1
اے بنی اسرائیل ایشور رو پویتر شاشتر خڹو۔کیانکے ایئے ملک میں رھوڹ آݪا خاں ایشور رو جھگڑو ہے۔کیانکے اے ملک خچائی آن مہربانی آن ایشور ری اوڑکھاڹ خاں خالی ہے۔
2
برجٻان وعدے را کوڑا آن خون کرڹ آݪا آن چوری آن حرامکاری خاں ٹاݪ کہنیں کونی کرتا۔ظلم کرئیے آن خون ماتھے خون کرئیے۔
3
ائیے رے پگاں ملک ماتم کرخے۔آن اُوے حنجا بادشاہ جھنگی جا نوراں آن ھوا را پکھے پکھیاں بھیݪا خک جاخے را آن خمندر رے خجے مچھلے تباہ ہو جاخے رے۔
4
پڹ منکھاں خاں کوئی جھگڑو کرے آن نی اُواں ماتھے کوئی تہمت ݙے۔اے پُچاری تئیں خاں مانجو جھگڑو ہے۔
5
توں ڈہھنیں رو لوڈا کھائیخ آن تاجے بھیڑو بنی وی تکلیف کھٹنخے آن ہوں تاجی ماں ناں تباہ کر ئیخ۔
6
مانجی اُمت ایئے رے پگاں میں وی تناں رد کر چھوڑئیخ آن توں مانجو پوجاری کونی ہووئیں۔کیانکے توں آپرے ایشور ری شریعت نا بخارِ چھوڑی ری۔ایئے رے پگاں ہوں وی تاجی اولاد نا بخارِ چھوڑیخ را۔
7
او جاں جاں بدھتا گیا مانجے خلاف گھناں گناہ کرڹ لاگا۔آن آپری ڈنھوڑی اُوڑکھان خاں بدلتا گیا۔
8
اُو مانجی اُمت رے گناہ ماتھے گزارو کرئیے۔آن اُواں ری بدکرداری ری آخ میں ہے۔
9
ائیے رے پگاں چھڑی امت ہے اُوھڑوئی پجاری ہوخے۔ہوں اُوے رے کرتوتاں ری سزا آن اُوے را اعمال رو بدلو اُوے نا ڈئیخ۔
10
پچھے او کھاخے پڹ ڈھو کونی تھیئے۔او بچھڑائی کرخے پڹ مزو کونی آوے۔ائیے رے پگاں کہ اُواں نا ایشور رو خیال کونی۔
11
بچھڑائی آن نوئیں مے آن مے دل ناں بگاڑ یئے۔
12
مانجی امت آپری لکڑی خاں خوال کرئیے آن اُوے ری لکڑی اُوے نا جواب ڈئیے۔کیانکے بچھڑائی ری آتما اُواں نا گمراہ کرئیے ۔آن او آپرے ایشور نا چھوڑ رو رئیے۔
13
اُو پہاڑاں ری چوٹیاں ماتھے قربانی کرئیے۔آن ٹیلاں ماتھے بلوط آن چنار بُطم رے ھیٹھاں بخور ٻاڑئیے۔ایئے رے پگاں کہ اُو ڈائھا آݪا ہے۔پڹ جݙے تھانری ݙکرے بچھڑائی آن بہواری حرامکاری کرخے۔
14
پچھے ہوں بچھڑائی ری وجہ خاں تھانرے ڈکریاں نا آن حرامکاری ری وجہ خاں تھانرے بہوواں نا سزا کونی ڈیاں کیانکے اُو آپ نی زنا کرڹ آݪے لگائیاں بھݪے ھیکھلائی میں جاوئیے۔آن گندے لگائیاں بھیڑے قربانی کرئیے۔جکو اُمت عقلمندی خاں پرھا ہے اُو برباد ہو جا خے۔
15
اے اسرائیل جیکڈھن توں زناکاری کریئخ تو وی یہودہ گنہگار نی ہو وے۔تھئیں جلجال ڈخاں نی جاوہ۔آن بیت آون خاں پرھا رھو۔آن جیوتے ایشور رو خانخ نی لو۔
16
کیانکے اسرائیل بےوفائی ٹوگھڑی آݪی کݪ بے وفائی کی ہے۔ہمیں ایشور اُواں نا گھیٹے آݪی کݪ کھلی جگہ میں چراخے۔
17
افرائم بتاں بھیڑو بچڑ گیو ہے۔اُوے نا چھوڑ ڈو۔
18
آن نشئو کرئیے۔اُو بچھڑائی میں لگا رھوئی۔اُو آپری شان رے بجائے بےعزتی نا پسند کرئیے۔
19
پڹ طوفان اُواں نا آپرے پانکھیاں ماتھے کھڹ رو لے جاخے آن اُو آپری قربانیاں رے باعث شرمشار ہوخے۔