1
۱۔ جݙے اُو منکھاں نا آپ رے خارے باتاں خݨاں چکو تو کفرنحوم میں آیو۔
2
۲۔آݨ کہی صوبہ دار رو ہیک نوکر جکو اُوے نا پیاروہتو۔ اُو بیمار ہو رو مرݨ رے نیڑو ہتو۔
3
۳۔ آݨ اُوے یسوع ری خبر خوݨی تے اُوے یہودیاں رے کئی موٹیرڑاں نا اُوے رے کو ݙھی بہیر کر را اُوے خاں منتھ کی کہ آ رو مانجے نوکر نا بھلاں کر۔
4
۴۔ آݨ اُواں پربھو یسوع رے کوݙھی آ تے اُوے ری منتھ کر ری کہیو۔ کہ اُو ایئے رے لائق ہے کہ تُو اُوے تے اِیئے احسان کرے۔
5
۵۔ کیاں کہ اُو مھاری قوم خاں پریم کرئی۔ آݨ مھارو بھگتی رو گھر اُوے ہی بݨوایو ہے۔
6
۶۔جݙے پربھو یسوع اُواں رے بھݪو بہوو۔ آݨ انجاں گھر خاں پرو کونی گیوتو کہ صوبہ دار خنگتیاں ری معرفت اُوے نا خنݙیخو بہیر کریو ۔ اِے پرمیشور تکلیف نی کر۔ کیاں کہ ہوں ائیے رے لائق کونی کہ تُو مانجی چھت رے نیچا آوے۔
7
۷۔ ایئے رے کرے ہُوں آپ رو آپ نا ایئے رے لائق کونی خمجھتو کہ تیں کوڈھی آواں بلکہ صرف بات ہی کراں ری تو مانجو نوکر بھلاں تھیخے رو۔
8
۸۔کیانکہ ہُوں وی ایہڑو منکھ ہاں جکو ٻجاں رے اختیار میں ہاں۔ آن خپائی مانجے ماتحت ہے جݙے ہوں ہیکے خاں کہیں جا تو او جاوے رو آن ٻجے خاں کہیں آ ت او آوی رو آن آپرے غلام خاں اے کر تو او کرئی۔
9
۹۔ پربھُو اے خُݨ رو اُوے ماتھے خوچݨ لاگو آن مُڑ رو بھیڑ خاں جکو اُوے رے لاریاں آوتا ہتا کہیو کہ ہُوں تھاں خاں کہیں کہ اِترو موٹو بخواخ میں اسرائیل میں وی کونی ݙٹھو۔
10
۱۰۔آن او جکو بئیر کریا گیا ہتا جݙے گھر میں بݪے آیا تو اُوے غلام نا ٹھیک ٹھاک ݙٹھو۔
11
۱۱۔ آن ایئے خان پچھے او ہیک بھیتر گیو جکو نائن کہلاوتو ہَتو۔آن اوے را چیلا آن منکھاں رو موٹو ٹوݪو اوے رے بھیݪو ہَتو۔
12
۱۲۔جݙے او اُوے شہر رے پھاٹک رے نیڑو پُگو تو ݙٹھو کہ ہیک مُردو ٻاہر لے جاوے پیا۔ جکو آپری مان رو ھیک ہی ݙیکرو ہَتو۔ آن او رانݨ ٻیر ہتی۔ آن آن شہر را گھݨائی منکھ اُوے بھیݪا ہَتا۔
13
۱۳۔اوے نا جو رو پربھو نا ترخ آیو آن اُوے نا کہیو رو نی۔
14
۱۴۔آن نیڑو آ رو میت نا ہاتھ لگایو آن کھݨݨ آݪا ابھیج گیا۔ پچھے اُوے کہیو اے نوجوان ہُوں تیں خاں کہیں اُٹھی۔
15
۱۵۔آن او مووڑو اُٹھی ٻیٹھو آن ٻولݨ لاگو۔ آن اُوے اُوے ری ماں رے ہاتھاں میں ݙنو۔
16
۱۶۔پچھے خجا ٻیہہ گیا آن ایشور ری بݙائی کر را کہݨ لاگا کہ ہیک موٹو نبی مھاں میں تھیو ہے۔ آن کہ اِیشور آپری اُمت ماتھے نظر کری ہے۔
