1
۱۔ عید فسح خاں پہل یسوع نا ایہ ٹھا لاگی ہَتی کہ مھاری گھڑی آئی ری۔ کہ دنیا خاں پاچھو ٻاپ کڈھے جائیخ۔ تو آپرے اُوئے لوکاں خاں جاں ایئے دنیا میں پریم راکھتو او آخر تک پریم کرتو رئیخ۔
2
۲۔اَن شام ری ٻاٹی آݪی بݪہ جݙے شیطان یہوداہ بن شمعون اسکریوتی رے من میں ایہ بات راکھی کہ اُوئے نا جھلاوئے۔
3
۳۔یسوع نا ایہ ٹھا ہَتی کہ ٻاپ خارو کچھ اُوئے رے ہاتھ میں کر ݙنو رو۔ اَن ایہ کہ ہوں ایشور خاں نکݪیو ہا اَن ایشور کڈھے پاچھو جائی وو۔
4
۴۔اُو ٻاٹی خاں اُٹھی اَن گابھا اُتاریا اَن ہیک خوتی گابھو لے تے آپرے کڑیاں نا ٻاندھیو۔
5
۵۔اَن ایئے خاں پچھے ٹھیکر میں پاݨی لنھو اَن آپرے چیلاں را پگ دھویا اَن جکو خوتی گابھو کڑیاں نا ٻاندھیو ہَتو اُوئے خاں پگ آچھا کیا۔
6
۶۔پچھے اُو شمعون پطرس کڈھے آیو۔ اُوئے اُوئے نا کہیو اے ایشور کی تو مھارا پگ دھوئیخ؟
7
۷۔یسوع اُوئے نا بݪتی ݙنی کہ ہݨے جکو کچھ ہوں کرئی وو تنے کونی ٹھاہ پݨ پچھے تو خمجھئیخ رو۔
8
۸۔پطرس اُوئے نا کہیو تو آخر تک مھارا پگ کونی دھو خگے۔ یسوع بݪتی ݙنی کہ جے ہوں تھارا پگ نی دھویا تو تُوں مھیں بھیݪو کونی ہووئے۔
9
۹۔شمعون پطرس اُوئے نا کہیو اے ایشور مھارا پگ جی نی دھو بلکہ مھیں آݪو ماتھو وی دھو۔
10
۱۰۔ یسوع اُوئے نا کہیو او جکو جھیلیو اُوئے نا دھوݨ ری لورہ کونی بلکہ او پاک صاف ہے۔ تو وی پاک ہے پݨ خارا را خارا کونی۔
11
۱۱۔کیانکہ اُو آپرے جھلاوݨ آݪے نا جاݨئی ایئے خارو اُوئے کہیو کہ تھاں خارا پاک کونی۔
12
۱۲۔ جݙے اُو اُوئاں را پگ دھو لیا اَن گابھا پہر تے ٻیٹھو۔ تو اُوئے کہیو تھاناں ٹھا ہے کہ مھیں تھاں خاں کی کریو۔
13
۱۳۔تھاں مھنے اُستاد اَن ایشور کہئی۔ اَن ٹھیک کہیں کیا کہ ہوں ہاں۔
14
۱۴۔پݨ جݙے ہوں استاد اَن ایشور ہو تے تھارا پگ دھویا۔ تو تھاناں تے وی فرض ہے کہ تھیں وی ٻجا را پگھ دھویا کرو۔
15
۱۵۔ایئے رے خارو کہ مھیں تھاناں نمونو ݙنو ہا۔ تاکہ جاں میں تھاں خاں کریو تھیں وی ایئاں جی کریا۔
16
۱۶۔ ہوں تھاناں خچی خچی کہئی نوکر آپرے مالک خاں موٹو کونی ہوتو۔ اَن نی جی میلیوڑو آپرے میلݨ آݪے خاں موٹو ہوتو رئی۔
17
۱۷۔جے تھاں ایہ باتاں خمجھ اَن اُوئاں تے عمل کرخو تو تھیں مبارک ہوخو۔
18
۱۸۔ہوں تھاں خاراں رے خارو کونی کہتو۔ تھاناں مھیں چُگیا ہا اُوئاں نا ہوں اݪکھئی۔ پݨ ایہ ایئے رے خارو ہے کہ او لِکھیوڑو پورو ہویو کہ ”جکومھاری ٻاٹی کھاوئی اُو جی مھیں تے لت اُکھݨیں۔
19
۱۹۔ہمے ہوں اُوئے رے ہووݨ خاں پہل تھاناں خُݨاوئی وو کہ جکے گھڑی ایہ ہو جاوئے تو تھاں ایمان لے آیا۔ کہ ہوں اُو جی ہاں۔
