1
۱۔ پچھے اُوے اُواں ٻارھاں نا ہیلو کر اُواں نا خارے بھُونتاں ان بیماریاں نا کاڈھݨ ری قُدرت رو اختیار ݙنو۔
2
۲۔آن اُواں نا بئیر کریو تاکہ ایشور ری بادشاہی ری پرچار کرے ان بیماراں نا بھلاں کرے۔
3
۳۔آن اُوے اُواں نا کہیو مارگ خارے میں کئی نی لیا۔ نی گیݙی نی تھیلو ٻاٹی نی پاݨی نی دھن ان ٻے ٻے چوݪا وی تھاں کڈھے نی ہوے۔
4
۴۔ آن جکے گھر میں جاؤ اوتھ جی رہو ان اوتھ خاں جی بُوہا جایا۔
5
۵۔ آن جکے شہر را لوگ تھاناں قبول نی کرے اُوے شہر خاں نکݪتے بݪا آپرے پگ ری مٹی چھنڈک ݙئیا تاکہ اُواں تے گواہی ہوے۔
6
۶۔پچھے او گاں گاں خوشخبری خُݨاوتا ان ہر جگہ خاجا کرتا پھریا۔
7
۷۔ ان چوتھائی مُلک رو حاکم ہیرو دیس خارا حال خݨ گھٻرا گیو۔ایئے خارُو کئینک کہتا ہَتا یوحنا مریوڑا میں خاں جی اُٹھیو ہے۔
8
۸۔ان کئینک ایہ ایلیاہ ظاہر ہویو ہے۔ ان کئینک ایہ کہ پُراݨے خنتاں میں خاں جی اُٹھیو ہے۔
9
۹۔پݨ ہیرودیس کہیو کے یوحنا رو تو میں خیخ کٹوا ݙنو ہَتو ہمے ایہ کݨ ہے۔ جکے رے بارے میں ایڑھے باتاں خݨئی ووہ ان اُوے نا جوݨ ری کوشش میں رہیو۔
10
۱۰۔آن یسوع را چیلا پاچھا آ ان جکو کجھ کریو ہَتو اُوے نا خݨایو۔ ان او اُواں نا بیت صیدا ناں رے شہر بُوہو گیو۔
11
۱۱۔ایئے جو ان منکھاں رو ٹوݪو اُوے رے لارے گیو۔ ان او خوشی خاں اُواں خاں مِلیو۔ ان اُواں خاں ایشور ری بادشاہی رے باتان کرݨ لاگو ۔ ان جکو بیماریاں خاں خاجا ہوݨ آیا اُواں نا شفاء ݙنی۔
12
۱۲۔جݙے ݙن ڈھݪݨ لاگو تو اُواں ٻارہاں آ ان اُوے نا کہیو منکھاں نا بئیر کر تاکہ آخے پاخے رے گاواں میں جارہے۔ ان کھاوݨ رے خارُو کوآی بندوبست کرے۔ کیانکہ آپاں تو ایتھ پدھر میں ٻیٹھا ہاں۔
13
۱۳۔ایئے تے یسوع اُواں نا کہیو تھاں جی ایئاں نا کھاوݨ رے خارُو کئینک ݙو۔ چیلاں کہیو مھاں کڈھے تو پانچ ٻاٹیاں آن ٻے مچھیاں خاں ٹاݪ کئیں کونی۔ پݨ کی مھاں ایاں خاراں خارُو ٻاتی مول ری لے آواں؟
14
۱۴۔ کیانکہ او پانچ ہزار منکھاں رے نیڑا ہَتا۔ پچھے اوے آپرے چیلاں نا کہیو کہ اُواں نا پچاخ پچاخ رے ٹوݪیاں میں ٻخاݨو۔
15
۱۵۔چیلاں اُواں جی کریو آن خاراں نا ٻخاݨیا۔
16
