1
۱۔ پچھے یسوع گلیل میں پھرتو رہیو کیانکے او یہودیہ میں پھرݨ کونی چاہتو ہَتو۔ ایئے رے خارو کہ یہودی اُوئے نا مارݨ رے لارے ہَتا۔
2
۲۔آن یہودیاں ری عید خیام نیڑی آئی۔
3
۳۔ پچھے اُوئے رے بھائیاں اُوئے نا کہیو تُوں ایتھ خاں جا رو اَن یہودیہ میں جا تاکہ تھارا چیلاں وی اُوئے کاماں نا جووئے جو تُو کرتو رئی۔
4
۴۔کیانکہ ایڑہو کوئی کونی جکو مشہور نی ہو وݨ پسند کرے۔ اَن لُک تے کام کرے۔
5
۵۔کیانکہ اُوئے را بھائی وی اُوئے تے ایمان کونی راکھتا ہَتا۔
6
۶۔ پچھے یسوع اُوئاں نا کہیو کہ ہالی مھاری بݪہ کونی آئی۔پݨ تھارے خارو ہمیشہ وقت ہے۔
7
۷۔دنیا تھاں خاں بیر کونی راکھ خگتی پݨ مھیں خاں بیر راکھئی کیانکہ ہوں اُوئاں نا گواہی ݙائی کہ تھارا کام بھلا کونی۔
8
۸۔ تھاں ایئے عید تے جاؤ پݨ ہوں ہالی ایئے عید تے کونی جاواں کیانکہ مھاری گھڑی اجݨ کونی آئی۔
9
۹۔ایہ باتاں اُوئاں نا کہہ تے او گلیل میں جی رہیو۔
10
۱۰۔پݨ جݙےاُوئے را بھائی عید تے بوہا گیا۔تو او وی گیو۔زاہری کونی پݨ لک میں۔
11
۱۱۔پچھے یہودی عید میں ایہ کہہ تے اُوئے نا لابھݨ لاگا کہ او کِتھ ہے؟
12
۱۲۔ اَن لوک آپت میں لُک لُک تے باتاں کرتا ہَتا۔ کہینک کہتا وا کہ او نیک ہے اَن کہینک کہتا وا کونی بلکہ اُو لوکاں نا گمراہ کرئی وو۔
13
۱۳۔پݨ یہودیاں ری ٻہی ری وجہ خاں اُوئے رے بارے میں کوئی کھل تے بات کونی کرتا ہَتا۔
14
۱۴۔ اَن جݙے عید رو آدھو ݙن لنگھ گیو تو یسوع ہیکل میں آ تے پرچار کرݨ لاگو۔
15
۱۵۔پچھے یہودیاں حیران ہووݨ لاگا کہ ایئے نا شاستر پڑھے بغیر کیکر ٹھاہ لاگ جاوئے۔
16
۱۶۔پچھے یسوع اُوئاں نا بݪتی ݙنی کہ مھاری تعلیم مھاری کونی بلکہ اُوئے ری ہے۔ جکے مھناں میلیو ہے۔
17
۱۷۔ جے کݙے کوئی اُوئے رے مرضی تے بہݨ چاہوئی تو اُوئے نا ٹھاہ لاگ جاخے کہ ایہ تعلیم ایشور ری ہے جاں ہوں آپرے آپ جی ٻولتو رئی۔
18
۱۸۔جکو آپری طرف خاں ٻولتو رئی او آپری عزت چاہوئی۔ پݨ جکو آپرے میلݨ آݪے ری عزت چاہوئی۔ اُو خچو ہے اَن اُوئے میں کُوڑ کونی۔
19
۱۹۔ کی موسٰی تھاناں شریعت کونی ݙنی؟ تو وی تھاں میں خاں شریعت تے کہینک عمل کونی کرتا۔
20
۲۰۔تھاں کیا مھنے مارݨ ری فکر میں ہو؟ لوکاں بݪتی ݙنی تھیں میں تو آتما ہے۔ کُݨ تھنے مارݨ چاہوئی۔
21
۲۱۔ یسوع بݪتی میں اُوئاں نا کہݨ لاگو میں ہیک کام کریو اَن تھاں خارا حیران تھیا را۔
22
۲۲۔جو وو موسٰی تھاناں ختنے رو حکم ݙنو ہے۔ (اصل میں او موسٰی ری طرف خاں کونی بلکہ ٻاپ ݙاݙے خاں ہوتو آیو ہے) اَن تھاں سبت آݪے ݙن ختنو کرتا رئی۔
23
۲۳۔ جے سبت آݪے ݙن منکھ رو ختنو کریو جاوئی۔ تاکہ موسٰی ری شریعت ری توہین نی ہو وے۔ تو کی تھاں ایئے رے کرے مھیں خاں ناراض ہو۔ مھیں سبت آݪے ݙن ہیکے منکھ نا بھݪا کریو۔
24
۲۴۔جاں تھاناں ݙخیجئی وو اُوئاں فیصلو نی کرو بلکہ انصاف خاں فیصلو کرو۔
25
۲۵۔ پچھے کہینک یروشلیمی کہݨ لاگا۔ کہ کی ایہ اُو کونی جکے نا مارݨ رے خارو فکر کرئی وا۔
26
۲۶۔اَن جو وو اُو تو علان کرئی وو اَن اُو ایئے نا کئیں کونی کہتا۔جاں بݪے سرداراں وی خچ منیو رو کہ المسیح ایہ جی ہے۔
27
۲۷۔پݨ ایئے نا تو مھاں اݪکھئی کہ ایہ کتھ رو ہے پݨ جݙے المسیح آخے تو کئی نا وی ٹھا کونی ہووئے کہ او کتھ خاں ہے۔
28
