1
۱۔ اوُں ویلے کجھ فقیہ تے فریسی یروشلیم تھوں یسوع دے کول آئے۔ اُنہاں نے آکھیا۔
2
۲۔ تیڈے چیلے وڈیاں دی بنائی ہوئی روایات کو کیوں تُڑیندِن کہ تُکر کھاؤن تھوں پہلاں ہتھ نئیں دھوندے؟۔
3
۳۔ یسوع نے جواب اِچ آکھیا وَل تُساں کیوں اپنی روایات کوُں پورا کرن خاطر خداوند دے حکماں کو توڑیندے ہیوے؟۔
4
۴۔کیوں جو خدا نے فرمائے اپنے پیو تے ماں دی عزت کرائے اَتے جیہڑا کوئی اپنے پیو تے ماں دی برائی کریسی اوہ ضرور جان تھوں مارا ویسی۔
5
۵۔ پر تُساں آدھے ہیوے کہ جیہڑا کوُئی اپنے پیو یا ماں کو آکھے جیہڑی مدد تُہاکوُ میڈے کولوُں مِل سگدی ہائی اوہ تاں خدا کوُ ہدیہ دے طور تے ڈے ڈِتی گئی ہِے۔
6
۶۔ اوُں کوُں اپنے پیو دی عزت کرن دی ضرورت نئیں۔ ایویں تُساں تے اپنی روایات نال خدا دے کلام کو رَد کرڈِتے۔
7
۷۔ اَے ریا کارو یسعیاہؔ نے تُہاڈے حق دے وِچ ٹھیک نبوت کیتی ہِے۔
8
۸۔ اے بندے بُلاں نال تاں میڈی عزت کریندِن پر اِنہاں دا دِل میڈے کولوُں دوُر ہِے۔
9
۹۔ اِے بے فائدہ وڈی میڈی تعریف کریندِن کیو جو انسانی حکماں دی تعلیم ڈیندے ہِن۔
10
۱۰۔ وَل اوُں نے بندیاں کوُ اپنے کول سڈایا تے وَل اُنہاں کوُ آکھیا سنو تے سمجھو۔
11
۱۱۔ جیہڑی وی شئے مُنہ اِچ ویندی ہِے اوہ بندے کوُ پلید نئیں کریندی پر جیہڑی مُنہ وِچوں نکلدی ہِے اوُہو بندے کوُ پلید کریندی ہِے۔
12
۱۲۔ وَل یسوع دے چیلے یسوع دے کول آئے تے یسوع کوُ آکھیا کہ کیا توُں جان دا ہئیں کہ فریسی تیڈے جواب کوُلوں بہوُں ناراض ہَن۔
13
۱۳۔اوُں نے جواب ڈِتا ہر اوہ پودا جو میڈے آسمانی باپ نے نئیں لایا جڑ تھوں پَٹ ڈِتا ویسی۔
14
۱۴۔ اُنہاں کوُ چھوڑ ڈیوو۔اوہ اندھے راہ ڈِکھاون آلے ہِن اَتے وَل ہِک اندھا ڈوجھے اندھےکوُ راہ ڈکھاسی تاں اوہ ڈوہیں ٹوئے دے وچ ڈھے پوسن۔
15
۱۵۔ پطرس نے جواب اِچ اوُں کوُ آکھیا اے تمثیل ساکوُں سمجھا ڈے۔
16
۱۶۔ اوں نے آکھیا کیا تُساں ہالی تائیں بے سمجھ ہیوے؟
17
۱۷۔ کیا تُہاکوں نئیں پتہ کہ جیہڑا کجھ منہ ویندا ہِے اوہ ڈِھڈ اِچ ویندے اَتے اوہ گندگی اِچ سٹیا ویندے۔
18
۱۸۔ پر جیہڑیاں گالہیں منہ چوُں نکلدیاں ہِن اوہ دِل دے وِچوں نکلدیاں ہِن تے اوُہو بندے کوُ ناپاک کریندیاں ہِن۔
19
۱۹۔ کیونکہ بُرے خیال۔قتل ۔زِنا۔جنسی بدکاری۔ چوری۔ کوُڑی گواہی۔ بے عزتی دِل وِچوں ای نکلدِن۔
20
۲۰۔ ایہو ای گالہیں ہِن جیہڑیاں بندے کوُ پلید کریندِن پر ہتھ دھوؤن تھوں بغیرکھاؤناں بندے کوُ پلید نئیں کریندا۔
21
۲۱۔ وَل یسوع اُتھوں نکل کے صُور تے صَدا دے علاقاں کوُ لگا گیا۔
22
۲۲۔ اَتے ڈیکھو ہِک کنعانی تریہمت اوُں علاقے دے وچوں نکل کے آئی اَتے اُچی اواز نال آکھیا اَے خداوند ابنِ داؤد میڈے تے رَحم کر۔ میڈی دِھی کوُ ہِک بدروح بہوں تنگ کریندی ہِے۔
