1
۱۔ اوئے خاں بعد پرمیشور ٻہتر ٻجا مقرر کریا آن اُواں نا ٻے ٻے کر ان ہر شہر آن گاں ݙخا بئیر کریا جیتھ او آپ جاݨتو ہتو۔
2
۲۔ان اواں نا کیہتو کہ فصل تو گھݨی ہے پݨ مزدور تھوڑا ہے۔ ایئے خارُو فصل رے مالک ری منت کرو کہ آپری فصل باڈھݨ خارُو مزدور بئیر کر ݙے۔
3
۳۔ جووہ ہُوں تھاناں جاں نہاراں رے مئیں بئیر کریں۔
4
۴۔نی ٻٹووہ لے جاؤ۔ نی تھیلی نی جُتی آن مارگ میں کئی نا وی سلام نی کرو۔
5
۵۔ آن جکے گھر میں تھاں جاؤ پیلی کہو کہ ایئے گھر تے سلامتی ہوئے۔
6
۶۔جے سلامتی رو فرزند اوتھ ہویو تو تھانری سلامتی اُوئے تے رہخے نی تو تھاں تے پاچھی بݪ آخے۔
7
۷۔آن اُوے گھر میں رہو۔ آن جکو کجھ اواں کڈھے ہوے کھاؤ آن پیو کیانکہ مزدور آپری مزدوری رو حق دار ہے۔ گھر گھر نی پھرو۔
8
۸۔ آن جکے وی شہر میں جاؤ۔ آن جیتھ تھاناں قبول کریو جاوے تو جکو کجھ تھانرے آگے راکھیو جاوے کھاؤ۔
9
۹۔آن اوتھ رے بیماراں نا شفا ݙو آن اُواں نا کہو خُدا ری بادشاہی تھانرے نیڑی آ پُگی ہے۔
10
۱۰۔ پݨ جکے کئی شہر میں تھاں جاؤ جیتھ تھاناں قبول نی کریو جاوے اوتھ رے چوکاں ماتھے جان کہو کہ۔
11
۱۱۔مھاں ایئے دھوڑ نا وی جکو تھانرے شہر خاں مھانرے پگان تے پڑی ہے تھاں تے جھاڑ ݙئیں۔ پݨ ایہ جاݨ لو کہ اِیشور ری بادشاہی نیڑی آ پُگی ہے۔
12
۱۲۔ہوں تھاناں کہیں کہ سدوم رو حال اُوے شہر خاں گھݨو ٻہوݨ آݪو ہوخے۔
13
۱۳۔ اَے کورزین تھیں ماتھے افسوس اے بیت صیدا تھیں ماتھے افسوس کیانکہ ایہ معجزہ جکو تھاناں بتایا گیا جے صور آن صیدون میں بتایا جاونت تو او ٹاٹ اوڈھ ان مٹی میں ٻیخ توٻاں کرنت۔
14
۱۴۔صور آن صیدون رو حال عدالت رے ݙن تھانری نسبت گھݨو برداشت رے قابل ہوخے۔
15
۱۵۔آن اے کُفر نحوم ۔ کی تو آسمان تک بُلند کریو جائیخ؟ تو عالمِ اسفل میں اُتریخ۔
16
۱۶۔ جکو تھاری خݨئی او مھاری خُݨئی آن جکو تھاناں نا کوئی چیز کونی جاݨتو او مھنا کوئی چیز کونی جاݨتو۔ جکے مھنا بئیر کریو ہے
17
۱۷۔ آن او ٻہتر خوش ہو ان پاچھا آیا آن کہوݨ لاگا۔ اے پرمیشور تھارے ناں خاں بھونت وی مھانرے تاٻے میں ہے۔
18
۱۸۔جݙے اُوے اُواں نا کہیو۔ مھیں شیطان نا بجلی آݪی کار آخمان خاں کھرتے ݙٹھو ہے۔
19
۱۹۔جووہ ہُوں تھاناں نانگاں آن بِچھواں ناں لتاڑݨ آن دخمݨ ری خاری قُدرت تے اِختیار ݙنو ہے۔ آن تھانا کئی چیز خاں نقصان کونی ہوے۔
20
۲۰۔
پݨ ایئے خاں راجی نی ہووہ کہ بھُونت تھانرے تاٻے میں ہے۔ بلکہ ایئے خاں راجی ہووہ کہ تھانرا ناں آخمان تے لکھیوڑا ہے۔
21
۲۱۔ اُوے گھڑی او پویتر آتما میں راجی ہویو آن کہیو۔ اے پِتا آخمان ان دھرتی رے پرمیشور ہُوں تھارو شُکر کرئیں۔ کہ تو ایہ باتاں خیاݨاں آن عقلمنداں خاں لُکایے۔ آن چھوٹاں تے ظاہر کریے۔ ہاں اے پِتا کیانکہ ایاں جی تھاناں پسند ہے۔
