¹ ۱۔گیارہویں سال دے تیجے مہینے دی پہلی تاریخ تے خداوند دا کلام میرے تے اُتریا۔ ² ۲۔ اے آدمزاد! مصر دے بادشاہ فرعون نوں تے ایہدے جتھے نوں آکھ تہاڈی شان و شوکت دا دے نال مقابلہ کیتا جاوے ؟ ³ ۳۔اسور ول دھیان کر جہڑا کسے زمانے چ لبنان دا دیار سی ، جس دیان سوہناں شاخاں جنگل چ گوڑھی چھاہ کرکے رکھدیاں سن۔ اوہ بوہت ای اُچا رُکھ سی۔ تے اوس دی چوٹی گھنی تے ہریاں بھریاں شاخاں توں اُتاں نکلی ہوئی سی۔ ⁴ ۴۔پانی نیں اوہدی پالنا کیتی؛ تے ڈونگھیاں چشمیان نیں اوہنوں اُچے قد ولا کر دِتا؛ تے اوہدیاں ندیاں نیں اوہدے دامن دے آسے پاسے وَگدا یاں سن۔ اوہنے اپنیاں نہراں جنگل دے ساریاں رُکھا ں تِک اَپڑادِتیاں ۔ ⁵ ۵۔ ایس لئی اوہدا قد جنگل دے سارے رُکھاں توں اُچا ہو گیا ؛ اوہدیاں ٹاہنیاں ودھ گئیاں تے بوہتیاں پانیاں نال اوہدیاں شاخاں لمیا ں ہوکے پھیلدیاں گئیاں ۔ ⁶ ۶۔ ہوا دے پنچھیاں نےاوہدیاں ٹہنیاں تے آہلنے بنائے سن ۔ تے جنگل دے درندے اہدیاں شاخاں دے بچے جمندے سن ۔ تے وڈیاں وڈیاں قوماں ایہدے سائے چہ وسدیاں سن ۔ ⁷ ۷۔ اوہ اپنیا ں پھیلیاں ہوئیاں ٹہنیاں چہ ویکھن چہ بڑا سوہنا سی ۔ کیوں جو اوہدیاں جڑاں ڈونگیائی وچ بہتیاں پانیاں وچ جا پہنچیاں سن ۔ ⁸ ۸۔ رب دے باغ دے دیار وی اوہدا مقابلہ ناں کر سکے ، ناں ای صنوبر دے رکھ ۔ اوہدیاں ٹہنیاں دی برابری کر سکے ، ناں چناب دے رکھ اوہدیاں شاخاں دا مقابلہ کر سکے ۔ ایتھوں تیک خدا دے باغ دا کوئی رکھ خوبصورتی وچ ایہدا ثانی نئیں سی ⁹ ۹۔میں ایہنوں شاخاں دی کثرت نال سوہنا بنا دتا، ایتھوں تیک پئی عدن دے سارے رکھ جہڑے رب دے باغ چہ سن ایہدے تے رشک کردے سن ۔ ¹⁰ ۱۰۔ ایس لئی رب خداوند اینج فرماندا اے ۔کیوں جو اوہ اچے قد والا بنیا تے اوہنے اپنا سر گھوڑیاں پتیاں وچوں اچا چکیا تے اپنی اوچیا ئی جتے فخر کرن لگا ، ¹¹ ۱۱۔ ایس لئی میں اوہنوں دوجیاں قوماں دے حکمراناں دے حوالے کر دتا ۔تاں جو اوہ ایہنوں اپنی شرارت دا ٹھیک ٹھیک بدلہ دیوے تے میں ایہنوں لانبھے کر دتا ۔ ¹² ۱۲۔ تے بوہت ڈرائونیا ں پردیسی قوماں نے ایہنوں وڈھ چھڈیا ۔ اوہددیاں ٹہنیاں پہاڑاں دے ساریاں وادیاں چہ ڈگ پئیاں تے اوہدیاں شاخاں ٹٹ کے دیس دے سارےنالیاں چہ نکھڑ گئیاں تے ساری دھرتی دی ساریاں قوماں ایہدے سائے توں نکل کے اوہنوں چھڈ کے ٹر گئیاں۔ ¹³ ۱۳۔ ہوا دے ساریاں پنچھیاں نے ایہدے ٹٹے ہوئے تنے تے بسیرا کیتا تے کھیت دے درندیاں نے اوہدیاں شاخاں چہ قیام کیتا ۔ ¹⁴ ۱۴۔ ایس لئی پانی دے کنڈے دے رکھاں وچوں کوئی رکھ کدے وی اپنا سر گھنیاں ٹہنیا ں توں اتاں چک کے اپنی اوچیائی تے گھمنڈ ناں کرے تے رکھ جہڑے بہتیاں پانیاں چہ ہون کدی ایہنے بلند ناں ہون نئیں تاں اوہ سارے موت دے حوالے کیتے جان گے ۔ تاں جو اوہ پاتال چہ اترن والے لوکاں دے نال زمین دے ہیٹھاں جا ملن ۔ ¹⁵ ۱۵۔ رب خداوند اینج فرماندا اے ۔جس دن ایہنوں قبر چہ اتاریا گیا میں ایہناں دی خاطر ڈھونگے چشمیاں نوں تہاڈے توں لکا دتا ۔ اوہدیاں ندیاں نوں روکی رکھیا تے ایہناں دے ہڑ نوں روک لیا ایس وجہ توں میں لبنان تے اداسی طاری کیتی تے کھیتاں دے سارے رکھ ادھموویں ہو گئے ۔ ¹⁶ ۱۶۔ جہدوں میں اوہنوں کھڈے چہ جان والیاں دے نال قبر چہ پایا تے اوہناں دے دگن دے شور نال میں قوماں نوں لرزا دتا ۔تد عدن دے سارے رکھاں نے یعنی لبنان دے چیدہ تے بہت چنگے رکھاں نے جہڑے بوہت پانی دے علاقیاں وچ سن زمین دے ہیٹھاں تسلی پائی ۔ ¹⁷ ۱۷۔ جہڑے ایہدے سائے چہ وسدے سن تے جہڑے دوجیاں قوماں چہ ایہدے یار سن اوہ وی ایہدے نال قبر چہ چلے گئے تے ایہناں نال رل گئے جہڑے تلوار نال مارے گئے سن ۔ ¹⁸ ۱۸۔ شان و شوکت تے عظمت و جلال چہ عدن دے کن پیڑیاں دا تیرے نال موازنہ کیتا جا سکدا اے؟ پر تو ویں عدن دے تے رکھاں دے نال زمین چہ اتاریاں جاویں گا تے اوتھے توں تلوار نال مارے ہوئے نامختوناں دے نال پئیاں رہویں گا۔ ایہی فرعون تے اوہدے سارے جتھے دا اخیر اے ۔ ایہہ رب خداوند نے فرمایا اے۔