23
۲۳۔ پر یسوع نے اوُں کوُ کوُئی جواب نہ ڈِتا اَتے اوُں دے چیلیاں نے اوندی منت کیتی تے آکھن لگے کہ اِیں کوُ اِتھوں گھل چھوڑ کیونکہ اوہ ساڈے پچھوں ڈنڈ مچاندی پئی ہِے۔
24
۲۴۔ اوُں نے جواب اِچ آکھیا میں تاں صرف اسرائیل دیاں گُم تھیاں ہویاں بھیڈاں دے علاوہ بئے کئیں دے کول نئیں گھلیا گیا۔
25
۲۵۔ پر اوُں نے آ کے اوُندے سامنے جھک کےآکھن لگی خداوند میڈی امداد کر۔
26
۲۶۔ اوُں نے جواب اِچ اوُں کوُ آکھیا چھویراں دا ٹکر گِھن کے کُتیاں دے اگوں سٹنا چنگا نئیں۔
27
۲۷۔اوُں نے آکھیا ہاں خداوند کتے وی تاں مالک دی میز تھوں ڈھاون آلے ٹکریاں وچوں کھاندِن جیہڑے اوُں مالکاں دی میز تھوں ڈھاندِن۔
28
۲۸۔ ایندے تے یسوع نے جواب اِچ اوُں کوُ آکھیا اَے تریہمت تیڈا ایمان بہوں وڈا ہِے۔جیویں توں چاہندی ہئیں تیڈے کیتے اوُں وے ہی ہوسی تے وَل اوُندی دھی اوُں ویلے ای چنگی تھی گئی۔
29
۲۹۔ وَل یسوع اُتھوں نکل کے گلیل دی جھیل دے نیڑے لگا گیا اَتے اوہ پہاڑ تے چڑھ گیا تے اُتھائیں بیہہ گیا۔
30
۳۰۔ اَتے ہِک بہوں وڈی بندیاں دی بھیڑ لنگڑے ۔اندھے گونگے۔ تے ٹنڈے اَتے بہوں سارے بیماراں کوُ اپنے نال گھِن کے اوُں دے کول آئی تے انُہاں کوُ یسوع دے پیراں وِچ حاضر چا کیتا یسوع نے اُنہاں کوُں چنگا کیتا۔
31
۳۱۔ جڈاں بھیڑ نے اِے سارا کجھ ڈِٹھا تاں اوہ بہوں حیران تھئےکہ گونگے بولیندِن لنگڑے ٹُردے پھردے ہِن اکھاں تھوں اَنھے ڈیدھِن ھن تاںاُنہاں نے اسرائیل دے خدا کی تعریف کیتی۔
32
۳۲۔ یسوع نے اپنے چیلیاں کوُ سڈایا تے اُنہاں کوُ آکھیا میکوُں ایں بھیڑ تے ترس آندا ہِے کیوں جو اِے میڈے نال ترئے ڈیہواراں تھوں ہِن تے اُنہاں دے کول کھاؤن کیتے کجھ وی نئیں َتے میں اُنہاں کوُ کھاؤن تھوں بِنا گھلنا نئیں چاہندا۔ کتھائیں ایویں نہ تھیوے جواِے راہ اِچ تھک کے رِہ ونجن۔
33
۳۳۔ چلیاں نے اوُں کوُ آکھیا اِیں ویرانے دے وِچ اَساں اتنا سارے بندیاں کوُ رجاؤن کیتے ٹکر کِتھوں گِھن آسوں؟
34
۳۴۔ یسوع نے اُنہاں کوُ آکھیا ،تُہاڈے کول کتنیاں روٹیاں ہِن؟ اُنہاں نے آکھیا سَت اَتے کجھ مچھیاں ہِن۔
35
۳۵۔ اوُں نے بندیاں کوُ زمین تے باہون دا حکم ڈَتا۔
36
۳۶۔ اوُں نے سَت روٹیاں تے مچھیاں کوُ گھِن کے شکر کیتا تے اُنہاں توڑ کے ٹکڑیاں کوُں اپنے چیلیاں کو ڈیندا گیا اَتے چیلے بندیاں کوُ۔
37
۳۷۔ اَتے سارے کھا کے رَج گئے تے وَل جیہڑے ٹکڑے بچ گئے ہَن اوُں دے ست ٹوکرے بھریج گئے۔
38
۳۸۔ اَتے کھاؤن آلے تریہمتاں تے بالاں تھوں علاوہ چار ہزار بندے ہَن۔
39
۳۹۔ وَل اوہ بندیاں کوُ گھل کے کشتی اِچ سوارتھیا تے مگدن دے علاقیاں وِچ آ گیا۔