1
۱۔ فریسیاں میں ہیک منکھ نیکدیمس ناں رو یہودیاں رو سردار ہَتو۔
2
۲۔او رات رو اُوئے کڈھیا آیو آن اوئے نا کہیو کہ اے استاد مھیں جاݨئی کہ تو ایشور ری طرف خاں استاد تھی آیو ہے۔ کیانکہ جکو تو نخان ݙخلئِ او کوئی کونی ݙخݪ خگتو۔ جتری تک ایشور اُوئے بھیݪو نی ہووئے۔
3
۳۔یسوع اُوئے نا بݪتی میں کہیو۔ ہوں تھاں نا خچی خچی کہیں کہ جتری تک کوئی نئے خرے خان پیدا نی تھیوئے ایشور ری راجائی نا جو کونی خگتو۔
4
۴۔نیکدیمس کہیو کہ منکھ جݙے بوڈھو تھی جاوئے رو تو بݪے کیکر پیدا تھی خگئی۔ کی او بݪے آپری ماں رے پیٹ میں جا رو پیدا تھی خگئی۔
5
۵۔ یسوع بݪتی ݙنی آن کہیو کہ ہوں تنئے خچی خچی کہیں کہ جتری تک کوئی پاݨی آن پویتر آتما خاں پیدا نی ہووئے او ایشور ری رجائی میں داخل کونی ہو خگتو۔
6
۶۔جکو جسم خاں پیدا ہویو او جسم ہے اَن جکو پوتر آتما خاں جنم لیو او پوتر آتما ہے۔
7
۷۔ پریشان نی تھی کہ میں تنئے کہیو نوئے خرے خاں پیدا ہوݨ ضروری ہے۔
8
۸۔ہوا جینکی چاہوئی اونکی جاوئی توں اُوئے ری آواز خُݨئے اَن کونی خمجھتو کہ او کیتھ خاں آوئی آن کݨھئے جاوئی۔
9
۹۔ نیکدیمس بݪتی ݙنی اَن کہیو کہ ایے باتاں کیکر تھی خگئی؟
10
۱۰۔یسوع بݪتی ݙنی اَن اُوئے نا کہیو کہ کی توں بنی اسرائیل رو استاد ہے۔ آن ایے باتاں کونی جاݨتو۔
11
۱۱۔ہوں تناں خچی خچی کہیں کہ جکو کجھ مھاں جاݨجیئی او کہجیئں۔ آن جکے نا مھاں ݙٹھو ہا اوئے ری گواہی ݙئجیئں۔اَن تھیئں مھاری گواہی کونی منتا۔
12
۱۲۔ جݙے میئں تھاناں دھرتی رے باتاں کہیئے آن تھاں اعتبار کونی کریو۔ پچھے جے کݙے ہوں تھاناں آسمان رے باتاں کہاں تو تھیئں کیکر یقین کرخو۔
13
۱۳۔کوئی آسمان تے کونی چڑھیو خوائے اُوئے رے جکو آسمان خاں اُتریو ہے یعنی ابن انسان جکو آسمان میں ہے۔
14
۱۴۔ آن جکر موسٰی باخینگ نا رݨ پٹ میں اونچو کریو۔ ائیاں جی ابن انسان اونچو کریو جاخے۔
15
۱۵۔تاکہ جکو کوئی اُوئے تے ایمان لے آخے او مرے کونی پݨ امر جیون پاخے۔
16
۱۶۔ کیانکہ ایشور جگت خاں ایڑھو پریم کریو کہ اُوئے آپرو ہیک جی ݙکرو ݙے ݙنو تاکہ جکو کوئی اُوئے تے ایمان راکھخے او مرے کونی پݨ امر جیون پاخے۔
17
۱۷۔کیانکے ایشور ݙیکرے نا جگت میں ایئے خارو کونی بہیر کریو کہ جگت تے الزام لگاوئےبلکہ ایئے خارو بہیر کریو جگت اُوئے ری وجہ خاں چھٹکارو پاوئے۔
18
۱۸۔جکو اُوئے تے ایمان راکھخے اُوئے تے الزام کونی ݙنو جاوئےپݨ جکو اُوئے تے ایمان نی راکھخے اوئے تے الزام لاگ گیو۔ کیانکہ اُوئے ایشور رے ہیک جی ݙیکرے رے ناں تے ایمان کونی لے آیو۔