17
۱۷۔آن اُوے رے بارے میں اے کھٻر خارے یہودیہ آن تمام آخے پاخے رے علاقے میں پھر گی۔
18
۱۸۔ آن یوحنا رے چیلا اُوے خارے باتان ری خبر ݙنی۔
19
۱۹۔آن یوحنا آپرے چیلاں میں خاں ٻیہاں نا ہیلو کریو پربھُو یسوع کناں کہہ رو بئیر کریا کہ کی جکو آوݨ آݪو ہے؟ او تو جی ہے؟ جاں مھیں کئی ٻجے رو مارگ جوواں۔
20
۲۰۔اُو مںکھ اُوے کڈھے آ کہوݨ لاگا۔ کہ یوحنا پویتر شنان ݙیوݨ آݪے مھانا تیں کنے بئیر کریا ہے کہ اے کہہ رو کہ جکو آوݨ آݪو ہے او تو جی ہے یا مھیں کئی ٻجے رو مارگ جوواں۔
21
۲۱۔اوے ای بِݪا گھݨا نا بیماریاں خاں آن آفتاں خاں آن بھونتاں آݪاں خاں آزاد آن چھٹکارو آن گھݨائی اندھا نا آنکھے ݙنے۔
22
۲۲۔ آن اُوے جواب میں اُواں خاں کہیو کہ جکو کجھ تھاں ݙٹھو آن خݨیو ہے جا رو یوحنا نا کہو کہ اندھا جووی پیا لولھا لنگڑا بہی وا کوڑھی پاک صاف ہویا جاوی۔ آن ٻوڑا خُݨئی ووا۔ مووڑا جیوتا ہوی ووا۔ آن گریٻاں نا خوشی ری کھٻر خݨائی جاوے وی۔
23
۲۳۔آن دن ہے او جکو مھارے خارُو تُھݙو نی کھاوے۔
24
۲۴۔جݙے یوحنا رو خنݙیخو ݙیوݨ آݪا گیا۔ پچھے او یوحنا رے بارو ٹوݪے خاں ایہ کہݨ لاگو کہ تھاں جھنگ میں کی جوݨ گیا تا کی ہوا خاں ہِلتے کاناں نا۔
25
۲۵۔تو پچھے کی جوݨ گیا ہَتا کی پھُوٹرا گابھا پہریوڑے مرداں نا؟ جووہ جکو قیمتی گابھا پیہرتا آن عیش و عشرت میں رہئی او شاہی گھراں میں رہوتا رئی۔
26
۲۶۔تو پچھے کی جوݨ گیا ہَتا کی ہیک سنت نا ہاں ہُوں تھاناں کہیں کے سنت خاں وی موٹے نا۔
27
۲۷۔ اے اوہو جے جکے خارُو لکھیوڑو ہے جوئے ہُوں آپ رو سنت تھارے آگے بئیر کرئیں۔ جکو تھارے آگے مارگ تیار کرخے۔
28
۲۸۔ہُوں تھاں نا کہیں کے اُواں میں جکو لُگایاں میں جایو ہے یوحنا اصطباغی خاں موٹو کونی تو وی جکو ایشور ری راجائی میں چھوٹو ہے او اُوے خاں وی موٹو ہے۔
29
۲۹۔ان خارے لوکاں بلکہ محصول لیوݨ آݪا وی یوحنا خاں بپتسمو لے تے ایشور ری راستبازی نا پورو کریو۔ (اُوے ریت نا پُورو کریو)
30
۳۰۔پچھے فریسیاں آن شرع رے عالمان اُوے خاں بپتسمو نی لے تے اِیشور رے ارادے نا رد کریو ہے۔
31
۳۱۔پݨ ایئے زمانے رے منکھاں نا ہُوں کے بھیݪا بچاڑاں او کے آݪی کار ہے۔
32
۳۲۔او اُواں ٻاݪاں آݪی کار ہے جکو گݪی میں ٻیخ تے آپت میں رڑ کر کہے کہ مھیں تھارے خارُو بانسلی بجائی پݨ تھیں کونی ناچیامیں ماتم کیو پر تھیں نی رویا۔
33
