¹ ۱۔ اے میڈے بالو! ایہہ گالیں میں تہاکوں ایں کیتے لکھدا پیاں جو تساں گناہ نہ کرو اَتے اگر کوُئی گناہ کرے تاں پیوُ دے کول ساڈا ہک مدد کرن آلا لاتھے یعنی یسوع مسیح راستباز ² ۲۔ اَتے اوہوُ ساڈے گناہاں دا کفارہ ہِے نہ صرف ساڈے ای گناہاں دا بلکہ سارے جہان دے گناہاں دا وی ³ ۳۔ اگر اساں اوندے حکماں تے عمل کریسوں تاں ایندے نال ساکوں پتا لگسی کہ اساں اوں کوں جان گئے ہاں۔ ⁴ ۴۔ جیہڑا بندا اے آدھے جو میں اوں کوں جان گیا ہاں اَتے اوں دے حکماں تے عنل نئیں کریندا او جھوٹ بولیندا ہِے اَتے اوندے وچ سچائی نئیں ⁵ ۵۔ ہاں جیہڑا اوندے حکماں تے عمل کریندے اوندے وچ سچ مُچ خدا دی محبت کامل تھی گئی ہِے۔ ساکوں اِتھوں پتا لگدے جو اساں اوندے وچ ہئیں ⁶ ۶۔ جیہڑا اے آدھے اوندے وچ قائم ہاں تاں چاہیدا ہِے کہ اے وی اوں دی طرح چلے جیویں او چلدا ہائی۔ ⁷ ۷۔ اے میڈے مترو! میں تہاکوں کوئی نواں حکم نئیں لکھدا پیا بلکہ اوہوُ پرانا حکم جیہڑا مڈھوں تہاکوں مِلا ہائی۔ اے پرانا حکم اوہوُ کلام ہِے جیہڑا تساں سن رکھے ⁸ ۸۔ وَل تہاکوں ہک نواں حکم لکھدا پیا ہاں اَتے اے گال اوندے تے تے تہاڈے تے سچائی نال آندی ہِے کیوں جو اندھارا ختم تھیندا ویندے اَتے اصلی نور چمکنا شروع تھی گئے۔ ⁹ ۹۔ جیہڑا ایہہ آدھے جو میں نور وچ ہاں اَتے اپنے بھرا نال دشمنی رکھیندے اوہ ہالی توڑیں اندھارے وچ ای ہے ¹⁰ ۱۰۔ جیہڑا اپنے بھرا نال محبت رکھیندے اوہ نور وچ راہندے اَتے اوہ تھڈا نہ کھاسی ¹¹ ۱۱۔پر جیہڑا اپنے بھرا نال دشمنی رکھیندا ہے اوہ اندھارے وچ ہِے اَتے اندھارے وچ ای ٹردا ہِے اَتے اے وی نئیں جان دا کہ کِتھاں ویندا ہِے کیوں جو اندھارے نے اوندیاں اکھیاں اندھیاں کر ڈِتئن۔ ¹² ۱۲۔ اے بالو! میں تہاکوں ایں کیتے لکھدا پیاں جو اوندے ناں تھوں تہاڈے گناہ معاف تھئین ¹³ ۱۳۔ اے بزرگو! میں تہاکوں ایں کیتے لکھدا پیاں کہ تساں اوُں کوں شروع تھوں ای جان گئے او۔ اے جوانو! تہاکوں ایں کیتے لکھدا پیاں جو تساں اوُں شرارتی تے غالب آگئے او۔ اے منڈیو میں تہاکوں ایں کیتے لکھا ہِے جو تساں پیوُ کوُ جان گئے ہو ¹⁴ ۱۴۔ اے بزرگو! میں تہاکوں ایں کیتے لکھا ہِے جیہڑا شروع کولوں ہائی اوُں کوں تساں جان گئے ہی وے۔ اے جوانو! میں تہاکوں ایں کیتے لکھا ہِے جو تساں تگڑے تھی گئے او اَتے خدا دا کلام تہاڈے قائم راہندا ہِے۔ اَتے تساں اوُں شریر تے غالب آگئے ہو۔ ¹⁵ ۱۵۔ نہ ایں جہان نال پیار کرو اَتے نہ ای ایں جہان دی شئیاں نال جیہڑیاں ایں جہان وچ ہِن۔ جیہڑا ایں جہان نال پیار کریندے ہے اوندے وچ پیوُ دا پیار کئے نئیں ¹⁶ ۱۶۔ کیونکہ جیہڑا کجھ ایں جہان وچ ہِے یعنی جسم دی خواہش تے اکھیاں دی خواہش تے جندڑی دی وڈیائی او پیوُ دی طرفوں نئیں بلکہ ایں جہان دی طرفوں ہِے ¹⁷ ۱۷۔ اے جہان تے تے ایندی خواہش ڈویں مٹدیاں ویندین پر جیہڑا خدا دی مرضی تے چلدا اے وہ اخیر تک قائم راہسی۔ ¹⁸ ۱۸۔ اے لڑکو! اے آخیری ویلہ ہِے اَتے جیویں تساں سُنا ہِے جو مخالفِ مسیح آؤن آلا ہِے۔ اُندے موافق ہن وی بہوں سارے مخالف مسیح جمے کھڑے ہِن۔ ایں کیتے اساں جان دے ہاں کہ اے آخیری ویلہ ہِے۔ ¹⁹ ۱۹۔ او نکلے تاں ساڈے وچوں ہن پر ساڈے وچوں ہن ناہئیں۔ ایں کیتے کہ اگر ساڈے وچوں ہوؤن ہا تاں ساڈے نال راہون ہا پر نکل ایں کیتے گئے جو اے ظاہر تھی ونجن کہ او ساڈے وچوں نئیں ہن۔ ²⁰ ۲۰۔ اَتے تہاکوں اوُں پاک دی طرفوں مَسح کیتا گئے تے تساں سب کجھ جان دے ہیوے ²¹ ۲۱۔ میں تہوکوں ایں کیتے نئیں لکھے جو تساں سچائی کو نئیں وے جان دے بلکہ ایں کیتے کہ تساں اوُں کوں جان دے ہو اَتے ایں کیتے جو کوُئی جھوٹ سچائی دی طرفوں نئیں۔ ²² ۲۲۔ کون جھوٹا ہِے صرف اوندے جیہڑا یسوع دے مسیح ہوؤن دا انکار کریندے؟ مخالفِ مسیح اؤہو ہِے جیہڑا پیوُ تے پُتر دا انکار کریندے ²³ ۲۳۔ جیہڑا پُتر دا انکار کریندے اوندے کول پیوُ وی نئیں۔ جیہڑا پُتر دا اقرار کریندے اوندے کول پیوُ وی ہِے۔ ²⁴ ۲۴۔ جیہڑا تساں شروع تھوں ہی سُنے اوُہو تہاڈے وچ قائم راہوے۔ جیہڑا تساں شروع تھوں سُنا ہِے اگر او تہاڈے وچ قائم راہوے تاں تساں وی پُتر تے پیوُ وچ قائم راہسو ²⁵ ۲۵۔ اَتے جیہڑا وعدہ اوُں نے ساڈے نال کیتا ہِے او ناؐ ختم تھیؤن آلی حیاتی ہِے ²⁶ ۲۶۔ اے گالیؐ میں تہاکوں اُنہاں دے بارے لکھیاں ہن جیہڑے تہوکوں دھوکا ڈیندین۔ ²⁷ ۲۷۔ اَتے تہاڈا او مَسح جیہڑا اوندی طرفوں کیتا گیا ہا تہاڈے وچ قائم راہندے تے تساں اوندے محتاج نئیں کہ تہاکوں کوُئی سکھاوے بلکہ جیویں او مَسح جیہڑا اوندی طرفوں کیتا گیا ہا تہاکوں ساریاں گالیں سکھاندا ہِے اَتے او سچا ہِے جھوٹا نئیں تے جیویں اوُں نے تہاکوں سکھائے اویں تساں وی اوندے وچ قائم راہندے ہو ²⁸ ۲۸۔ مطلب اے ہِے بالو! اوندے وچ قائم راہو تاں جو جڈا او ظاہر تھیوے تاں ساکوں دلیری ہووے اَتے اساں اوندے آؤن تے اوندے اگے شرمسار نہ تھیوؤں ²⁹ ۲۹۔ اگر تساں جان دے ہیوے جو او رستباز ہِے تاں اے وی جان دے ہوسو کہ جیہڑا رستبازی دے کم کریندا ہِے او اوندے وچوں جمیا ہِے۔