19
۱۹۔ آن الزام ایہ ہے کہ نور جگت میں آیو اَن منکھاں اندھارے نا نور خاں گھݨو بھایو۔ کیانکے اُوئاں را کام بُرا ہَتا۔
20
۲۰۔کیانکہ جکو کوئی بُرائی کرئی او نور خاں دشمنی راکھئی۔ اَن نور رے نیڑو کونی آتو۔ اَن ایئاں نی ہوئے کہ اُوئاں را کام خامھے آوئے را۔
21
۲۱۔پݨ او جکو خچائی تے ایمان راکھئی نور رے نیڑو آوئی تاکہ اُوئاں را کام جوئجݨ میں آوئے کیانکہ او ایشور میں کیا گیا ہے۔
22
۲۲۔ اَن ائیاں باتاں خان پچھے یسوع اَن اُوئے را چیلا یہودیا ری دھرتی تے آیا۔ اَن اُو اُتھ اُوئاں بھیلو جی رہیو۔
23
۲۳۔آن اُوئان نا پویتر شنان ݙتو رہیو۔آن یوحنا وی شالیم رے نیڑو عینون میں پویتر شنان ݙتو رہیو کیانکہ اوتھ پاݨی تمام گھݨو ہَتو آن منکھ پویتر شنان لیوݨ آوتا ہَتا۔
24
۲۴۔کیانکہ یوحنا ایتری تاݨی ڈھکیجوڑو کونی ہَتو۔
25
۲۵۔ جݙے یوحنا رے چیلاں ری کہیے یہودی خاں پویتر شنان رے بارے میں تکرار ہویو۔
26
۲۶۔اَن اُوئاں یوحنا نا جا کہیو کہ اے استاد جکو اُردن رے پار تھاں بھیݪو ہَتو۔ آن جکے ری گواہی تھیں ݙنی ہَتی او پویتر شنان ݙئی آن خارا اُوئے کڈھے جاوئی وا۔
27
۲۷۔ یوحنا بݪتی ݙنی آن کہیو کہ کوئی منکھ کئیں کونی لے خگتو جتری تک کہ آسمان خاں نی ݙنو جاوئے۔
28
۲۸۔تھیں مھارا گواہ ہو کہ ہوں کہیئی وا کہ ہوں المسیح کونی پݨ ہوں اُوئے خاں پہل بہیر کریو گیو ہا۔
29
۲۹۔جکے رے بینݙݨی ہے او بینݙ ہے پݨ بینݙ رو دوست جکو ابھوڑو ہے اُوئے رئی خُݨئی بینݙ ری ٻولی خاں گھݨو راجی تھیئی۔ پݨ مھاری ایے خوشی پوری تھی گی ری۔
30
۳۰۔ضرور ہے کہ او بدھے آن ہوں گھٹاں۔
31
۳۱۔جکو اونچا خاں آوئی او خاراں خاں اونچو ہے۔ او جکو زمین خاں ہے او زمینی ہے اَن زمین رے باتاں کرئی۔ جکو آسمان خاں آوئی او خاراں خاں اونچو ہے۔
32
۳۲۔آن جکو کجھ اُوئے ݙٹھو اَن خُݨیو اُوئے ری گواہی ݙئی۔ آن جکو اُوئے ری گواہی قبول کونی کرتو
33
۳۳۔جکے اُوئے ری گواہی قبول کرئی اُوئے ٹھپو لگا چھوڑیو ہے کہ ایشور خچو ہے۔
34
۳۴۔ کیانکے جکے نا ایشور بہیر کریو ہے او ایشور رے باتاں کہخے کیانکہ او تول اَن آتماں کونی ݙتو۔
35
۳۵۔ٻاپ ݙیکرے نا پیار کرئی اَن اُوئے خارو کجھ اُوئے رے ہاتھ میں کر ݙنو رو۔
36
۳۶۔جکو ݙیکرے تے ایمان لے آوئی او امر جیون راکھئی آن جکو ݙیکرے تے ایمان نی راکھے او امر جیون نا کونی جووئے بلکہ اُوئے تے ایشور رو غضب رئی۔