¹ ۔ جدوں سلیمان نے دعا ختم کیتی ۔ تاں اسمان توں اگ لتھی ۔ تے سوختنی قربانی تے ذبیحاں نوں کھا گئی ۔ تے گھر خدا وند دے جلال نال بھر گیا ۔ ² ۔ تاں کاہن خدا وند دے گھر وچ نہ وڑ سکے ۔ کیوں جو خدا وند دے جلال نے خدا وند دے گھر نوں بھر دتا سی ۔ ³ ۔ تے سارے بنی اسرائیل نے اگ دا لِہنا تے گھر تے خدا وند دا جلال ویکھیا ۔ تاں اوہ اپنے منہ بھرنے زویں تیکر فرش تے ڈگے تے سجدہ کیتا تے آکھیا " خدا وند دی ستائش کرو کیوں جو اوہ نیک اے کیوں جو اوہدی رحمت ابد تیکر اے ۔" ⁴ ۔ تد بادشاہ تے ساریاں لوکاں نے خدا وند دے اگے ذبیحے کوہے ۔ ⁵ ۔ تے سلیمان بادشاہ نے باوی ہزار بلد تے اک لکھ ویہہ ہزار بھیڈاں دی قربانی کیتی ۔ تے بادشاہ نے تے سارے لوکاوں نے خدا دے گھر دی تقدیس کیتی ۔ ⁶ ۔ تے کاہن اپنی سیوا لئی کھلوتے سن تے لادی وی خدا وند لئی اوہناں واجیاں دے نال جیہڑے دائود نے بنائے سن ۔ تاں جو ایہہ راگ وجاون ’’ خدا وند دی ستائش کرو ۔ کیوں جو اوہدی رحمت ابد تیکر اے۔ ‘‘ تے اپنی خدمت گزاری لئی اوہ خدا دا گیت گاندے سن ۔ تے کاہن اوہناں اگے نرسنگے پھوکدے رہے ۔ تے سار اسرائیل کھلو گیا ۔ ⁷ ۔ تے سلیمان نے ویہڑے دے وچکار دی تقدیس کیتی ۔ جیہڑا خدا وند دے گھر دے اگے سی ۔۔ کیوں جو اوہنے سوختنی قربانیاں تے سلامتی دے ذبیحاں دی چربی نوں اوتھے چاڑھانا سی ۔ ایس لئی پئی پتل دا مذبح جیہڑا سلیمان نے بنایا سی ۔ سوختنی قربانیاں تے نذر دیاں قربانیاں تے چربیاں دی گنجائش نہیں سی رکھدا ۔ ⁸ ۔ تے اوس ویلے سلیمان نے ست دن عید کیتی تے اوہدے نال سارے اسرائیل دی حمات دے دروازے توں لے کے مصر دی ترائی تیکر دی بہت وڈی جماعت سی ۔ ⁹ ۔ تے اٹھویں دن اوہناں نے محفل کیتی ۔ کیوں جو اوہناں نے ست دن تیکر مذبح دی تقدیس کیتی ۔ تے ست دن دی عید کیتی سی ۔ ¹⁰ ۔ ایس لئی ستویں مہینے دے تریویئیں دیہاڑے اوہنے لوکاں نوں اپنے اپنے تنبواں ول گھلیا ۔ اوہ سارے اوس نیکی دے کارن خوش تے شاد سن جیہڑی خدا وند نے دائود تے سلیمان تے اپنے لوکاں اسرائیل نال کیتی ۔ ¹¹ ۔ تے سلیمان خدا وند دے گھروں تے بادشاہ دے گھروں ویہلا ہویا ۔ تے جو کچھ سلیمان دے دل وچ سی پئی خدا وند دے گھر وچ تے اپنے گھر وچ بنائے اُس وچ کامیاب ہویا ۔ ¹² ۔ تے رات ویلے خدا وند سلیمان تے ظاہر ہویا ۔ تے اوہنے آکھیا پئی میں تیری دعا سنی اے ۔ تے میں اس تھاں نوں اپنے لئی ذبیحے دا گھر چن لتا اے ۔ ¹³ ۔ جے میں اسمان نوں بند کراں پئی مینہ نہ ہووے ۔ یا ٹڈی نوں زویں دے کھا جان دا حکم دیاں ۔ یا وبا اپنے لوکاں وچ گھلاں ۔ ¹⁴ ۔ تاں جے میرے لوک جنہاں تے میرا ناں لتا جاندا اے عاجزی کرن تے دعا منگن تے میرے منہ نوں ڈھونڈن ۔ تے اپنیاں راہواں توں پھرن ۔ تاں میں اسمان توں سناں گا ۔ تے اوہناں دے گناہ بخشاں گا تے اوہناں دے ملک نوں شفا دیاں گا۔ ¹⁵ ۔ تے ہن اُس دعا تے جیہڑی اس تھاں تے منگی جائے گی میریاں اکھاں کھلیاں تے میرے کن دھیان دین گے ۔ ¹⁶ ۔ تے میں ایس گھر نوں چن لتا اے ۔ تے ایہنوں پاک کیتا اے ۔ تاں جو میرا ناں ایس وچ ابد تیکر رہوے ۔ تے میریاں اکھاں تے میرا دل سارے دن ایتھے ہون گے ۔ ¹⁷ ۔ توں میرے اگے اُس وانگ چلیں جیویں کہ تیرا پیو دائود چلیا ۔ تے جو کچھ میں تینوں حکم دتا اے۔ اُس تے عمل کریں تے میرے قانوناں تے حکماں نوں منیں ۔ ¹⁸ ۔ تاں میں تیری بادشاہی دا تخت برقرار رکھاں گا ۔ جیویں کہ میں تیرے پیو دائود نال عہد کر کے آکھیا ۔ پئی تیرے لئی تیری نسل وچوں مرد دا گھاٹا نہیں ہووے گا جیہڑا اسرائیل تے حکومت کرے ۔ ¹⁹ ۔ پر جے تسیں کھلر جائو تے میرے قانوناں تے حکماں نوں چھڈ دیو جیہڑے میں تہاڈے ساہمنے رکھے نیں ۔ تے جاکے اوپرے معبوداں دی پر ستش کرو تے اوہناں نوں سجدہ کرو ۔ ²⁰ ۔ تاں میں اوہناں نوں اُس دیس توں پٹ دیاں گا ۔ جیہڑا میں اوہناں نوں دتا ۔ تے ایس گھر نوں جیہڑا میں اپنے ناں لئی پاک کیتا اے ۔ اپنے کولوں دور کراں گا ۔ تے اوہنوں مثال تے ساریاں قوماں وچ نمونہ کراں گا ۔ ²¹ ۔ تے ایہہ گھر جیہڑا اجیہا علی شان اے عبرت دی تھاں ہووے گا ۔ تے جیہڑا وی ایہدے کولوں لنگھے گا حیران ہووے گا۔ تے آکھے گا خدا وند نے ایس دیس تے ایس گھر نال انج کیوں کیتا اے ۔ ²² ۔ تاں جواب دتا جائے گا ۔ کیوں جو اوہناں نے خدا وند اپنے پیو دادے دے خدا نوں جیہڑا اوہناں نوں مصر دے دیس تو کڈھ کے لیا یا چھڈ دتا ۔ تے اوپرے معبوداں نوں منیا تے اوہناں نوں سجدہ کیتا ۔ تاں ایس لئی اوہنے ایہہ ساریاں بلاواں اوہناں اُتے گھلیاں۔ ²¹ ۔ تے ایہہ گھر جیہڑا اجیہا علی شان اے عبرت دی تھاں ہووے گا ۔ تے جیہڑا وی ایہدے کولوں لنگھے گا حیران ہووے گا۔ تے آکھے گا خدا وند نے ایس دیس تے ایس گھر نال انج کیوں کیتا اے ۔ ²² ۔ تاں جواب دتا جائے گا ۔ کیوں جو اوہناں نے خدا وند اپنے پیو دادے دے خدا نوں جیہڑا اوہناں نوں مصر دے دیس تو کڈھ کے لیا یا چھڈ دتا ۔ تے اوپرے معبوداں نوں منیا تے اوہناں نوں سجدہ کیتا ۔ تاں ایس لئی اوہنے ایہہ ساریاں بلاواں اوہناں اُتے گھلیاں۔