باب۱
1
۱۔ہوں یہوداہ جکو یسوع مسیح رو چیلو اَن یعقوب رو بھائی ہے۔ اُوئاں ہیلو کریوڑاں رے خارو،اوج ایشور تھاں خاں پریم راکھئی اَن یسوع مسیح ری خںبھاݪ میں راکھئی۔
2
۲۔تھاں ماتھے دیا، خُکھ اَن پریم تمام گھݨو ہووتو رہ۔
3
۳۔ اَے پریمی بھائیاں جکے گھڑی ہوں تھاناں اُوئے مگتی رے بارے میں لِکھݨ ری گھݨی کوشش کرتو وو۔ جکے میں مھاں خارا بھیݪا ہاں تو میں تھاناں اے نصحیت لِکھݨ ضروری خمجھیو کہ تھیں اُوئے بھروسے خارو گھݨی کوشش کرو۔ جکو پویتر منکھاں نا ہیک دفہ ݙنھو گیو ہَتو۔
4
۴۔کئیں ایَہڑا مِنکھ تھاں مئیں بَڑ گیا را جکاں ری سزا رے بارے میں پُراݨے زمانے میں پہل خاں لِکھیوڑو ہے۔ اُوئاں رو کوئی دھَرم کونی اَن او اِیشوَر ری کِرپا رے بہانے بُرو کام کرئی۔ او یسوع مسیح نا کونی منتا جکو اَپݨو ہیکج مالک اَن پربھُو ہے۔
5
۵۔بھَلائیں تھاں نا خارے باتاں ری ٹھاء ہے تو وی ہُوں یاد کراوݨ چاہوئیں کہ پرمیشوَر ہیک قوم نا مِصر مُلکھ خاں کاڈھ را اُوئاں نا بَچا لِنا پݨ پَچھے اُوئاں نا مار ݙِنا جکو اُوئے تے وشواس کونی راکھتا ہَتا۔
6
۶۔اِیئان٘ج جکو فرشتا آپرے اختیار میں نی رہیا اَن آپری خاص جگہا نا چھوڑ ݙِنو، اِیشوَر اُوئاں نا ہمیشہ رے خان٘کݪاں خاں ٻان٘دھ را موٹے ݙن یعنی عدالت رے ݙن تک اَندھارے میں راکھیوڑا ہے۔
7
۷۔اِیئان٘ج سدُوم، عمُورہ اَن اُوئے رے آخے پاخے آݪے شہراں را مِنکھ بُرو کام کرݨ لاگا اِتری تک کہ مِنکھ مِنکھاں خاں بُرو کام کرݨ لاگا۔ ہمے او ہمیشہ رے باخݙے ری سزا میں ہے اَن خاراں رے خارُو مِثال بݨ گیا را۔
8
۸۔اِیئان٘ج ایہ وی جکاں رو کوئی دھَرم کونی، آپرے خِپناں رے لارے لاگ را اُوئاں آݪِیکار آپرے ݙِیل نا پلیت کرئی، اِیشوَر رے اختیار نا کئیں کونی خَمجھتا اَن پرتاٻ آݪے ہستیاں رے خِلاف باتاں کرئی۔
9
۹۔اِیئان٘ج ایہ وی جکاں رو کوئی دھَرم کونی، آپرے خِپناں رے لارے لاگ را اُوئاں آݪِیکار آپرے ݙِیل نا پلیت کرئی، اِیشوَر رے اختیار نا کئیں کونی خَمجھتا اَن پرتاٻ آݪے ہستیاں رے خِلاف باتاں کرئی۔
10
۱۰۔جَݙے فرشتاں رو سردار مِیکائیل، مُوسیٰ ری لاش رے بارے میں شیطان خاں تکرار کرتو وو، تو اُوئے ری اِتری ہمت کونی ہوئی کہ او شیطان رے خِلاف بات کرݨ رو فیصلو کرے پݨ اُوئے چھَڑو اِترو کَہیو کہ تھناں پرمیشوَر پُوچھے۔
11
۱۱۔اِیئاں ماتھے افسوس، کیان٘کے ایہ قائن رے مارگ ماتھے بُوہا اَن پئیخے ری لالچ میں بِلعام آݪِیکار بھَٹک گیا اَن قورح آݪِیکار باغی ہو را برباد ہو گیا۔
12