22
۲۲۔مھارے پِتا خاں خارو کجھ مناں ݙنو گیو ہے۔ کوئی کونی جاݨتو ݙیکرو کݨ ہے خِدوائے پتا رے آن پِتا کݨ ہے۔ خوائے ݙیکرے رے۔ آن اوے منکھ تے جکے تے ݙیکرو ظاہر کرݨ چاہوے۔
23
۲۳۔ آن آپرے چیلاں ݙخا توجہ کر آن خاص کر اُواں نا کہیو۔ دھن ہے او آنکھے جکو ایہ جووی جاں جکاں نا تھیں جووی۔
24
۲۴۔کیانکہ ہُوں تھاں نا خچی کہیں کہ گھݨے نبیاں آن بادشاہواں وی چاہیو کہ جکو تھیں جووی او جووے پݨ نی جو خگیا۔ جکو تھیں خُݨئی ووا خݨے پݨ نی خݨ خگیا۔
25
۲۵۔ آن جووہ ہیک دھرمی گرو اُٹھیو آن ایہ کہ آن اُوے ری آزمائش کری۔ کہ اے اُستاد ہُوں کی کراں جو امر جیون رو وارث بݨا۔
26
۲۶۔اُوے اوے نا کہیو کی شریعت میں کی لکھیوڑو ہے تو کِکر پڑھئیں۔
27
۲۷۔اُوئے بݪتی ݙے کہیو تو پرمیشور آپرے ایشور نا خارے من آن آپری خاری جان خاں آن آپری خاری طاقت خاں آن آپری خاری عقل خاں آن آپرے ہمسائے نا آپ آݪیکار پریم راکھ۔
28
۲۸۔اُوئے اُوئے نا کہیو تھیں ٹھیک بݪتی ݙنی۔ اے جی کر تو تُو جئییخ۔
29
۲۹۔ پݨ اُوے چاہیو کہ آپرے آپ نا خیاݨو بتاوے۔ پربھو یسوع نا کہیو کہ مھارو ہمسایو کݨ ہے۔
30
۳۰۔ایئے تے پربھو یسوع کہیو کہ ہیک شخص یروشلم خاں یریحو ݙخا جاوتو ووہ کہ ڈاکواں میں جا پڑیو جکا اُوئے نا لٹ رو مار مار آن ادھ مووہ چھوڑ بُوہا گیا۔
31
۳۱۔ اچانک ہیک کاہن اوئے مارگ خاں ٹپیو آن اُوے نا جویو آن کنی کر بُوہو گیو۔
32
۳۲۔ایاں جی ہیک لاوی وی اُوے نا اوے جگہ آ جویو آن کنی کر بُوہو گیو۔
33
۳۳۔پچھے بھݪے ہیک سامری سفر کرتے کرتے اوتھ آیو آن اُوے نا جو ترخ کھادو۔
34
۳۴۔آن کڈھے جا اُوے رے زخماں ماتھے تیل آن مے لگا ٻاندھیا۔ آن آپرے جانور تے ٻیخاݨ آن مسافر خانے میں لے گیو۔ آن ایے ری شیوا کری۔
35
۳۵۔آن ٻجے ݙن ٻے دینار کاڈھ بھٹیارے نا ݙنا آن کہیو۔ کہ ایئے ری کھٻر گیری کر آن جے کئیں گھݨو خرچ ہوے ہُوں بھݪے آن تھنا ݙئیخ۔
36
۳۶۔ہمے ایاں تیناں میں خاں اُوے رو جکو ڈاکوؤاں میں پڑیو تو کے نا ہمسایو خمجھئی۔
37
۳۷۔اُوے کہیو اوے نا جکے اُوے تے رحم کریو۔ جݙے پربھُو یسوع اُوے نا کہیو جا تو وی ایاں جی کر۔
38
۳۸۔ آن جݙے او جاوتا ووا تو ہیکے گاں میں گیو آن مارتھا ناں ری ہیک لُگائی آپرے گھرے دعوت ݙنی۔
39
۳۹۔آن مریم ناں ری ہیک اُوے ری ٻہن ہتی۔ آن او وی پرمیشور رے پگاں میں ٻیخ اُوے رو کلام خُݨتی ہَتی۔
40
۴۰۔ پݨ مارتھا کام کرݨ ری پریشانی میں ہَتی او ابھیج کہوݨ لاگی۔ کہ اے پرمیشور تو خیال کونی کرتو مھاری ٻہن خدمت کرݨ خارُو ہیکھلی چھوڑ ݙنی ہے۔
41
۴۱۔پݨ پرمیشور بݪتی ݙنی مارتھا اے مارتھا تُو گھݨے باتاں میں فکر مند ہے۔ پݨ ہیک جی بات چاہیجئی۔
42
۴۲۔ہمیں مریم بھلو حخو چگ لنھو جکو اُوئے خاں کھوخیو کونی جاوے۔