¹ ۱۔ خدا وند دے ناں دی حمد کرو ۔ اے خدا وند دیو بندیو ! حمد کرو ۔ ² ۲۔ تسیں جیہڑے خدا وند دے گھر وچ ۔ ساڈے خدا دے گھر دی بارگاہواں وچ حاضر رہندے او۔ ³ ۳۔ خدا وند دی حمد کرو کیوں جے خدا وند نیک اے۔ اوہدے ناں دی مدح سرائی کرو پئی ایہہ دل نوں چنگی لگدی اے۔ ⁴ ۴۔ کیوں جو خدا وند نے یعقوب نوں اپنے لئی۔ یعنی اسرائیل نوں اپنی خاص ملکیت ہون لئی چن لتا اے ۔ ⁵ ۵۔ ایس لئی میں جاندا ہاں پئی خدا وند عظیم اے ۔ تے ساڈا مالک سارے معبوداں توں بہت اُچا اے۔ ⁶ ۶۔ خدا وندجو کچھ چاہندا اے اسمان تے زویں تے ۔ یا سمندراں تے ڈوہنگی تھانواں وچ اوہی کردا اے ۔ ⁷ ۷۔ اوہ زویں دی اخیر توں بدل لیاندا اے ۔ اوہ بجلیاں توں مینہ بناندا اے ۔ اوہ اپنے خزانیاں وچوں ہوا کڈھدا اے ۔ ⁸ ۸۔ اوہنے ای مصر دے پلیٹھی دیاں نوں ماریا ۔ کیہ انسان دے کیہ حیوان دے ۔ ⁹ ۹۔ اے مصر ۔ اوہنے تیرے وچ ۔ فرعون تے اوہدے سارے خادماں تے ۔ کرشمے تے عجیب شیواں ظاہر کیتیاں ۔ ¹⁰ ۱۰۔ اوہنے بہت ساریاں قوماں نوں ماریا۔ تے ڈاہڈے بادشاہواں نوں قتل کیتا ۔ ¹¹ ۱۱۔ یعنی شاہ امور بن صیہون نوں ۔ تے شاہ باشان اوج نوں۔ تے کنعان دے سارے بادشاہواں نوں ۔ ¹² ۱۲۔ تے اوہنے اوہناں دی زویں میراث کر دتی ۔ یعنی اپنی امت اسرائیل دی میراث ۔ ¹³ ۱۳۔ اے خدا وند تیرا ناں ابدی اے ۔ اے خدا نسل توں لے کے نسل تیکر تیرا ذکر اے۔ ¹⁴ ۱۴۔ کیوں جو خدا وند اپنی امت دا حامی اے ۔ کیوں جو خدا وند اپنے بندیاں تے مہربان اے ۔ ¹⁵ ۱۵۔ غیر قوماں دے بُت چاندی تے سونا ۔ تے انسان دی دست کاری نیں ۔ ¹⁶ ۱۶۔ اوہناں دا منہ ہے پر اوہ بولدے نہیں ۔ اکھیاں ہین پر اوہ ویکھدے نہیں ۔ ¹⁷ ۱۷۔ کن ہین پر سُندے نہیں ۔ تے اوہناں دے منہ وچ ساہ ہے ای نہیں ۔ ¹⁸ ۱۸۔ جنےاجیہاں نوں دسدے یا اوہناں اُتے وساہ کردے نیں ۔ اوہ سارے اوہناں وانگ ای ہوجان ۔ ¹⁹ ۱۹۔ اے اسرائیل دے گھرانے خدا وند نوں مبارک آکھو ۔ اے ہارون دے گھرانے خدا وند نوں مبارک آکھو۔ ²⁰ ۲۰۔ اے لاوی دے گھرانے خدا وند نوں مبارک آکھو ۔ ²¹ ۲۱۔ صیہون ولوں خدا وند مبارک ہووے ۔ اوہ یروشلیم وچ رہندا اے ۔