1
۱۔پچھے پویتر ݙینہ رو ایاں تھیو کے اور پھخلاں(پوکھاں) میں خاں جاتو پیو آن اُوے را چیلا خِٹا پٹ را آن ہاتھاں خاں مخوٹ را کھاوݨ لاگا۔
2
۲۔ پچھے فریسیاں میں خاں کہینک اواں خاں کہݨ لاگا تھیں او کام کیاں کروئی جکو پویتر ݙینھ رو کرݨ دھرم کونی۔
3
۳۔ یسوع اواں نا بݪتی ݙنی کی تھاں کونی پڑھیو کے جݙے داؤد آن اوے را خنگتی بُکھیا ہَتا تو اواں کی کریو تو؟
4
۴۔او کیاں ایشور رے گھر میں گیو آن چڑھاوے رے ٻاٹے لے رے جکاں رو کھاوݨ چھڑو کاہناں رے خِوا کہی نا کھاوݨ ری موکل کونی آن اپرے خنگتیاں نا وی ݙنے۔
5
۵۔پچھے اُوے اواں نا کہیو کے ماݨخ رو ݙیکرو ایشور پویتر ݙینھ رو وی مالک ہے۔
6
۶۔ آن ٻجے واری وی پویتر ݙینھ رو ایاں تھیو کے اور بھگتی گھر میں آیو آن تعلیم ݙیوݨ لاگو آن ایتھ ہیک ماݨخ ہتو جکے رو خاجڑی ہاتھ خوکوڑو ہَتو۔
7
۷۔پچھے فقیہہ آن فریسی اُوے ری تاڑ میں ہتا کہ شاید او پویتر ݙینھ رو خاجو کرے تو اُوے تے جُرم لگاواں۔
8
۸۔پر اُوے اُواں ری خوچ نا اوݪکھ ری اُوے ماݨخ نا جکے رو ہاتھ خُوکوڑو ہَتو کہیو اُٹھی آن بچ میں ابھیج او اُٹھی ابھیجو۔
9
۹۔ پچھے یسوع اُواں نا کہیوو ہُوں تھاں خان ہیک بات پُوچھئیں کہ پویتر ݙینھ رو نیکی کرݨ ٹھیک ہے جاں بُرائی کرݨ۔ خاخ نا بچاوݨ یا مارݨ؟
10
۱۰۔ آن اُوان خاراں تے دید کر ری اُوے ماݨخ نا کہیو آپرو ہاتہ بدھا اُوے ہاتھ بدھایو آن اُوے رو ہاتھ خاجو تھیو۔
11
۱۱۔پچھے او خارا ریخ خاں بھریج را آپت میں کہوݨ لاگا کہ آپاں یسوع خاں کی کراں۔
12
۱۲۔ آن اُواں ݙنان میں اور ٹکر تے پراتھنا کرݨ گیو آن اِیشوَر خاں پراتھنا کرتے ہوے خاری را گزاری۔
13
۱۳۔آن جݙے ݙینھ تھیو اُوے آپرے چیلاں نا آپ رے کوڈھیا ہیلو کر رو اوان میں خان ٻارہاں نا چُگیا۔ (جکاں نا اُوے آپرا خاص چیلا کہیو۔ یعنی رسول رو لقب ݙنو)
14
۱۴۔ یعنی شمعون جکے رو ناں اُوے پطرس راکھیو۔ آن اُوے رو بھائی اندریاس آن یعقوب آن یوحنا آن فلپس آن برتلمائی۔
15
۱۵۔ آن متی آن توما آن حلفی رو ݙیکرو یعقوب آن شمعون جکے نا زیوتیس کہوتا۔
16
۱۶۔آن یعقوب رو ݙیکرو یہوداہ آن یہوداہ اسکریوتی جکوے اُوے نا جھلاوݨ آݪو ہَتو۔
17
۱۷۔ آن اُواں بھیݪو اُتر رو پدھر تے ابھو۔ آن اُتھے اُوے رے چیلاں رے موٹے ٹوݪے آن یہودیہ آن یروشلم آن صور آن صیدا رے خمنری کندھے خاں منکھاں رو موٹو ٹوݪو وی ہَتو۔
18