20
۲۰۔ہوں تھاناں خچی خچی کہیں جکو مھارے میلیوڑے نا منیئی۔ اُو مھنے منیئی ۔ اَن جکو مھنے منیئی اُو مھارے میلیوڑے نا منیئی۔
21
۲۱۔ یسوع ایہ کہہ اَن روح میں گھٻرایو اَن گواہی ݙے تے ٻولیو۔ ہوں تھاناں خچی خچی کہئی کہ تھاں میں خاں ہیک مھنے جھلواخے۔
22
۲۲۔پچھے چیلاہیکے ٻجے نا جو اَن کہݨ لاگا کہ اُو کہیو ہے۔
23
۲۳۔ اَن اُوئے رے چیلاں میں خاں ہیک جکے نا یسوع پیار کرتو ہَتو۔ یسوع رے خامھو جھکیوڑو ہَتو۔
24
۲۴۔پݨ شمعون پطرس اُوئے نا کہیو اشارو کر اَن خُݨا کہ اُو کہیو ہے۔
25
۲۵۔ایئے رے خارو اُو یسوع رے چھاتی تے جھک اَن اُوئے نا کہیو اے پرمیشور اُو کُݨ ہے؟
26
۲۶۔یسوع اُوئے نا کہیو جکے نا ہوں ٻاٹی رو گیرہا ݙیئخ او ہوخے۔ بݪے اُوئے ٻاٹی رو گیرہا بݨا اَن شمعون اسکریوتی رے ݙیکرے یہوداہ نا ݙنو۔
27
۲۷۔ اَن ایئے گیرہا خاں پچھے شیطان اوئے میں آ گیو۔ پݨ یسوع نا کہو کہ جکو تھیں کرݨو ہے بیگو کر۔
28
۲۸۔ پݨ جکو ٻاٹی کھاوتا وا اُوئاں میں خاں کہنا ٹھا کونی لاگی۔ کہ اُو ایہ اُوئے نا کیݨ خارو کہیو ہے۔
29
۲۹۔کیانکہ یہوداہ کڈھے پیخاں آݪی تھیلی ہَتی۔ ایئے خارو کہینک خمجھیا کہ یسوع اُوئے نا ایہ کہیو ہے کہ جکو کچھ ائیاں نا عید خارو خامان لیوݨو ہے لے ݙے اَن کہینک محتاجاں نا ݙے آ۔
30
۳۰۔پچھے او گیرہا کھا رو اوئے گھڑی جی ٻاہر بوہو گیو۔ اَن رات ری بݪہ ہَتی۔
31
۳۱۔ جݙے او ٻاہر گیو تو یسوع کہیو کہ ابن آدم جلال پایو۔ اَن ایشور اُوئے میں جلال پایو۔
32
۳۲۔اَن جݙے ایشور اُوئے میں جلال پایو تو ایشور اُوئے نا وی جلال ݙئخے بلکہ اُوئے نا اُویئے جی گھڑی جلال ݙے خے۔
33
۳۳۔ایے ٻاݪاں ہوں ٻجو تھوڑی دیر تک تھاں بھݪیو ہاں تھاں مھنے لابھخو اَن جاں میں یہودیاں نا کہیو جیتھ ہوں جاوئیں۔ تھاں کونی آ خگتا۔ ائیاں جی ہوں تھاناں وی کہئی وو۔
34
۳۴۔ ہوں تھاناں ہیک نووں حکم ݙیوئی۔ کہ ہیکے ٻیجے خاں پریم راکھو۔ جاں مھیں تھاں خاں پریم راکھیو۔ تھاں وی ائیاں جی ہیکے ٻجے خاں پریم راکھو۔
35
۳۵۔جے تھاں آپت میں پریم راکھخو تو ایئے خاں خارا اݪکھخے کہ تھاں مھارا چیلا ہو۔
36
۳۶۔شمعون پطرس اُوئے نا کہیو اے پرمشور تو کیتھ جاوئیں؟ یسوع بݪتی ݙنی کہ جتھ ہوں جاوئیں ہمے تُوں تو مھارے لارے کونی آ خگتو۔ پݨ پچھے تو مھارے لارے آیخ۔
37
۳۷۔پطرس اُوئے نا کہیو اے پرمیشور ہوں تھارے لارے ہݨے کیاں کونی آ خگتو۔ ہوں تو تھارے خارو آپری جان وی ݙئیخ ری۔
38
۳۸۔یسوع اُوئے نا بݪتی ݙنی کی تو مھارے خارو آپری جان ݙیخ ری؟ ہوں تناں خچی خچی کہئی کہ کُکڑ ٻانگ کونے ݙے جتری تک تو مھارو تین واری انکار نی کریخ۔