۱۶۔پچھے یسوع او پانچ ٻاٹے آن ٻے مچھیاں نا لے ان آسمان نی جویو ان برکت ݙنی ان توڑ تے آپرے چیلاں نا ݙیتو گیو۔ کہ منکھاں نا ݙیوتو جاؤ۔
17
۱۷۔اَن اُواں خاراں کھایا ان دھاپ گیا۔ ان بچیوڑا ٻاٹیاں را ٻارہے ٹوکرا بچ گیا۔
18
۱۸۔ آن ایاں ہویو کہ جݙے او ہیکھلے میں دعا کرتو ووہ تو چیلا اُوے رے بھیݪا ہَتا آن اماں اُوے خاں پُوچھیو۔ کہ منکھ کی کہی کہ ہُوں کݨ ہاں؟
19
۱۹۔چیلاں بݪتی ݙنی کہ یوحنا اصطباغی آن کہینک ایلیاہ آن کہینک اگلاں میں خاں کوئی خنت جیوتو ہویوہے۔
20
۲۰۔پچھے اُوے اُوے نا کہیو پݨ تھاں کی کہتا رئی کہ ہُوں کݨ ہاں شمعون پطرس بݪتی میں کہیو ایشور رو مسیح۔
21
۲۱۔اُوے اواں نا خمجھا رو حُکم ݙنو ایہ بات کئی نا نی کہیا۔
22
۲۲۔آن ہاں ایہ ضرور ہے کہ آدم رو ݙیکرو گھݨو ݙکھ اُکھݨے۔ یہودی راہنما ایشور را موٹا پُجاری ان دھرمی گرو اُوے نا تھݙاوے آن مرایو جاخے آن تیجے ݙن جی اُٹھخے۔
23
۲۳۔پچھے اُوے خاراں نا کہیو جے کوئی مھارے لارے آوݨ چاہوے تو پیل او آپری مرضی نا چھوڑے ان ہر روز آپری خوݪی اُکھݨے ان مھارے لارے آوے۔
24
۲۴۔ کیانکہ جکو کوئی آپری ایہ زندگی نا بچاخے او اُوے امر جیون نا گُماخے پݨ جکو کوئی مھارے خارُو آپری ایئے زندگی نا گُماخے اُوے نا جی امر جیوݨ لابھخے۔
25
۲۵۔ کیانکہ منکھا نا کی فائدہ ہے۔ جے کئی نا پُوری دُنیا لابھ جاوے پݨ او آپرے زندگی گُماوے۔
26
۲۶۔ کیانکہ جکو میں خان آن مھارے باتاں خاں خرماخے (ابنِ آدم) وی اُوے خاں خرماخے۔ جݙے او آپرے آن آپرے ٻاپ ان پویت فرشتاں ری شان بھیݪو آخے۔
27
۲۷۔ان ہُوں تھاناں خچ کہیں کہ اُواں میں خاں جکو ایتھ ابھا ہے۔ کئینگ ایہڑا ہے جکو اُتری دیر تک کونی مرے جتی تک او ایشور ری بادشاہی جو نی لے۔
28
۲۸۔ آن ائیاں باتاں رے آٹھ ݙناں خاں بعد پطرس آن یوحنا آن یعقوب نا بھیݪو لے ہیک پہاڑ تے دُعا کرݨ گیا۔
29
۲۹۔آن اُوے رے دعا کرتے بݪا اُوے رو روپ بدل گیو۔ ان اُوے را گابھا چِٹا ہو چمکݨ لاگا۔
30
۳۰۔ان جووہ او منکھ اُوے خاں باتاں کرتا وا ایہ موسیٰ ان ایلیاہ ہَتا۔
31
۳۱۔جکو جلال میں ݙخیجا ان او یسوع ری موت رو ذکر کرتا وا۔ جکو یروشلم میں ہوݨ آݪو ہَتو۔
32
۳۲۔پݨ پطرس آن اُوے راخنگتی اُونگھ میں بھریوڑا ہَتا۔ ان جݙے جاگیا تو اُوے رے جلال نا آن ٻے منکھاں نا جویو جکو یسوع بھیݪا ابھا ہَتا۔
