باب۲۸
1
۱۔ پوتر ݙنھ رے بعد ہفتے رو پہلوݙیھں ہوتو، مریمؔ مگدلینی آݨ ٻیجوݪی مریمؔ قبر جوؤݨ گیے۔
2
۲۔ جووہ اُوتھے موٹو بھونچاݪ آیو، اُوچھتو ایشور رو ہیک فرشتو آکاش خاں آیو آݨ پتھر ناں پرو کیو آݨ اِے رے ماتھے ٻیٹھو۔
3
۳۔ اِے رو جلال روشنی آݪی کر ہتو آݨ اُوے را گابھا پرف آݪی کر آچھا ہوتا۔
4
۴۔آن اُوئے رے ٻہی خاں رکھوالی کرݨ آݪا کانپ گیا ائیاں جاں مرَیوڑا ہوئے۔
5
۵۔ فرشتو لُگائیاں خاں ٻولو، آݨ اُواں ناں کہیو۔ ٻہیو نی ہوں جاݨیی کہ تھیں پربھویسوع ناں جوتے پھرئی۔ جکو خوݪی تے چہݪیو گیو تو۔
6
۶۔اُو اِتھے کونی ، پݨ اُو جی اُٹھیو ہے، جیکݨ اُوے کہیو تو، آؤ جووہ، اُو جگہ جِتھے مسیح ہوتو۔
7
۷۔ بیگے جاؤ آݨ اُوے رے چیلاں ناں ݙخلو کہ اُو موؤݪاں میں خاں جی اُٹھیو ہے۔ جوؤہ، اُو تھاں خاں پہلی گلیل ݙخاں جاوئی وہ۔ اُوتھے تھیں اُوے ناں جوخو۔ جوؤہ، میں تھاناں ݙخلیو رو۔
8
۸۔ اُو لُگائے بیگے ݙاڈھی خوشی آݨ ٻہیہ خاں قبر خاں ٻاہر گئے آݨ اُوے رے چیلاں ناں ݙخلݨ رے خاروں بھجئیے(بھگے)۔
9
۹۔جوؤہ، پربھویسوع اُواں خاں میلو(خنٹیو) آݨ کہیو، تھاری سلامتی ہووئے۔ اُو لُگائے اُوے رے پگے پݪیے۔ آݨ اُوے ری بݙائی کرݨ لاگے۔
10
۱۰۔ پچھے پربھویسوع اُواں ناں کہیو، ٻہیو نی۔ جؤ مانجے بھائیاں ناں ݙخلو تاکہ اُو گلیل ݙخیا جاوے۔ اُوتھے اُو مناں جوخے۔
11
۱۱۔ جݙے اُو لُگائے جاتے پیئے، جوؤہ، کنئک پاہرے دار شہر ݙخیا گیا، آݨ سردارکاہناں ناں اُو خارے باتاں ݙخلیے جکو ہوئے ہتے۔
12
۱۲۔جݙے کاہناں آݨ پوݪیاں خاں ملیا آݨ خاروحال حوال ݙھنو، اُواں ہیک موٹی رقم پاہرے داراں ناں ݙھنی۔ آݨ اُواں کہیو۔
13
۱۳۔ ٻجاں ناں کہو، پربھویسوع را چیلا رات رو آیا جݙے مھیں خوتا پیا تا اُو آتے اُوے ری لاش ناں چوری کرتے لے گیا۔
14
۱۴۔ اگر اِے خٻر صوبیدار تک پُگی، مھیں اُوے ناں راضی کرلے خاں، آݨ تھاناں کوئی پریشانی کونی تھیئے۔
15
۱۵۔ پچھے پاہرے آݪاں اُو رقم لی، آݨ جیکݨ کہیو گیو تو اُواں ہی کریو۔ اِے خٻر آج تک یہودیاں میں مشہور ہے۔
16
۱۶۔ پݨ اگیارے چیلا گلیل رے پہاڑ تے گیا جکو پربھویسوع اُواں رے خاروں مقرّر کیو تو۔
17
۱۷۔ جݙے اُواں اُوے ناں ݙیٹھو، اُواں اُوے ری بݙائی کی، پݨ کئنیک شک کیو۔
18
۱۸۔پربھویسوع اُواں کوڈھی آیو۔ اُواں خاں باتاں کرئیے آݨ کہیو، دھرتی آݨ آکاش رو اختیار مناں ݙھنوگیو ہے۔
19
۱۹۔ اِے رے خاروں جاؤ آݨ خارے قوماں ناں چیلا بݨاؤ اُواں ناں ٻاپ آݨ ݙیکرے آݨ پویتر آتماں رے ناں خاں پویتر شنان ݙؤ۔
20
20 ۔آݨ اُواں ناں اِے تعلیم ݙؤ کہ اُواں خارے باتاں تے عمل کرئے جکے رو حُکم میں تھاناں ݙھنوھاں۔ آݨ جوؤہ، ھُوں دھرتی رے آخر تک ہمیشہ تھاں بھیݪو ہاں۔