۲۸۔پچھے یسوع ہیکل میں پرچار کرتو زور خاں کہݨ لاگو کہ تھاں مھنے اُݪکھئی اَن ایہ وی اݪکھئی کہ ہوں کتھ خاں ہا اَن ہوں آپ خاں کونی آیو پݨ جکے مھنے میلیو ہے او خچو ہے اُوئے نا تھاں کونی الکھتا۔
29
۲۹۔ہوں اُوئے نا اݪکھئی ایئے رے کرے کہ ہوں اُوئے خاں ہا اَن اُوئے جی مھناں میلیو ہے۔
30
۳۰۔ ایئے تے اُو اُوئے نا جھالݨ لاگا پݨ کئی وی اُوئے نا ہاتھ نی گھاتیو کیا کہ اُوئے ری بݪہ اجݨ کونی آئی ہَتی۔
31
۳۱۔اَن ٹوݪے میں خاں گھݨائی اُوئے تے ایمان لے آیا۔ اَن اُو کہتا ہَتا کہ المسیح جݙے آخے تو کی ایئے خاں وی گھݨاں پرچا ݙخلخے جکو ایئے ݙخلیا ہے۔
32
۳۲۔فریسیاں ٹوݪے نا خُݨ تے چوری چوری اُوئے رے بارے میں باتاں کرتا ہَتا ایئے خارو سردار کاہناں اَن فریسیاں آپرا منکھ بہیر کریا تاکہ یسوع نا جھلاوئے۔
33
۳۳۔ پچھے یسوع کہیو ہوںٻجی وی تھوڑی دیر تھاں کڈھے ہا پچھے اُوئے کڈھے جائیخ جکے مھناں میلیو ہے۔
34
۳۴۔تھاں مھنے لابھخو پݨ لابھ کونی خگو۔ اَن جتھ ہوں ہا تھاں آ کونی خگتا۔
35
۳۵۔پچھے یہودیاں آپت میں کہیو ایہ کتھ جاخے جو آپاں ایئے نا کونی لابھ خگاں کی ایہ اُوئاں کڈھے جاخے جکو غیر قوماں میں کھوار ہے۔ اَن غیر قوماں نا تعلیم ݙخے۔
36
۳۶۔ایہ کی بات ہے جکو ایئے کہئی ری؟ کہ تھاں مھنے لابھخو اَن جو کونی خگو۔ اَن ایہ کہ جتھ ہوں ہا اُتھ تھاں آ کونی خگتا۔
37
۳۷۔ پچھے عید رے آخری ݙن جکو خاص ݙن ہے۔ یسوع اُٹھی ابھیجیو۔ اَن زور خاں کہیو کہ جے کوئی ترخو ہے تو مھیں کڈھے آوئے اَن پیئی۔
38
۳۸۔جکو مھیں تے ایمان لے آوئی جاں لِکھت کہئی ”اُوئے رے مہی خاں جیتے پاݨی رے ندے بہݨ لاگ جاخے۔“
39
۳۹۔اُوئے ایہ اُوئے روح رے بارے میں کہیو جکے نا او جکو اُوئے تے ایمان لے آخے میلنت۔ کیانکہ روح ہجے تک کونی ݙنو گیو ہَتو۔ ایئے رے خارو کہ یسوع ہجے تک آپرے جلال تک کونی پُگو ہَتو۔
40
۴۰۔ آن ٹوݪے میں خاں کہینک اُوئے رے باتاں خُݨ تے کہیو خچی مچی ایہ البنی ہے۔
41
۴۱۔ٻیجاں کہیو کہ ایہ المسیح ہے ۔ پݨ کہیکاں کہیو المسیح گلیل خاں آخے؟
42
۴۲۔کی لِکھت کونی کہتی کہ المسیح داود ری نخل خاں اَن بیت لحم رے گاں خاں آخے جتھ داود رہَتو ہَتو۔
43
۴۳۔ ایئے رے کرے ٹوݪے میں اُوئے رے بارے میں اختلاف ہویو۔
44
۴۴۔اَن اُوئاں میں خاں کہینک اُوئے نا جھلاوݨ ری خلاح میں ہَتا۔ پݨ کئی وی اُوئے میں ہاتھ نی گاتیو۔
45
۴۵۔پچھے اُو منکھ جکاں نا سردار کاہناں اَن فریسیاں میلیا ہَتا اُوئاں کڈھے پاچھا آیا اَن اُوئاں کہیو کہ تھاں اُوئے نا کیاں نی لے آیا۔
46
۴۶۔اُوئاں کہیو کہ کئی منکھ وی ایڑھو کام کونی کریو جہڑا کام اُو کرئی۔
47
۴۷۔ پچھے فریسیاں کہیو کہ کی تھاں وی تھڑ گیا را ؟
48
۴۸۔کی سرداراں میں خاں جاں فریسیاں میں خاں کوئی اُوئے تے ایمان لے آیو ہے؟
49
۴۹۔پݨ ایہ عوام جکاں نا شریعت ری کونی ٹھاہ لانتی ہے۔
50
۵۰۔ پݨ نیکدیمس جکو پہل اُوئے کڈھے آیو ہَتو اَن اُوئاں میں خاں جی ہَتو اُوئاں نا کہیو۔
51
۵۱۔کی آپاں آݪی شریعت کہئی نا وی ڈوہی بݨاوئی ایئے خاں پہل کہ اُوئے ری خُݨ نی لے۔ ٹھاہ نی کرے کہ او کی کرئی۔
52
۵۲۔اُوئاں بݪتی ݙنی کہ کی تو وی گلیلی ہے۔ لابھ اَن جو کہ گلیل میں خاں کوئی نبی کونی تھی خگتو۔
53
۵۳۔پچھے ہر کوئی آپرے آپرے گھرے بوہو گیو۔