باب۷
1
۱۔ عیب جوئی نی کرو کیانکہ تھاری بھی عیب جوئی کونی کی جاوے۔
2
۲۔ کیانکہ جاں تھیں عیب جوئی کرئی، ائیاں تھاری وی عیب جوئی کی جاخے۔ آݨ جکے ٹھہاں خاں تھیں بھرخو اُوے ٹھہاں خاں تھارے خاروں بھریو جاخے۔
3
۳۔تھیں آپرے بھائی ری آنکھ میں پیوڑے لکِھ نا جووئی، پݨ تھیں آپری آنکھ میں پیوڑے پنجر تے غور کونی کرتا؟
4
۴۔ تھاں آپرے بھائی کنکݨ کہے خگے، آ ہوں تاجی آنکھ میں پیوڑے ککِھ ناں کاڈھاں۔ جݙےتھاری آپری آنکھ میں پنجر پیو ہے۔
5
۵۔اے ریاکار، پہلی آپری آنکھ خاں پنجر کاڈھ، پچھے توں اُوے ناں جکو تاجے بھائی رے آنکھ میں ہے کاڈھ خگھیخ۔
6
6۔ پویتر چیز(شے) (بخت) کتاں ناں متے (نی) ݙؤ۔ آݨ آپرا موتی خویراں رے اِگ میں نی ناکھو، آݨ نی تو وہ اُواں رے پگا رے ہیٹا لتاڑے پچھے مُٹرتے اُو تھاں ناں پھاڑ تے ٹوٹا ٹوٹا کرخے را،
7
۷۔ مانگو تو تھاناں ݙھنو جاخے ، جوخو تو لابھخے، کھڑکھاخو، تو تھارے خاروں کھولیو جاخے۔
8
۸۔ کیانکہ ہر ہیک جکو مانگخے، اوے ناں جڑی ، اُو جکو لابھئی، اُوے ناں ملی آݨ جکو کوئی کھڑکاوی، اُوے رے خاروں کھولیو جاخے۔
9
۹۔ کی تھاں میں خاں اھیڑو کوئی منکھ ہے کہ اُوے رو ݙیکرو پاݨی مانگے تو او اُوے ناں پھتر ݙے۔؟
10
۱۰۔ آݨ جݙے اُو مچھی مانگے تو اُوے ناں لنڈ (باخینگ) ݙے؟
11
۱۱۔ ائیے خاروں کہ تھیں جکو کہ بُرا ہو تے آپری اولاد ناں بھلے چیزاں ݙوݨ جاݨیں، ائیے رے خاروں تھارو آکاشی پتا اُوے ناں بھلے چیزاں ݙیخے، جکو اُوے خاں مانگخے؟
12
۱۲۔ ائیے رے خاروں جکو باتاں تھیں پہاوی کہ لوک (ماݨیخ ) تھاں خاں کرئے، تھیں وی اُواں خاں اُواں ہی کرو، کیانکہ توریت آݨ سنت ری یہی تعلیم (سبق ہے ۔
13
۱۳۔خوڑے در خاں بڑو کیانکہ اُوہی کھولو در ہے۔ آݨ کھولو مارگ جکو تباہی (بربادی)موت رے پاخے لے جاوی۔ گݨناں اہڑا منکھ ہے جکو ائیے مارگ میں جاوی۔
14
۱۴۔ پݨ خوڑو در آݨ ݙکھیو مارگ جکو خرگاپُور میں جاوی۔ تمام گٹ منکھ ہے جکو اُوے ناں جو لابھئی۔
15
۱۵۔اُوے کوڑے سنتاں خاں ہوشیار رہو، اُواں خاں جکو رڈھاں رے لباس (روپ) میں تھاں کوڈھی آوی، پݨ اُو اصل میں پھاڑ کھاؤݨ آرا نہار ہے۔
16
۱۶۔ تھیں اُواں رے پھݪ خاں اُواں نا اُوݪکھ خورا۔ کی منکھ پھٹ ککریاں خاں انگور آݨ کنڈیراں خاں انجیر پٹئی؟
17
۱۷۔ اِئیاں، ہیک بھلو بݨ بھلو پھݪ ݙئی۔ پݨ بُرو بݨ بُرو پھݪ ݙئی۔
18
۱۸۔ ہیک بھلو بݨ بُرو پھݪ کونی ݙے خگتو، آݨ بُرو بݨ بھلو پھݪ کونی ݙے خگتو۔
19
۱۹۔ ہربݨ جکو بھلو پھݪ کونی ݙیتو اُو باڈھیو کاوی آݨ باخݙے میں خاڑیو جاوی۔
20
۲۰۔تو پچھے تھیں اُواں ناں اُواں رے لچھݨاں خاں اُوݪکھ خو۔
21
۲۱۔ اُو خارا منکھ جکو مناں ایشور ایشور کہی اُواں میں خارا ایشور ری راجائی میں کونی جاوے پݨ صرف اُو جاوخے جکو مانجے ٻاپ ری مرضی تے بہوی اُو جکو آکاش تے ہے۔
22
۲۲۔ اُوے ݙینھں گھݨاں منکھ مناں اے ایشور اے ایشور کہخے۔ کی مھاں تاجے ناں ری گواہی کونی ݙنی؟ آݨ تاجے ناں خاں بھوتاں ںاں کونی کاڈھیا؟ آݨ تاجے ناں خاں موٹا موٹا کام کونی کریا؟
23
۲۳۔ آݨ پچھے ہوں اوئاں ناں خاراں رے خامھو کہیخ کہ ہوں تھاناں کݙے بھیکونی اوݪکھتو۔ اے بُراں میں الگ ہو جاؤرا۔
24
۲۴۔ ائیے رے خاروں جکو مانجے باتاں خݨئی آݨ اُوے تے عمل کرئی او اُوے خیاݨے منکھ آری کار ہوخے جکے آپروگھر پھترتے ٹھاہوئی۔
25
۲۵۔میھ بوخیو، طوفان آیا، جانکھے آئے آݨ اُوے گھرخاں لاگے( ٹکریے) پݨ اُو گھر نی کھریا۔ کیانکہ اُو پھتر ماتھے بݨیوگیوتو۔
26
۲۶۔ پݨ جکو مانجے باتاں خݨئی آݨ اُوے تے عمل کونی کرتو اُو اُوے بے عقل (بےسمجھ) منکھ آݪی کار ہے جکو آپرا گھر بیݪو تے ٹھاہوی۔
27
۲۷۔میھ برخیو، طوفان آیا، جانکے آئے آݨ اُوے گھرخاں لاگے آݨ اُو کھریو، آݨ برباد ہوگیو۔
28
۲۸۔ائیاں ہوئو جݙے یسوع آپری تعلیم ݙیؤݨ بند کی تو سارا منکھ اُوے رے باتاں خاں حیران ہتا۔
29
۲۹۔ کیانکہ اُو اُواں ناں فقیہاں آݪی کار نی پرا اختیار راکھݨ آݪے آری کار تعلیم ݙیتو ہتو۔