۱۸۔جکو اوے ری خُݨݨ آن آپری بیماریاں خاں خاجا تھیݨ آیا ہَتا۔ آن جکوبھونتاں خان ختایا جاتا ہَتا او بھلاں ہوݨ لاگا۔
19
۱۹۔آن خارا اُوے نا ہاتھ لگاوݨ ری کوشش کرتا۔ کیانکہ شکتی اُوے خاں نخرتی ہَتی۔ جکے خاں خارا بھلان تھیتا۔
20
۲۰۔ آن اُوے آپرے چیلاں نا جو رو کہیو دھن ہے تھاناں جکو گریٻ ہو کیانکہ اِیشوَر ری راجائی تھانری ہے۔
21
۲۱۔دھن تھاناں ہے جکو ہیݨا بُکھیا ہو تھیں ڈھراپیا جاخو۔ دھن تھانا ہے جکو ھیݨا روئی ووا پچہے ہخخو۔
22
۲۲۔دھن تھاناں ہے جݙے انسان رے ڈیکرے ری خاطر منکھ تھاں خاں کِخطو راکھے۔ آن تھاں نا دُھتکارے آن بے عزتا کرے آن تھارو ناں گندو خمجھ رو کٹ چھوڑے۔
23
۲۳۔اُوے ݙینھ راجی تھیا آن خوشی کریا۔ کیانکہ جووہ آکاش تے تھانرو اجر موٹو ہے۔ کیانکہ اُواں را ٻاپ ݙاݙاں وی خنتاں خاں اِیاں جی کرتا ہَتا۔
24
۲۴۔ پر ݙکھ تھاں تے ہے جکو بھاگیا ہو۔ کیانکہ تھیں آپری تخلی کرے ٻیٹھا ہو۔
25
۲۵۔افسوس تھاں تے جکو ہیݨا دھاپوڑا ہو کیانکہ تھیں بُکھیا ہوخو۔ افسوس تھاں تے جکو ہیݨا ہخوئی وا پچھے تھیں پٹخو آن روخو۔
26
۔ افسوس تھاں تے جݙے ماݨخ تھاں نا بھلو کہے کیانکہ اُواں رے ٻاپ ݙاݙاں کُوڑے نبیان خاں وی ایاں جی کرتا ہَتا۔
27
۲۷۔ہُوں تھاں نا خُݨݨ آݪاں نا کہیں کے اپرے دُخمݨا خاں پریم راکھو آپرے بیر راکھݨ آݪاں رو بھلو کرو۔
28
۲۸۔آپرے طعنہ ݙیوݨ آݪاں رے خارُو برکت مانگو۔ جکو تھاری گِلیا کرے اُوے رے خارُو پراتھنا کرو۔
29
۲۹۔جکو تاجے ہیکے گال تے چماٹ مارے ٻجوڑو وی پھیر ݙو آن جکو تاجو جُبو کھوخ لے اُوے نا چوݪو لیوݨ خاں نی روک۔
30
۳۰۔جکو کوئی تیں خاں کہینک مانگے اُوے نا ݙے آن اُوے خاں جکو تاجو مال لے بݪے نی مانگ۔
31
۳۱۔ آن جے کر تھیں چاہوی کہ منکھ تھاں خاں کرے تھیں وی اُوان خاں اُواں جی کرو۔
32
۳۲۔آن جے تھیں آپرے پریم کرݨ آݪاں خاں جی پریم کرخو تو تھانرو کی تھورو ہے۔ کیانکہ پاپی وی آپرے پریم کرݨ آݪان خاں پریم کرئی۔
33
۳۳۔آن جیکر تھیں اُواں رو بھلو کرو جکو تھانرو بھلو کرے تو تھانرو کی تھورو ہے۔ کیانکہ پاپی وی ایانجی کرئی پیا۔
34
۳۴۔آن جے کݙھئیں تھیں اُواں نا قرضو ݙیو جکاں خاں لیوݨ رو آخرو ہے۔ تو تھانرو کیہڑو تھورو ہے۔ کیانکہ پاپی وی پاپیاں نا قرضو ݙئی کہ اُواں خاں پُورو پاچھو لیاں۔
35
۳۵۔ بلکہ اپرے دُخمݨاں خان پریم کرو۔ آن بھلو کرو۔ آن پاچھو لیوݨ رو آخرو نی کررو قرضو ݙو تو تھانرو موٹو اجر ہُوخے۔ آن تھیں اِیشوَر را ݙیکرا تھیخو۔ کیانکہ او ناشُکراں آن خیطاناں تے مہر بان ہے۔
