¹ ۱۔ پولس دی طرفوں جیہڑا خدا دی مرضی دے نال یسوع مسیح دا رسول ہوؤن کیتے بلایا گیا اَتے سوستھینس دی طرفوں وی۔ ² ۲۔ خدا دی اوُں کلیسیا دے ناں جیہڑی کُرنتھس اِچ ہِے یعنی اُنہاں سے ناں جیہڑے یسوع مسیح دے وچ پاک کیتے گئے اَتے مقدس بندے ہوؤن کیتے بلائے گئے ہِن اَتے اُنہاں ساریاں دے ناں جیہڑے ہر جاہ ساڈے تے اپنے خداوند یسوع مسیح دا ناں گھن دے ہِن۔ ³ ۳۔ ساڈے پیوُ خدا اَتے خداوند یسوع مسیح دی طرفوں تہاکوُ فضل تے تسلی ملدے راہون۔ ⁴ ۴۔ میں تہاڈے بارے وچ خدا دے اوُں فضل دے پاروں جیہڑا یسوع مسیح وچ تہاڈے تے تھیئے ہمیشہ اپنے خدا دا شکر کریندا ہاں۔ ⁵ ۵۔ جو تساں اوندھے وچ تھی کے ساریاں گالہیں وچ کلام تے علم دی ہر طرح دی دولت تھوں دولت مند تھی گئے ہو۔ ⁶ ۶۔ چنانچہ مسیح دی گواہی تہاڈے وچوں قائم تھئی۔ ⁷ ۷۔ اِتھاں تائیں جو تساں کئیں نعمت اِچ گھٹ نئیں اَتے ساڈے خداوند یسوع مسیح دے ظاہر تھیون دے منتظر ہو۔ ⁸ ۸۔ جیہڑا تہاکوں اخیر تائیں قائم وی رکھیسی تاں جو تساں ساڈے خداوند یسوع مسیح دے ڈِیں بے الزام ٹھہرو۔ ⁹ ۹۔ خدا سچا ہِے جئیں نے تہاکوں اپنے پُتر ساڈے خداوند یسوع مسیح دی سانجھ کیتے بلایا ہِے۔ ¹⁰ ۱۰۔ ہن اے بھراوؤ! یسوع مسیح جیہڑا ساڈا خداوند ہِے اُوندے ناں دے پاروں میں تہاڈی منت کریندا ہاں جو سارے ہکو ای گال آکھو اَتے تہاڈے وچ تفرقے ناں ہوؤن بلکہ سارے مل جُل کے ہک دِل تے ہک رائے تھی کے کامل بنے راہو۔ ¹¹ ۱۱۔ کیوں جو اے بھراوؤ! تہاڈے بارے میکوں خلوے دے گھر آلیاں کولوں پتا لگے کہ تساں وچ جھگڑے تھیندے رِہ ویندِن۔ ¹² ۱۲۔ میڈا اے مطلب ہِے کہ تہاڈے وچوں کوئی تاں اپنے آپ کوُ پولس دا آدھے کوئی اپلوس داکوئی کیفا دا کوئی مسیح دا۔ ¹³ ۱۳۔ کیا مسیح ونڈیج گیئے؟ کیا پولس تہاڈے کیتے مصلوب تھیئے؟ یا تساں پولس دے ناں تے بپتسمہ گِدے؟۔ ¹⁴ ۱۴۔ خدا دا شکر کریندا ہاں جو کِرسپُس تے گیُس دے علاوہ میں تہاڈے وچوں کئیں کوُ بپتسمہ نئیں ڈِتا۔ ¹⁵ ۱۵۔ تاں جو کوُئی ایہہ نہ آکھے کہ تساں میڈے ناں تھوں بپتسمہ گِدے۔ ¹⁶ ۱۶۔ ہاں ستفناس دے گھر آلیاں کوُ وی میں ای بپتسمہ ڈِتے۔ باقی میکوُ پتا کئے نئیں جو میں کئیں بئے کوُ بپتسمہ ڈِتا ہووے۔ ¹⁷ ۱۷۔ کیونکہ مسیح نے میکوں بپتسمہ ڈیون کیتے نئیں گھلے بلکہ خوشی دی خبر سناون کیتے اَتے او وی کلام دی حکمت نال نئیں تاں جو مسیح دی صلیب بے تاثیر نہ تھیوے۔ ¹⁸ ۱۸۔ کیونکہ صلیب دا پیغام ہلاک ہوون آلیاں کیتے بیوقوفی ہِے پر اساں نجات پاون آلیاں کیتے خدا دی قدرت ہِے۔ ¹⁹ ۱۹۔ کیونکہ لکھا لاتھے کہ میں حکیماں دی حکمت کوُ تباہ تے عقلمنداں دی عقلاں کوُ رَد کر ڈیساں۔ ²⁰ ۲۰۔ کتھوں دا حکیم؟ کتھوں دا مولوی؟ کتھوں دا ایں جہان دا بحث کرن آلا؟ کیا خدا نے دُنیا دی حکمت کوُ بیوقوفی نئیں بنا ڈِتے؟ ²¹ ۲۱۔ ایں کیتے کہ جڈاں خدا دی حکمت دے مطابق دُنیا نے اپنی حکمت دے نال خدا کوُ ناں سنجھانے تاں خدا کوُ ایہہ پسند آئے کہ اِیں مُنادی دی بیوقوفی دے وسلیے نال ایمان گھن آون آلیاں کوُ نجات ڈیوے۔ ²² ۲۲۔ چنانچہ یہودی نشان چاہندِن تے یونانی حکمت گوُلیندے وَدے ہن۔ ²³ ۲۳۔ پر اساں اوُں مسیح مصلوب دی مُنادی کریندے ہاں جیہڑی یہودیاں دے نیڑے تھُڈا تے غیر قوماں دے نیڑے بیوقوفی ہِے۔ ²⁴ ۲۴۔ پر جیہڑے بلائے گئے ہن۔ یہودی ہوون یا یونانی۔ اُنہاں دے نیڑے مسیح خدا دی قدرت اَتے خدا دی حکمت ہِے۔ ²⁵ ۲۵۔ کیونکہ خدا دی بیوقوفی بندیاں دی حکمت کولوں ڈھیر حکمت آلی ہِے تے خدا دی کمزوری بندیاں دے زور کولوں ڈھیر زور آلی ہِے۔ ²⁶ ۲۶۔ اَے بھراوؤ! اپنے سڈے جاؤن کیتے نگاہ تاں کرو کہ جسم دے لحاظ نال بہوں سارے حکیم۔ بہوں سارے اختیار آلے بہوں سارے شریف بندے نئیں سڈے گئے۔ ²⁷ ۲۷۔ بلکہ خدا نے دُنیا دے کملیاں کوُ چن گِدے کہ حکیماں کوُ شرمسارکرے اَتے خدا نے دُنیا دے کمزوراں کوُں چن گِدے کہ زور آلیاں کوُ شرمسار کرے۔ ²⁸ ۲۸۔ اَتے خدا نے دُنیا دے کمینیاں تے حقیراں بلکہ بے وجوداں کوُ چن گِدے کہ موجوداں کوُ تباہ کرے۔ ²⁹ ۲۹۔ تاں جو کوُئی بندہ خدا دے سامنے فخر نہ کرے۔ ³⁰ ۳۰۔ پر تساں اوندی طرفوں مسیح یسوع وچ ہو جیہڑا خدا دی طرفوں ساڈے کیتے حکمت ٹھہرے یعنی راستبازی تے پاکیزگی تے مخلصی ³¹ ۳۱۔ تاں جیویں لکھا لاتھے اوویں ہی تھیوے کہ جیہڑا فخر کریندے او خداوند تے فخر کرے۔