¹ ۱۔ جد توں رب دے گھر نوں جاویں، تاں ادب نال پیر رکھ۔کیوں جو ہدایت پاؤن جوگی جاؤنا، احمقاں ورگے ذبیحے چاڑھن نالوں چنگا اے۔ ایس لئی پئی اوہ نئیں سمجھدے پئی بدی کردے نیں۔ ² ۲۔ کُؤن وچ کالھ نا کر اتے تیرا دل چھیتی نال رب دے حضور کجھ نا آکھے۔ کیوں جو رب اسمان اُتے اے اتے توں دھرتی اُتے۔ ایس لئی تیریاں گلاں ڈھائی فٹ ہؤن۔ ³ ۳۔ کیوں جو چوکھے کم پاروں سُفنے ویکھے جاندے نیں، اتے احمق دی واج چوکھیاں گلاں وچ اے۔ ⁴ ۴۔ جد توں رب جوگی منت منیں تاں اوہدے ادا کرن وچ دیری نا کر کیوں جو اوہ احمقاں تھوں خوش نئیں اے۔ توں آپنی منت نوں پورا کر۔ ⁵ ۵۔ تیرا منت نا مننا ایس تھوں چنگا اے پئی توں منت منیں اتے فیر اوہنوں پورا نا کریں۔ ⁶ ۶۔ تیرا مونھ تیرے جُسے نوں گناہی نا کرے اتے فرشتے دے حضور نا آکھ پئی بھُل بھلیکھا سی۔ رب تیری واج نال کیوں اُکے اتے تیرے ہتھاں دا کم برباد کرے؟ ⁷ ۷۔ کیوں جو چوکھے سُفنے اتے جھوٹ چوکھیاں گلاں پاروں ہوندے نیں۔ پر توں رب تھوں ڈر۔ ⁸ ۸۔ جیکر توں دیس وچ ماتڑاں نوں مظلوم اتے عدل اتے انصاف نوں گواچیا ویکھیں، تاں حیران نا ہؤیں۔ کیوں جو اک وڈیاں نالوں وڈا اے، جہڑا نگاہ کردا اے اتے کوئی ایہناں سبھناں نالوں وی وڈا اے۔ ⁹ ۹۔ دھرتی دا حاصل سبھناں جوگی اے۔ سگوں واڈھی نال بادشاہ دا وی کم نکلدا اے۔ ¹⁰ ۱۰۔ زر دا یار روپئے نال نئیں رجے گا اتے دولت دی لوبھ رکھن والے دا ڈڈھ اوہدے ودھن نال نئیں بھرے گا۔ ایہہ وی جھوٹ اے۔ ¹¹ ۱۱۔ جد مال چوکھا ہوندا اے تاں اوہدے کھاؤن والے بہتیرے ہو جاؤندے نیں اتے اوہدے مالک نوں نِرا ایس دے پئی اوہنوں آپنی اکھاں نال ویکھے، ہور کیہ فیدا اے؟ ¹² ۱۲۔ محنتی دی نیندر مِٹھی اے۔ بھانویں اوہ تھوڑا کھاؤے بھانؤیں بہتا۔ پر چوکھی دولت بندے نوں سؤن نئیں دیندی۔ ¹³ ۱۳۔ اک وڈی بلا اے جنہوں میں جگ اُتے ویکھیا۔ مطلب دولت۔ جنہوں اوہدا مالک آپنے نقصان جوگی رکھ چھڈدا اے۔ ¹⁴ ۱۴۔ اتے اوہ مال کسے بھیڑے حادثے نال برباد ہوندا اے اتے جیکر اوہدے گھر پُتر جمدا اے تاں اوس ویلے اوہدے ہتھ وچ کجھ نئیں ہوندا۔ ¹⁵ ۱۵۔ جیویں اوہ آپنی ماں دے ڈڈھوں نکلیا اونویں ننگا جیویں پئی آیا سی فیر جاؤے گا اتے آپنی محنت دی اجرت وچوں کجھ نا لیجاؤے گا۔ ¹⁶ ۱۶۔ اتے ایہہ وی وڈی بلا اے پئی ٹھیک جیویں اوہ آیا سی، اونویں ای جاؤے گا اتے اوہنوں ایس فضول محنت وچوں کیہ فیدا؟ ¹⁷ ۱۷۔ اوہ سبھے حیاتی بے چینی وچ کھاندا اے اتے اوہدے دکھ دا انت نئیں۔ ¹⁸ ۱۸۔ لؤ! میں ویکھیا پئی ایہہ چنگا اے سگوں سوہنا اے پئی بندہ کھاؤے اتے پیؤے اتے آپنی سبھے محنت نال جہڑی اوہ جگ وچ کردا اے، آپنی سبھے حیاتی جہڑی رب نے اوہنے بخشی اے، مزہ لؤے۔ کیوں جو اوہدا حصا ایہو ای اے۔ ¹⁹ ۱۹۔ ایس تھوں ودھ کے ہر اک بندہ، جنہوں رب نے مال بخشیا اتے اوہنوں توفیق دِتی پئی اوہدے وچوں کھاؤے اتے آپنا حصالؤےاتے آپنی محنت نال خوش رہؤے۔ ایہہ تاں رب دی بخشیش اے۔ ²⁰ ۲۰۔ اخیر اوہ آپنی حیاتی دے دیہاڑیاں نوں چوکھا یاد نا کرے گا۔ ایس لئی پئی رب اوہدی خوش دلی دے موافق اوہدے نال سلوک کردا اے۔