¹ ۱۔ ایہہ یسوع مسیح دا مُکاشفہ اے، جیڑا رب نے اہنوں وکھایا تاں جو جیڑا جیڑا جلدی ہون والا اے اوہنوں اپنے خادماں نوں وکھائے، اوہنے اپنے خادِم یوحنا نوں اپنا فرشتہ بھیج کے ایہہ وکھایا۔ ² ۲۔ یوحنا نے رب دے کلام دی گواہی دتی تے یسوع مسیح دی گواہی دتی تے اوہناں ساریاں شیواں دیاں جو اوہنے وہکھیاں سَن۔ ³ ۳۔ اسی نبوّت نوں اوچی آواز وچ پڑھن والا مُبارک اے، تے اوہ جیڑے ایس نبوّت دے الفاظ نوں سُندے نیں تے اوہ جیڑے ایدھے وچ جو لکھیا اے، اوہ ایدھے تے عمل کردے نیں، کیوں جے وقت نیرےاے۔ ⁴ ۴۔ یوحنا ولّوں ایشیا دی سَت کلیسیاواں نوں، تواڈے تے فضل تے سلامتی ہو وے، اودھے ولّوں جیڑا ہے، جیڑا سی تے جیڑا آن والا اے، تے نالے ستوں روحاں ولّوں جیڑیاں اوہدے تخت دے سامنے نیں، تواڈے اُتے فضل تے سلامتی ہو وئے۔ ⁵ ۵۔ تے یسوع مسیح ولّوں، جیڑا سچا گواہ اے، مُردیاں وچوں پہلا جیون والا ، تے دُنیا دے بادشاہواں دا بادشاہ اے، جیڑا ساہنوں پیار کردا اے تے جنے اپنے خُون نال ساڈے گُناہواں توں چھُڈایا اے۔ ⁶ ۶۔ اوہنے ساڈے لئی اِک راج بنایا اے، تے اپنے رب تے پیو لئی پُجاری وی۔ اوہنو جلال ت قُدرت ہمیشہ لئی مِل دی رہے۔ آمین ⁷ ۷۔ ویکھو، اوہ بدلاں وچوں آرہیا اے، ہر اک اکھ اوہنو ویکھے گی، اوہ سی جِناں اوہنوں چِھیدیا سی، دُنیا دے سارے قبیلے اودہی وجہ نال ماتم کرن گے، بیشک آمین۔ ⁸ ۸۔ رب کہندا اے کے میں الفا تے اومیگا آں، جیڑا ہُن اے، پہلے سی تے جیڑا آن والا اے۔ رب قادر مُطلق۔ ⁹ ۹۔ میں، یوحنا؛ تواڈا بھرا تے یسوع وچ مُصیبتاں تے راج تے صبر نال برداشت وچ تواڈا شریک۔ رب دے کلام تے یسوع دی گواہی دین لئی اک جزیرے تے آں جِدا ناں پیٹھوس اے۔ ¹⁰ ۱۰۔ میں رب دے سِن روح وچ ساں تے اپنے پِچھے اِک نرسنگے وگری اُچی آواز سُنی، ¹¹ ۱۱۔ جِنے کہیا ” تو جو کُجھ وہکھنا اے کتاب وچ لکھ کے تے ستوں کلیسیاؤاں نوں بھیج دے یعنیٰ افسس، سمرنا، پرگمن، تھوتیراہ، سردیس، فلادلفیہ تے لودیکیہ نوں۔ ¹² ۱۲۔ میں منہ پھیریا کہ دیکھاں کے اوُس آواز دا بولن والا کون ہے تے جدوں میں مُڑیا تے میں سونے دے ست چراغ دان وہکھے۔ ¹³ ۱۳۔ تے اُنہاں چراغ داناں دے درمیان آدم زاد (دے وانگر کوئی سی) وہکھیا۔ جہنے سر توں پیراں تک چوغہ پایا ہویا سی تے سونے سا دا سینہ بند (اپنے) سینے تے بنیا ہویا سی۔ ¹⁴ ۱۴۔ اودھا سر تے وال اون بلکہ برف دی طرح چٹّے سن تے اودھیاں اکھاں اگ دے شُعلیاں دے ونگوں سی۔ ¹⁵ ۱۵۔ اودھے پیر پیتل دی طرح چمکدے سی اک بھٹی وچ تپائے گئے پیتل ونگوں سن تے اودھی آواز بہندے ہوئے پانی وانگوں سی۔ ¹⁶ ۱۶۔تے اوہنے سجے ہتھ وط ست تارے پھڑے ہوئے سی تے اودھے منہ وچوں اک تیز دو دھاری تلوار نکلدی سی تے اودھا منہ ایدھا چمکدا سی جیداں چمکدا ہویا سورج۔ ¹⁷ ۱۷۔ جدوں مین اوہنوں وہکھیا تے میں مُردیاں دی طرح اودھے پیراں وچ ڈگ پیا تے اوہنے اپنا سجا ہتھ میرے تے رکیھا تے کہن لگا: ” نہ ڈر، میں ہی پہلا تے آخری آں“۔ ¹⁸ ۱۸۔ میں زندہ آں، میں مر گیا ساں تے ویکھ ہُن میں ہمیشہ تک زندہ زندہ رواں گا تے موت تے جہنم دیاں کُنجیاں میرے کول نیں۔ ¹⁹ ۱۹۔ ایس لئی جیڑیاں گلاں توں وہکھیاں نیں، تے جیڑیاں ہُن نیں، تے جیڑیاں بعد وچ ہون والیاں نیں، اوہناں ساریاں نو لکھ لے۔ ²⁰ ۲۰۔اوہ ست تاریاں دا بھید جیڑے توں میرے سجے ہتھ وچ وہکھے سن تے اوہناں سونے دی چراغ دان، ست تارے ست کلیسیاؤاں دے فرشتے نیں تے ست چراغ دان ست کلیسیاؤاں نیں۔