¹ ۔ تے رجعام یروشلیم وچ آیا ۔ تے اوہنے یہودہ تے بنیامین دے گھرانیاں وچوں اک لکھ اسی ہزار متھے ہوئے جنگی مرد کٹھے کیتے ۔ تاں جو اوہ اسرائیل نال لڑائی کرن تے بادشاہی فیر رجعام دے قبضے وچ کر دین ۔ ² ۔ تے خدا وند مرد خدا شمع یاہ نال ہم کلام ہویا تے آکھیا ۔ ³ ۔ پئی شاہ یہودہ رجعام بن سلیمان نوں تے یہودہ تے بنیامین وچوں سارے اسرائیل نال کلام کر کے آکھ دے ۔ ⁴ ۔ خدا وند انج فرماندا اے پئی تسیں چڑھائی نہ کرو تے اپنے بھراواں نال نہ لڑو ۔ تے ہر اک بندہ اپنے گھر نوں تُر جائے ۔ کہ ایہہ امر میرے ولوں ہویا اے ۔ تاں اوہ خدا وند دے کلام دے سنن آلے ہوئے تے یار بعام تے چڑھائی کرن توں رُک گئے ۔ ⁵ ۔ تے رجعام یروشلیم وچ رکیا ۔ تے یہودہ وچ چوکندھی آلے شہر بنوائے ۔ ⁶ ۔ تے اوہنے بیت اللحم تے عیطام تے تقوع۔ ⁷ ۔ تے بیت صور تے سوکو تے عدلام ۔ ⁸ ۔تے جت تے مریشہ تے زیف ۔ ⁹ ۔ تے ادورائم تے لاکیش تے عزیقہ۔ ¹⁰ تے صرعہ تے ایالون تے جبرون نوں جیہڑے یہودہ تے بنیامین وچ ہین چوکندھی بنایا ۔ ¹¹ ۔ تے اوہنے قلعیاں (کوٹاں ) نوں پکا کیتا ۔ تے اوہناں وچ قلعہ دار رکھے ۔ تے خوراک تے تیل تے مے دے ڈھیر۔ ¹² ۔ تے ڈھالاں تے نیزے ساریاں شہراں وچ رکھے تے اوہناں نوں بڑا پکا کیتا ۔ تے یہودہ تے بنیامین اُسے دے رہے ۔ ¹³ ۔ تے کاہن تے لاوی جیہڑے سارے اسرائیل وچ سن اپنیاں ساریاں سرحداں توں اوہدے کول آئے ۔ ¹⁴ ۔ کیوں جو لادی اپنے آلے دوالے تے بادشاہیاں نوں چھڈ کے یہودہ تے یروشلیم وچ آئے ایس لئی پئی یار بعام تے اوہدے پتراں نے خدا وند لئی کہانت دے کم کرن توں اوہناں نوں برطرف کر دتا سی ۔ ¹⁵ ۔ تے اوہنیں اپنے لئی اُچی تھاں لئی تے شیطاناں تے لیلیاں لئی جیہڑے اوہنے بنائے کاہناں نوں مقرر کیتا ۔ ¹⁶ ۔ تے اسرائیل دے سارے قبیلیاں دے وچوں جنہاں نے اپنے دل خدا وند اسرائیل دے خدا نوں لبھن لئی لائے اوہ یروشلیم وچ آ گئے تاں جو خدا وند اپنے پیو دادے دے خدا لئی قربانی چڑھاون ۔ ¹⁷ ۔ سو اوہناں نے یہودہ دی بادشاہی نوں پکا کیتا ۔ تے رجعام بن سلیمان نوں تن ورھیاں تیکر پکا کیتا ۔ کیوں جو اوہ دائود تے سلیمان دی راہ تے تن ورھے تیکر چلدے رہے ۔ ¹⁸ ۔ تے رجعام نے یرموت بن دائود تے ابی ہائیل دختر الی آب بن یسی دی دھی محلت نوں ویاہ لتا ۔ ¹⁹ ۔ جس وچوں اوہدے لئی پتر جمے ۔ یعوش تے شمر یاہ تے زاہم ۔ ²⁰ ۔ تے اوہدے پچھوں اوہنے شالوم دی دھی معکہ نوں ویاہ لتا ۔ جس وچوں اوہدے لئی ابی یاہ تے عتائی تے زیزا تے شلومیت جمے ۔ ²¹ ۔ تے رجعام بن شالوم دی دھی معکہ نوں اپنی ساریاں بیویاں تے اندر رہن آلیاں زنانیاں توں ودھ پیار کردا سی ۔ کیوں جو اوہدیاں اٹھارہ بیویاں تے سٹھ رکھیاں ہویاں زنانیاں سن ۔ تے اوہدے وچوں اٹھاوی پتر تے سٹھ دھیاں جمیاں ۔ ²² ۔ تے رجعام نے ابی یاہ بن معکہ نوں سردار بنایا تاں جو اپنے بھراواں دا حاکم ہووے ۔ کیوں جو اوہدا دل کردا سی پئی اوہ بادشاہ بنے ۔ ²³ ۔ تے اوہنے ہوشیاری نال کم کیتا تے اپنے پتراں نوں یہودہ تے بنیامین دے ساریاں علاقیاں وچ سارے پکیاں شہراں وچ وکھ وکھ کر دتا ۔ تے اوہناں نوں بہتا مال تے دولت دتا ۔ تے اوہنے اوہناں لئی بہت ساریاں بیویاں لتیاں ۔