылдытӥз мугор, дантэм адскись люкетызлы бадӟымгес сюлмаськон,

²⁵ медаз луы шуыса мугорын висъяськонъёс, ваньмыз люкетъёс ог-огзы сярысь огкадь мед сюлмаськозы шуыса.

²⁶ Соин ик, курадӟе ке мугорлэн одӥгез люкетыз - соин ӵош курадӟё ваньмыз люкетъёсыз; одӥге данъяське ке - соин ӵош шум пото ваньмыз мугорлэн люкетъёсыз.

²⁷ Тӥ но - Христослэн мугорыз, нош нимаз - мугорлэн люкетъёсыз.

²⁸ Инмар пуктӥз черкын, нырысь ик, апостолъёсты, кыкетӥзэ, пророкъёсты, куиньметӥзэ, дышетӥсьёсты; со бере мукетъёсызлы сётӥз кужым чудоос лэсьтыны, озьы ик мукет даръёс: катьян, юрттон, кивалтон, пӧртэм кылъёс.

²⁹ Ваньмыз-а Апостолъёс? Ваньмыз-а пророкъёс? Ваньмыз-а дышетӥсьёс? Ваньмызлэн-а вань кужымзы чудоос лэсьтыны?

³⁰ Ваньмызлэн-а вань катьяны быгатон дарзы? Ваньмыз-а верасько кылъёсын? Ваньмыз-а кылъёсты валэкто?

³¹ Вожъяське бадӟым даръёс понна, но мон возьмато тӥледлы усто сюрес.