¹ ۔ تے سبا دی ملکہ نے سلیمان دی مشہوری سنی ۔ تاں اوہ اوکھیاں بجھارتاں نال سلیمان نوں آزماون لئی یروشلیم وچ وڈے اکٹھ نال آئی تے اوہدے نال خوشبوواں تے بہت سارے اونٹھ سونے تے قیمتی پتھراں نال لدے ہوئے سن تے اوہ سلیمان دے کول آئی تے سارا کچھ جیہڑا اوہدے دل وچ سلیمان بارے سی اوہنے اوہدے نال گلاں کیتیاں ۔ ² ۔ تاں سلیمان نے اوہدے لئی اوہدیاں ساریاں گلاں دی تشریح کیتی ۔ تے سلیمان کولوں کوئی شے لکی ہوئی نہیں سی ۔ جہد ی اوہنے اوہدے نال گل نہ کیتی ۔ ³ ۔ تے سبا دی ملکہ نے سلیمان دی سیانپ نوں تے گھر نوں جیہڑا اوہنے بنایا سی ۔ ⁴ ۔ تے اوہدے دستر خوان دا کھانا تے اوہدے نوکراں دے کوٹھے تے اوہدے خادماں دی رہائش تے اوہناں دا لباس تے اوہدے جام چکن آلیاں نوں تے اوہدی پوڑھی نوں جہدے نال اوہ خدا وند دے گھر جاندا سی ویکھیا ۔ تاں اوہدے وچ جان نہ رہی ۔ ⁵ ۔ تے اوہنے بادشاہ نوں آکھیا ۔ ایہہ خبر سچ سی ۔ جیہڑے میں اپنے دیس وچ تیرے عملاں تے تیری سیانپ بارے سنی سی ۔ ⁶ ۔ تے جو کچھ مینوں آکھیا گیا ۔ میں اوہدا یقین نہ کیتا جدوں تیکر پئی میں آپ نہ آئی تے اپنی اکھاں نال نہ ویکھیا ۔ تے ویکھ تیری وڈی سیانپ دی مینوں ادھی خبر وی نہیں سی دتی گئی ۔ کیوں جو توں اُس خبر نالوں ودھیک ایں جیہڑی میں سنی سی ۔ ⁷ ۔ مبارک نیں تیرے لوک مبارک نیں تیر خادم جیہڑے نت تیرے ساہمنے کھلو کے تیری سیانپ سندے نیں ۔ ⁸ ۔ مبارک ہووے خدا وند تیرا خدا جیہڑا تیتھوں خوش اے ۔ تے جنہے تینوں اپنے تخت تے خدا وند تیرے خدا لئی بادشاہ ہون نوں بٹھایا۔ کیوں جو اسرائیل نال تیرے خدا دی محبت ہون دے کارن تاں جو اوہناں نوں ابد تک قائم رکھے اوہنے تینوں اوہناں تے بادشاہ متھیا ۔ تاں جو توں نیاں تے عدالت جاری کریں ۔ ⁹ ۔ تے اوہنے بادشاہ نوں اک سو ویہہ قنطار سونا تے بہت ساریاں مُشکاں تے قیمتی پتھر دتے ۔ تے اجیہاں مُشکاں کدی نہ ہویاں جیویں دیاں سبا دی ملکہ نے سلیمان بادشاہ نوں دتیاں ۔ ¹⁰ ۔ تے حیرام دے خادم تے سلیمان دے خادم جیہڑے اوفیر توں سونا لیاندے سن ۔ صندل دیاں لکڑاں تے قیمتی پتھر لیائے ۔ ¹¹ ۔ تاں بادشاہ نے خدا وند دے گھر لئی تے بادشاہ دے گھر لئی صندل دی لکڑ دیاں پوڑھیاں تے گان آلیاں لئی بربطاں تے ونجھلیاں بنوائیاں تے یہودہ دے دیس وچ اُس وانگوں کدی نہیں ویکھیا گیا ۔ ¹² ۔ تے سلیمان بادشاہ نے سبا دی ملکہ نوں اوہ سب کچھ دتا جیہڑا اوہنے چاہیا تے منگیا ۔ تے اوہدے توں وی ودھ جو اوہ بادشاہ کول لیائی سی ۔ تد اوہ تُر گئی ۔ تے سنے اپنے خادماں دے اپنے دیس نوں چلی گئی ۔ ¹³ ۔ تے جیہڑا سونا سلیمان کول ہر ورھے آوندا سی اوہدا وزن چھ سو چھیاٹھ مثقال سی ۔ ¹⁴ ۔اوہنوں چھڈ کے جیہڑا سوداگراں تے تاجراں کولوں ملدا ۔ تے جیہڑا عرب دے سارے بادشاہ تے زمین دے حاکم سلیمان لئی سونا تے چاندی لیاندے سن ۔ ¹⁵ ۔ تاں سلیمان بادشاہ نے گھڑے ہوئے سونے دے دو سو بھالے بنوائے ۔ ہر اک بھالا چھ سو مثقال گھڑے ہوئے سونے دا سی ۔ ¹⁶ ۔ تے تن سو ڈھالاں گھڑے ہوئے سونے دیاں بنوائیاں ۔ اک ڈھال تن سو مثقال سونے دی سی ۔ تے بادشاہ نے اوہناں نوں لبنان دے محل وچ رکھا ۔ ¹⁷ ۔ تے بادشاہ نے اک وڈا تخت ہاتھی دند دا بنوایا ۔ تے اوہنوں خالص سونے نال مڑھیا ۔ ¹⁸ ۔ تے تخت دیاں چھ پوڑھیاں سن ۔ سنے اک ساری سونے دی چوکی دے جیہڑی تخت نال لگی ہوئی سی تے بیٹھن دی تھاں دوہاں پاسے ادھر اودھر دو ٹیکن (سہارے)سن ۔ تے دو شیر دوہاں ٹیکناں کول کلھلوتے ہوئے سن ۔ ¹⁹ ۔ تے بارہ شیر پوڑھیاں کول کھلوتے ہوئے سن ۔ چھ ایس پاسے تے چھ اُس پاسے ۔ ساریاں بادشاہیاں وچ اُس وانگوں نہ بنیا ۔ ²⁰ ۔ بادشاہ دے سارے پین دے بھانڈے سونے دے سن ۔ تے لبنان دے محل دے سارے بھانڈے خالص سونے دے سن ۔ اوہناں وچ چاندی نہیں سی ۔ کیوں جو اوہ سلیمان دے دناں وچ کوئی شے نہیں سمجھی جاندی سی ۔ ²¹ ۔ ایس لئی پئی بادشاہ دے جہاز حیرام دے خادماں نال تن ورھیاں وچ اک وار ترشیش نوں جاندے تے اوتھوں سونا چاندی تے ہاتھی دند تے بندر تے مور لاندے سن ۔ ²² ۔ تے سلیمان بادشاہ دولت تے سیانپ وچ زویں دے سارے بادشاہواں توں ودھ گیا ۔ ²³ ۔ تے زویں دے سارے بادشاہ سلیمان دا منہ ویکھن دے چاہوان سن ۔ تاں جو اوہدی سیانپ نوں سنن جیہڑی خدا نے اوہدے دل وچ پائی سی ۔ ²⁴ ۔ تے ہر اک اپنے اپنے ہدیے چاندی دے بھانڈے تے سونے دے بھانڈے تے کپڑے تے ہتھیار تے مُشکاں تے گھوڑے تے خچراں ورھیاں بدھی لیاندا سی ۔ ²⁵ ۔ تے سلیمان دے گھوڑیاں تے گڈیاں لئی چار ہزار اصطبل سن ۔ تے بارہ ہزار سوار سن ۔ تاں اوہنے اوہناں نوں گڈیاں دے شہراں وچ تے بادشاہ دے نیڑے یروشلیم وچ رکھیا ۔ ²⁶ ۔ تے اوہ دریا توں لے کے فلسطینیاں دے دیس تیکر تے مصر دی حد تیکر سارے بادشاہواں تے بادشاہی کردا سی ۔ ²⁷ ۔ تے بادشاہ نے یروشلیم وچ چاندی نوں وٹیاں وانگ کر چھڈیا۔ تے دیودار دی لکڑ نوں گولر وانگ جیہڑا رڑے تے بہت زیادہ ہوندا اے ۔ ²⁸ ۔ تے سلیمان لئی مصر توں تے سارے دیساں توں گھوڑے لیائے جاندے سن ۔ ²⁹ ۔ تے سلیمان دا پہلا تے پچھلا حال کیہ ایہہ ناتان نبی دی تاریخ ۔ تے احی یاہ شیلونی دی نبوت ۔ تے یار بعام بن نباط دے بارے عدو غیب بین دیاں رویاواں وچ لکھیا ہویا نہیں ؟ ³⁰ ۔ تے سلیمان نے یروشلیم وچ سارے اسرائیل تے چالہی ورھے بادشاہی کیتی ۔ ³¹ ۔ تے سلیمان اپنے پیو دادے نال سوں گیا ۔ تے اپنے پیو دائود دے شہر وچ دفن ہویا ۔ تے اوہدا پتر رجعام اوہدی تھاں بادشاہ بنیا ۔ ²⁹ ۔ تے سلیمان دا پہلا تے پچھلا حال کیہ ایہہ ناتان نبی دی تاریخ ۔ تے احی یاہ شیلونی دی نبوت ۔ تے یار بعام بن نباط دے بارے عدو غیب بین دیاں رویاواں وچ لکھیا ہویا نہیں ؟ ³⁰ ۔ تے سلیمان نے یروشلیم وچ سارے اسرائیل تے چالہی ورھے بادشاہی کیتی ۔ ³¹ ۔ تے سلیمان اپنے پیو دادے نال سوں گیا ۔ تے اپنے پیو دائود دے شہر وچ دفن ہویا ۔ تے اوہدا پتر رجعام اوہدی تھاں بادشاہ بنیا ۔