36
۳۶۔ایئے رے خارُو تھیں دیا کرو۔ جاں تھانرو پِتا دیالو ہے۔
37
۳۷۔(یہاں پر کِیا گیا ترجمہ مُجھے موصول نہیں ھُوا) آزاد کرو تو تھیں وی آزاد تھیا جاخو۔
38
۳۸۔ ݙیو تو تھاں ناں وی ݙنو جاخے۔ پھلے پیمانے خاں دٻا دٻا آن لوݙو ݙنوڑو آن بھریوڑو تھانری جھوݪی میں ݙنو جاخے۔ کیانکے جکے ٹھیکراں خاں تھِیں تولخو اُوے خاں تھانرے خارُو تولیو جاخے۔
39
۳۹۔ آن اُوے اُواں نا ہیک مخال وی خُݨائی کہ اندھو اندھے نا مارگ ݙخل خگئی؟ کی او ٻنہئیں کھݙ میں کونی کھرے؟
40
۴۰۔شاگرد آپرے اُستاد خاں موٹا کونی ہَتا۔ پر ہر ہیک جݙے اُوے آݪیکر کرخے تو آپ رے اُستاد آݪی کر ہُوخے رو۔
41
۴۱۔ تُوں اُوے کٹر نا کیاں جووی جکو تاجے بھائی ری آنکھ میں ہے۔ آن اوے پنجر (بݪہے) نا کونی جوتی جکو تاجی آنکھ میں ہے؟
42
۴۲۔پچھے کِکر توں آپرے بھائی نا کہہ خگئیں کے بھائی ابھیج کٹر جکو تاجی آنکھ میں ہے کاڈھاں رو۔ جݙے کہ تُو اُوے پنجر (بݪھے) نا کونی جوتو جکو تاجی آنکھ میں ہے۔ اے ریا کار پہلی پنجر نا آپری آنکھ میں خاں کاڈھ پچہے کٹر نا جکو تاجے بھائی ری آنکھ میں ہے بھلی طرح جو رو کاڈھ خگیخ۔
43
۴۳۔ کیانکہ کوئی بھلو بݨ کونی جکو گندو میووہ ݙے آن نی کوئی گندو بݨ جکو بھلو میووہ ݙے۔
44
۴۴۔پر ہر ہیک بݨ آپرے میوے خاں اوݪکھیو جاوے۔ ایئے خارُو منکھ کانٹا آݪے کھیجڑیاں خاں انجیر کونی توڑتا آن نی جھنگلی ٻورڑی خاں انگور۔
45
۴۵۔بھلو ماݨخ آپرے دل رے بھلے خزانے خاں بھلے چیزاں کاڈھئی آن بُرا منکھ بُرے خزانے خاں بُرے چیزان ٻاہر لے آوی۔ کیانکہ جکے خاں من بھریوڑو ہے او جی ماہنݙے تے آوی۔
46
۴۶۔ آن تھیں مناں کیاں اِیشوَر اِیشوَر کہئی آن مانجے وچن تے عمل کونی کرتا۔
47
۴۷۔ جکو کوئی مھیں کڈھیا آوی آن مانجے باتاں خُݨ رے اُواں تے عمل کرئی۔ ہُوں تھاناں کہیں کہ او کے جیہڑو ہے۔
48
۴۸۔او اُوے منکھ آݪی کار ہے جکے آپرو گھر ٹھاہتے ہوئے آئیرو اُونݙو کھوتت تو پک تے آئیرو راکھیو جݙے جانکھ آن ٻوڈہ آئی آن اُوے گھر خاں ٹکرایو پر اُوے لوݙ کونی خگی۔ کیانکے او بھلو ٹھایوڑو ہَتو۔
49
۴۹۔ پر جکے خُݨیو آن عمل نی کریو او اُوے ماݨخ آݪی کر ہے جکے گھر نا بغیر ائیرے خاں ٹھایو آن جانکھ اُوے خاں ٹکرائی پچھے او بیگو کھریو آن او گھر گندی طرح برباد تھیو۔