10

¹ Вынъёсы, тодытэк кельтэме уг поты тӥледыз, асьмелэн атайёсмы ваньмыз вал шуыса пилем улын, но ваньмыз ортчизы море пыртӥ;

² но ваньмыз крестится кариськизы Моисейлы пилемын но мореын;

³ но ваньмыз сиизы одӥг кадь духовной сиён;

⁴ но ваньмыз юизы одӥг кадь духовной юон, малыке шуоно юизы духовной изысь, кудыз бӧрсязы мынӥз, но со из вал Христос.

⁵ Нош Инмарлы соос ваньмыз ӧз кельше, соин ик соос быдтэмын вал пустыняын.

⁶ Нош со вал милем возьматонъёс, ми медаз йыркуръяське шуыса, кызьы соос йыркуръяськылӥзы.

⁷ Но эн йыбырттэ идолъёслы, кызьы куд огез соос пӧлысь, кудъёсыз сярысь гожтэмын: "Калык пуксиз сиыны но юыны, но султӥз шудыны".

⁸ Ум улэ азон-калгон улонэн, кызьы куд огез улӥзы, со понна соос быризы одӥг нуналэ кызь куинь сюрс.

⁹ Ум эскере Христосэз, кызьы куд огез эскеризы но быризы змеяослэсь.

¹⁰ Роптать эн карелэ, кызьы куд огез соос пӧлысь роптать каризы но быризы быдтӥсьлэсь.

¹¹ Ваньмыз со луиз соосын милем возьматонъёс понна но гожтэмын асьмедыз, берпуметӥ дауръёсын улӥсьёслы валэктыны.

¹² Соин ик, кин малпа, сылэ шуыса, усемезлэсь мед утиськоз.

¹³ Тӥ доры искушение мукетыз ӧз лыкты, адямилэнэз сяна; нош Инмар оскымон, Кудыз уз сёты искусить карыны чидандылэсь бадӟымгес, нош искушение дыръя капчиомон но сётоз, тӥ мед быгатоды шуыса чиданы.

¹⁴ Соин ик, мынам яратоноосы, палэнскэ идолъёслы служить каремлэсь.

¹⁵ Мон тӥледлы валасьёслы кадь верасько; асьтэос тодыны-валаны тыршелэ, мае мон верасько.

¹⁶ Винаен чаша, кудыз понна Инмарлы тау кариськоды, асьмедыз Христослэн Виреныз огазе уг кары шат? Нянь, кудзэ тӥялляськомы, асьмедыз Христослэн Мугорыныз огазе уг кары шат?

¹⁷ Нянь одӥг, асьмеос трос кузя ке но, луиськомы одӥг мугор, малыке шуоно причастится кариськом одӥг няньлэсь.

¹⁸ Израиль калык шоры учкелэ: кудъёсыз сиё жертваосты, ӧвӧл шат жертвенникын пыриськисьёс?

¹⁹ Мар бен верасько мон? Верасько-а, идол яке идоложертвоной мар-ке но луо шуыса?

²⁰ Ӧвӧл, нош язычникъёс, жертва сётыкузы, сёто демонъёслы, нош Инмарлы уг сёто. Нош мон мылкыд уг кариськы, тӥ мед демонъёсын кусып возёды шуыса.

²¹ Уд быгатӥське юыны Кузё Инмарлэсь чашаысьтызы но демонъёслэн чашаысьтызы; уд быгатӥське пыриськыны Кузё Инмарлэн трапезаяз но демонъёслэн трапезаязы.

²² Кузё Инмарлэсь вожзэ поттыны дӥсьтомы шат? Асьмеос Солэсь кужмоесьгес шат?

²³ Мыным котьмар карыны лэземын, нош ваньмыз ик пайда уг сёты; мыным котьмар карыны лэземын, нош ваньмыз ик монэ уг дышеты.

²⁴ Нокин но аслыз пайда медаз утча, нош мукетызлы пайда мед утчалоз.

²⁵ Ваньмыз мар вузаське, сиелэ эскерытэк, кышкатэк совестьтылэсь,

²⁶ малыке шуоно Кузё Инмарлэн музъем но ваньмыз мар вань отын.

²⁷ Инмарлы оскисьтэм адями ӧтиз ке тӥледыз, но тӥляд мынэмды потоз, соку ваньзэ, мае ӝӧк вылэ пуктоз эскерытэк сиелэ, совестьтылэсь кышкатэк.

²⁸ Нош кинке вераз ке, та жертва идолы шуыса, соку, со понна, кин вераз тӥледлы но совестьты понна эн сиелэ.Малыке шуоно Кузё Инмарлэн музъем но ваньмыз мар вань отын.

²⁹ Мон уг вераськы аслам совесте сярысь, нош мукетъёсызлэн, кинъёс лыдъяло сьӧлыкен сиыны та сиёнэз: ма понна мынам свободае судить каремын луыны кулэ муртлэн совестеныз?

³⁰ Мон Инмарлы тау карыса сиисько ке, ма понна пыкылыны кулэ монэ? Мон тау каремысь, шат?

³¹ Озьы бере, сииськоды-ке, юиськоды-ке яке мае-ке мукетсэ лэсьтӥськоды-ке, ваньзэ лэсьт Инмарлэн данэз понна.

³² Уд луэлэ ӵемтон Иудейёслы но, Елинъёслы но, Инмарлэн черкезлы но,

³³ кызьы мон яраны тыршисько ваньмызлы котьма ласянь аслым пайда утчатэк, нош тросэзлы пайда мед луоз шуыса, соослэн спасениезы понна.