۳۳۔ کیانکہ یوحنا اصطباغی نی تو او ٻاٹی کھاوتو آیو نی شراب پیوتو۔ ان تھیں کہی کے اوے مین بھونت ہے۔
34
۳۴۔منکھ رو ݙیکرو کھاوتو پیوتو آیو آن تھیں کہی کے جووہ کھاؤُ آن شرابی محصول لیو ݨ آݪاں آن گُنہگاراں رو یار۔
35
۳۵۔پ ݨ حکمت آپرے خارے ݙیکراں ری طرف خاں نیک ہے۔
36
۳۶۔فریسیاں میں خاں کئی اُوے نا دعوت ݙنی کہ میں کڈھے آ بھوجن کر آن او اُوے فریسی رے گھر جاتے بھوجن کرݨ ٻیٹھو۔
37
۳۷۔آن جووہ اُوے شہر میں ہیک پاپی لُگائی ہَتی جکو اے کھٻر تے کہ اُوے فریسی رے گھر میں بھوجن کرݨ ٻیٹھو ہے۔ آن سنگِ مر مر رے عطر دان میں عطر لے آئی۔
38
۳۸۔آن اُوے رے پگاں کڈھے روتی رہی لارے ابھیج آنخواں خان اُوے را پگ بھیگوݨ لاگی آن آپ رے ماتھے را باݪاں خاں آچھو کر تے پگاں نا مٹھکی ݙنی آن عطر ملیو۔
39
۳۹۔ آن اُوے فریسی جکے اُوے نا دعوت کی تی اے جوتے کہوݨ لاگو کے جے اے سنت ہونت تو جاݨت کے جکو ایئے نا ہاتھ لگاوی او کݨ آن کیہڑی لُگائی ہے۔ کیانکہ اے بدچلن ہے۔
40
۴۰۔آن یسوع اُواں خاں ٻول تے کہیو کے اے شمعون مناں تیں خاں کئیں کہوݨو ہے ۔ اُوے کہیو اے اُستاد کہہ۔
41
۴۱۔ کئی امیر را ٻے قرضدار ہَتا۔ ہیک پانچ خؤ دینار ٻجوڑو پچاخ رو۔
42
۴۲۔جݙے اُواں نا ادا کرݨ رے واسطے اُواں کڈھے کئیں کونی ہَتو تو اُوے ٻنھا نا معاف کر ݙنا۔ پݨ اواں میں خاں کݨ گھݨو پریم راکھخے۔
43
۴۳۔شمعون بݪتی میں کہیو کہ مھاری خمجھ میں او جکے گھݨو معاف کیو جݙے اوے اُوے نا کہیو تو تھیں ٹھیک فیصلو کریو ہے۔
44
۴۴۔آن اُوے لُگائی ݙخا ماہنݙو پھیر تے اوے شمعون نا کہیو کہ کی تو ایئے لُگائی نا ݙٹھو ہے؟ ہُوں تھارے گھر میں آیو تیں پگ دھوݨ نا پاݨی کونی ݙنو پݨ اُوے مھارا پگ آنخُواں خاں بھگویا۔ آن آپ رے باݪاں خاں آچھا کریا۔
45
۴۵۔تیں مناں کونی مِٹھکی لنھی۔ پݨ او جݙے خاں ہوں مئیں آیو آں مھارا پگاں تے مٹھکی لیوݨ خاں باز کونی آئی۔
46
۴۶۔ تھیں مھارے ماتھے میں تیل کونی لگایو پݨ اُوے مھارے پگاں تے عطر لگایو ہے۔
47
۴۷۔ایئے خارُو ہُوں تناں کہیں کے ایئے را پاپ گھݨا معاف ہوخے کیانکے اُوے گھݨو پریم کیو ہے۔ پݨ جکے را تھوڑا معاف کیا گیا ہے اور تھوڑو پریم راکھخے۔
48
۴۸۔ آن اُوے لُگائی خاں کہیو کہ تھارا پاپ معاف ہویا۔
49
۴۹۔ایئے تے کھاوݨ آݪاں من میں کہییو کہوݨ لاگا اے کݨ ہے جکو پاپ معاف کرݨ آݪو ہے۔
50
۵۰۔پݨ اُوے لُگائی نا کہیو تھارے وشواس تھنا بچایو ہے۔ خہی خلامت بوہی جا۔