¹ ۱۔ اَتے اوُں نے تُہاکوُ وی زندہ کیتے جڈاں اپنے قصوراں تے گناہواں دے پاروں مُردہ ہاسے۔ ² ۲۔ جیویں تُساں پہلے ای دُنیا دی چال تے چلدے ہاسے تے ہوا دی عملداری دے حاکم یعنی اوُں روح دے پچھے چلدے ہاسے جیہڑی ہُن نافرمانی دے پُتراں اِچ تاثیر کریندی ہِے۔ ³ ۳۔ اِنہاں وِچوں اساں وی سارے دے سارے پہلے اپنے جسم دی خواہشاں اِچ زندگی گزریندے تے جسم تے عقل دے ارادے پورے کریندے ہاسے تے ڈوجھیاں دی کار طبعی طور تے غضب دے پُتر ہاسے۔ ⁴ ۴۔ پر خدا نے اپنے رَحم دی دولت توں اوُں وڈی محبت دے پاروں جیہڑی اوُں نے ساڈے نال کیتی۔ ⁵ ۵۔ قصوراں دے پاروں جڈاں اساں مُردہ ای ہاسے تاں ساکوُ مسیح دے نال زندہ کیتا۔ (تُہاکوُ فضل دے نال ہی نجات ملی ہِے)۔ ⁶ ۶۔ اَتے مسیح یسوع اِچ شامل کر کے اوُندے نال زندہ کیتا تے آسمانی مقاماں اوُندے نال بِلاہیا۔ ⁷ ۷۔ تاں جو اوہ اپنی اوُں مہربانی دے نال جو مسیح یسوع اِچ ساڈے تے ہِے آون اَلے زمانیاں اِچ اپنے فضل دی بہوں نہایت دولت ڈِکھاوے۔ ⁸ ۸۔ کیونکہ تُہاکوُ ایمان دے وسیلے پاروں فضل نال ہی نجات ملی ہِے اَتے اِے تُہاڈی طرفوں نئیں۔ خدا دی بخشش ہِے۔ ⁹ ۹۔ ایہہ نہ اعمال دے پاروں ہِے تاں جو کوُئی فخر نہ کرے۔ ¹⁰ ۱۰۔ کیومکہ اساں اوُندی ہی کاریگری ہئیں اَتے مسیح یسوع اِچ اُنہاں نیک اعمال دے کیتے مخلوق تھئے جنہاں کوُ خدا نے پہلے توں ساڈے کرن کیتے تیار کیتا ہا۔ ¹¹ ۱۱۔ پس یاد کرو کہ تُساں جو جسم دی رُو نال غیر قوم آلے ہیوے اَتے اوہ لوگ جو جسم اِچ ہتھ دے کیتے ہوئے طہور دے پاروں طہور آلے اکھواندے ہِن تُہاکوُ بغیر طہور آلے آدھے ہِن۔ ¹² ۱۲۔ اگلے زمانے وِچ مسیح کولوں الگ تے اسرائیل دی سلطنت توں خارج تے وعدے دے عہداں توں ناواقف تے نااُمید تے دُنیا اِچ خدا توں جُدا ہاسے۔ ¹³ ۱۳۔ پر تُساں جو پہلے دور ہاوے ہُن مسیح یسوع اِچ مسیح دے خون دے پاروں نیڑے تھی گئے ہیوے۔ ¹⁴ ۱۴۔ کیوں جو اوہو ساڈی صلح ہِے جئیں نے ڈوہاں کوُ ہک کر گِدے اَتے جُدائی دی کندھ کوُ جیہڑی وِچ ہائی ڈھا ڈِتے۔ ¹⁵ ۱۵۔ چنانچہ اوُں نے اپنے جسم دے ذریعے نال دُشمنی یعنی اوہ شریعت جیندے حکم قانونی طور تے ہَن ختم کر ڈِتے تاں جو ڈوہاں کولوں اپنے آپ اِچ ہِک نواں انسان جم کے صلح کرا ڈیوے۔ ¹⁶ ۱۶۔ اَتے صلیب تے دُشمنی کوُ مٹا کے تے اوُندے پاروں ڈوہاں کوُ ہک تن بنا کے خدا نال مِلائے۔ ¹⁷ ۱۷۔ اوُں نے آن کے تُہاکوُ جو دوُر ہاوے اَتے اُنہاں کوُ جیہڑے نیڑے ہَن ڈوہاں کوُ صلح دی خوشخبری ڈِتی۔ ¹⁸ ۱۸۔ کیونکہ اوُندے وسیلے نال اساں ڈوحاں دیہک ای روُح اِچ باپ دے کول پہنچ تھیندی ہِے۔ ¹⁹ ۱۹۔ پس تُساں ہُن پردیسی تے مسافر نئیں راہے بلکہ مُقدساں دے وطن آلے تے خدا دے گھر آلے تھی گئے ہیوے۔ ²⁰ ۲۰۔ اَتے رسولاں تے نبیاں دی بنیاد تے جیندے کونے دے سرے دا پتھر خود آپ مسیح یسوع ہِے تعمیر کیتے گئے ہیوے۔ ²¹ ۲۱۔ اوُندے وِچ ای ہر ہک عمارت مِل مِلا کے خداوند اِچ ہک پاک مقدس بندا ویندا ہِے۔ ²² ۲۲۔ اَتے تُساں وی اوُندے وِچ کٹھے تعمیر کیتے ویندے ہوتاں جو روُح اِچ خدا دا گھر بنو۔