۱۲۔ایہ پاݨی میں لُکیوڑے پتھراں آݪِیکار ہے جکو نُقصان ݙئی۔ ایہ پربھُو یسوع رے پریم ری یادگیری رے دعوتاں میں تھاں بھیݪا کھاوئی پِیئی اَن اِیئاں نا چھَڑو آپرو پیٹ بھرݨ ری ٹھاء ہے۔ ایہ اُوئے جھُڑ آݪِیکار ہے جکو بائرے خاں اُݙتو پھِرئی پݨ بَرختو کونی۔ ایہ پتا جھَڑیوڑے بݨاں آݪِیکار ہے جکو بھَلے مَر گیا را یعنی پھل کونی ݙیوتا اَن جَڑ وی پٹیجیوڑی ہے۔
13
۱۳۔ایہ سمندر رے بے قاٻُو چھَلاں آݪِیکار ہے جکو آپری بے حیائی ری جھَگی اُچھاݪئی۔ ایہ روݪ تاراں آݪِیکار ہے جکاں رے خارُو ہمیشہ رو اَندھارو راکھیوڑو ہے۔
14
۱۴۔اِیئاں رے بارے میں حَنُوک جکو آدم ری خاتویں پیڑھی خاں ہَتو، پہل خُݨایو ہَتو کہ یاد راکھو، پربھُو آپرے لَکھاں پویتر فرشتاں بھیݪو آخے۔
15
۱۵۔او اِیئے خارُو آخے کہ خاراں رو انصاف کرے اَن اُوئاں ری سزا رو فیصلو کرےجکاں اِیشوَر رے خِلاف کام کریا ہے، جکو اِیشوَر نا کونی منتا، اَن جکاں پاپیاں اُوئے رے خِلاف باتاں کَہے ہے۔
16
۱۶۔ایہ کُرکتا اَن شکایت کرتا رہئی اَن آپری بُری مرضی ماتھے بَہی۔ ایہ آپرے بارے میں اہن٘کار کرئی اَن آپرے فائدے رے خارُو ٻِجاں ری خُوشامد کرئی۔
17
۱۷۔اَے پریمی بھائیاں، اُوئاں باتاں نا یاد راکھو جکو اَپݨے پربھُو، یسوع مسیح رے سنتاں پہل خان٘ج خُݨا ݙِنے ہَتے کہ،
18
۱۸۔”آخری زمانے میں کئیں ہاخا کرݨ آݪا ہوخے جکو ݙِیل ری بُری مرضی ماتھے بہخے۔“
19
۱۹۔ایہ او مِنکھ ہے جکو تھاں مئیں پھُوٹ گھاتئی اَن دُنیا رے مِنکھاں آݪِیکار خوچئی اَن جکاں کَڈھے اِیشوَر ری آتما کونی۔
20
۲۰۔ پݨ اَے پریمی بھائیاں، تھے آپرے پویتر وشواس میں ہیکے ٻِجے نا بَدھاؤ اَن پویتر آتما میں پراتھنا کرتا
21
۲۱۔آپرے آپ نا اِیشوَر رے پریم میں قائم راکھو اَن اِیئے اِنتظار میں رہو کہ اَپݨو پربھُو، یسوع مسیح آپری دَیا خاں آپاں نا اَمر جِیون ݙے۔
22
۲۲۔جکاں رو وشواس کمزور ہے، اُوئاں ماتھے دَیا کر ری اُوئاں نا خَمجھاؤ۔
23
۲۳۔جکو نرگ ری باخݙے ݙِخا جائی وا، اُوئاں نا بَچاوݨ رے خارُو چھِک کاڈھو اَن جکو بُرائی میں پھاتھوڑا ہے اُوئاں ماتھے دَیا کرو پݨ ٻِیہی خاں، اِتری تک کہ اُوئاں رے گابھاں خاں وی نفرت کرو جکو ݙِیل رے کاماں ری وجہ خاں پلیت ہو گیا را۔
24
۲۴۔ ہمے اِیشوَر جکو تھاں نا بھَٹکݨ خاں بَچا خَگئی اَن آپرے پرتاٻ میں پُوری خُوشی خاں بے عیب بَݨا رو اَبھجاݨ خَگئی
25
۲۵۔اَن اَپݨے پربھُو، یسوع مسیح رے وسیلے خاں آپاں نا مُگتی ݙئی۔ اُوئے ہیکے اِیشوَر ری شان، مہما، بادشاہی اَن اختیار جاں سنسار ری شرُوعات خاں ہَتو، ہیݨا ہووے اَن ہمیشہ تک رہ۔ اِیئان٘ج ہووے۔