33
۳۳۔آن جݙے جُدا ہوݨ لاگا تو پطرس یسوع نا کہیو کہ اے اُستاد مھارو ایتھ ہوݨ بھلو ہے۔ ہمے آپاں تین ݙیرا بݨاواں۔ ہیک تھارے خارُو ان ہیک موسیٰ خارُو ان ہیک ایلیاہ خارُو پݨ او جاݨتو کونی ہَتو کہ کی کہی ووہ۔
34
۳۴۔ او ایہ کیہوتو جی ہتو کہ بادل آیا ان اُواں تے چھاں کری۔ ان اُواں رے بادل میں جاوݨ خاں او ٻہی گیا۔
35
۳۵۔آن بادل میں خاں ہیک آواز آئی کہ ایہ مھارو ݙیکرو ہے۔ تھا ایئے ری خُݨو۔
36
۳۶۔ان آواز آتے ہی یسوع جویو گیوا۔ ان او چپ رہا ان اُواں جو کجھ جویو ہَتو اُواں ݙنا میں کئی خاں کئیں نی کہیو۔
37
۳۷۔ ان ٻجے ݙن جݙے او پہاڑ خاں اُترتا ہَتا تو ہیک موٹو منکھاں رو ٹوݪو اُواں نی آیو۔
38
۳۸۔آن او ٹوݪے میں خاں ہیک منکھ رڑ کر کہیو اے گرو ہُوں تھاری منتھ کرئیں کہ مھارے ݙیکرے نا جو کیانکہ او مانجو مُونبھی ہے۔
39
۳۹۔ان جو ہیک بھُونت اُوے نا آ جھالئی ان زور زور خاں رڑے کرئی۔ او بھُونت اُوے رے ݙیل نا اِترو مروڑئی کہ چھوکرے ماہنݙے خاں جھگی بہی۔ بھونت اوے نا تمام گھݨی تکلیف ݙیوں خاں پچھے مُشکل خاں جاووتی۔
40
۴۰۔آن مِیں تھارے چیلاں ری منتی کری کہ اُوے خاں کاڈھے پݨ اواں خا نی ہو خگیو۔
41
۴۱۔ پچھے یسوع بݪتی میں کہیو۔ تھے وشواس نی راکھݨ آݪا ان خِدھے مارگ خاں بھٹکیوڑا ہو۔ ہُوں کݙے تک تھاں بھیݪو رآیخ آن تھاں نا خِکھائیخ پچھے یسوع اوے منکھ نا کہیو آپرے ݙیکرے نا ایتھ لے آ۔
42
۴۲۔جݙے چھوکرو یسوع ݙخا آوتو جی ووہ تو بھونت اُوے نا ہینٹھا ناکھیو ان گھݨو مروڑیو۔ پݨ یسوع بھونت نا نخرݨ رے خارُو حُکم ݙنو۔ تو بھُونت اُوے چھوکرے خاں نخر گیو۔ یسوع چھوکرے نا اُوے رے ٻاپ رے حوالے کریو۔
43
۴۳۔ آن خارا ایشور ری قدرت جو ان حیران ہویا۔ ان جݙے خارا اُوے را موٹا کام جو حیران ہوتا ہَتا۔ جکو او کرتو ہَتو۔ یسوع آپرے چیلاں نا کہیو۔
44
۴۴۔مھارے ایہ باتاں تھیں غور خاں خُݨو کہ (ابنِ آدم) منکھاں رے حوالے کریو جاخے۔
45
۴۵۔پݨ او ایئے بات نا نی خمجھیا۔ کیانکہ ایہ باتاں اُواں خاں لُکایوڑے ہَتے۔ اِترے تک کہ اُواں نا خمجھ نی لاگے۔ اَن او اے باتاں پُوچھݨ خاں ٻیہوتا ہَتا۔
46
۴۶۔ پچھے اُواں میں ایہ تکرار ہوئی کہ مھاں میں خاں موٹو کݨ ہے۔
