¹ ۱۔ میں رات نوں اپنی منجی اُتے اوہنوں لبھیا، جہڑا میری جان دا پیارا اے۔ میں اوہنوں لبھیا پر اوہ نا ملیا۔ ² ۲۔ ہون میں اٹھاں گی اتے شہر وچ پھراں گی گلیاں وچ اتے بازاراں وچ اوہنوں لبھاں گی، جہڑا میری جان دا پیارا اے۔ ³ ۳۔ پہئرا دیئن والے، جہڑے شہر وچ پھردے نیں، مینوں ملے میں اوہناں تھوں پچھیا پئی کیہ تسی اوہنوں ویکھیا، جہڑا میری جان دا پیارا اے؟ ⁴ ۴۔ حالیں میں اوہناں تھوں کجھ اگے ودھی ای ساں پئی میری جان دا پیارا مینوں مینوں مِل گئیا میں اوہنوں پھڑ لئیا اتے اوہنوں نا چھڈیا جدوں تیک پئی میں اوہنوں آپنی ماں دے گھر اتے اپنی ماں دے اُچیچے کمرے وچ نا لے گئی۔ ⁵ ۵۔ ائے یروشلیم دی دھیو! میں تہانوں نِکے ہرناں اتے میداناں دِیاں ہرنیاں دی سونھ دینی آں پئی تسی میرے سوہنے دی نیندر نا وگاڑو۔ جد تیک پئی اوہ آپ نا اٹھنا چاہؤے۔ ⁶ ۶۔ ایہہ کہڑ اے، جہڑا مُر اتے لُوبان نال اتے بیوپاریاں دے عِطر نال لِمبیا ہویا جنگل وچوں دھوئیں دے تھم وانگوں ٹریا آؤندا اے؟ ⁷ ۷۔ ویکھو! ایہہ سلیمان دی بگھی اے جہدے نال اسرائیلی بہادراں وچوں سٹھ پہلوان نیں۔ ⁸ ۸۔ اوہ سبھے تلواری اتے جنگی نیں رات دے جوکھ پاروں ہر اک دی تلوار اوہدے پٹ نال لمکی ہوئی اے۔ ⁹ ۹۔ سلیمان باشاہ نے لبنان دی لکڑیاں نال آپنے جوگی بگھی بنوائی ¹⁰ ۱۰۔ اوہدے ڈنڈے چاندی دے بنوائے اوہدے بیٹھن دی تھاں سونے دی اتے گدی ارغوانی بنوائی اے۔ اتے اوہدے اندر دا فرش یروشلیم دِیا دِھیاں نے آپنے عشق نال سجایا۔ ¹¹ ۱۱۔ ائے صیون دِئیؤ دِھیؤ! باہر نکلو اتے سلیمان بادشاہ نوں ویکھو۔ اوس تاج دے نال جہڑا اوہدی ماں نے اوہدے ویاہ دے دیہاڑے اتے اوہدے دل دی خوشی دے دیہاڑے اوہدے سِر اُتے رکھیا۔