47
۴۷۔پچھے اُواں رے دل را خیال خمجھ تے ہیک ٻاݪ نا لیو۔ ان آپرے کڈھے ابھجاݨیو۔
48
۴۸۔ان اُواں نا کہیو کہ جکو ایئے ٻاݪ نا مھارے نا خاں قبول کرخے او منے قبول کرخے۔ ان جکو منے قبول کرئی او اُوے نا قبول کرئی جکے مناں بئیر کریو۔ کیانکہ جکو تھاں میں چھوٹو ہے او جیی موٹو ہے۔
49
۴۹۔اَن یوحنا کہوݨ لاگو۔ اے گرو مھاں ہیک نا تھارے ناں خاں بھُونتاں نا کاڈھتے جویو۔ ان اُوے نا روکیو کیانکہ او مھاں میں خاں کونی ہَتو۔
50
۵۰۔یسوع اُوے نا کہیو کہ اُوے نا نی روک کیانکہ جکو تھارے خلاف کونی او تھارے پاخے ہے۔
51
۵۱۔ اَن جݙے یسوع رے آسمان ماتھے اُکھݨیجݨ ری بݪا نیڑی آئیی تو اُوے یروشلم ݙخا جاوݨ ری پکی خلاح کی۔
52
۵۲۔اُوے آپ خاں پیل کئیں منکھ میلیا جکو سامریہ علاقے رے ہیکے گاں میں گیا کہ اوتھ جا را او یسوع رے رہوݨ رے خارُو تیاری کرے۔
53
۵۳۔پݨ اُوے گاں آݪاں یسوع نا قبول نی کریو۔ کیانکہ یسوع یروسلم ݙخا جاوت ووہ۔
54
۵۴۔اُوے را چیلا یعقوب اَن یوحنا ایہ جو ان کہوݨ لاگا۔ اے پرمیشور جے تھاری مرضی ہوے تو مھاں آسمان خاں باخݙے برخا ان ایاں نا مُکا نکھا؟
55
۵۵۔ پݨ یسوع اُواں ݙخا پاچھل پھور ݙٹھو ان اُواں نا دڑکو ݙنو کہ تھاں کے بھیݪا ہو۔
56
۵۶۔ کیانکہ (ابنِ آدم) لوکاں نا برباد کرݨ کونی بلکہ بچاوݨ ایو ہے۔ پچھے او کئی ٻجے گاں ݙخا ٻوہا گیا۔
57
۵۷۔ آن جݙے او مارگ میں جاوتا وا تو ہیکے منکھ آرو اُوے نا کہیو اے پرمیشور تھے جیتھ وی جاخو ہُوں تھارے بھیݪو حالیخ۔
58
۵۸۔یسوع اُوے نا کہیو لونکڑیاں رے کھݙاں ان پکھیاں را آݪیا ہوئی۔ پݨ (ابنِ آدم) رے خارُو ماتھو لُکاوݨ ری جگہ وی کونی۔
59
۵۹۔ان اوے کئی منکھ نا کہیو مھارے لارے بہہ پݨ اُوے بݪتی ݙنی۔ اے پرمیشور مھنا موکل ݙے کہ ہُوں پیہل آپرے ٻاپ نا ٻوراں رو۔
60
۶۰۔پݨ یسوع اُوے نا کہیو کہ مریوڑاں نا آپرا مُردا ٻورݨ ݙے پݨ تو جا آن منکھاں میں ایشور ری بادشاہی رو پرچار کر۔
61
۶۱۔ ہیکے منکھ یسوع نا کہیو اے پرمیشور ہوں تھارے لارے ہالیخ پݨ مناں موکل ݙے ہُوں آپرے گھر آݪاں خاں مُکلا آواں۔
62
۶۲۔یسوع اُوے نا کہیو جکو کوئی ہݪ ماتھے آپرو ہاتھ راکھ لارے جوئی او ایشور ری بادشاہی رے لائق کونی۔