¹ میں ایشور نا چڑھاوے رے نیڑو اُبھیج رو ڈٹھو۔آن اُوے کہیو کہ تھامبھاں رے ماتھے مار تاکہ بنیاداں ہل جاوےرے آن اُواں خجاں نا ذرا ذرا کر را اُواں رے ماتھے چھڑھا چھوڑ۔ہوں اُواں رے باقی بچیوڑاں نا تلوار خاں ماریخ را۔اُواں میں ہیک وی بھج کونی خگے۔اُواں میں خاں ہیک وی بچ کونی نخرے۔ ² جیکڈھن اُو پتاڑ میں جا بڑے تو وی ما نجو ہاتھ اُوتھ خاں وی چھک کاڈھخے۔آن جیکڈھن اُو آخمان تے چڑھ جا وے تو وی ہوں اُوتھ خاں وی اُواں نا اُتار لاییٔخ۔ ³ جیکڈھن اُو کرمل ری چوٹی ماتھے لُک جا وے تو وی اُوتھ خاں وی اُواں نا جو لا یٔیخ را۔جیکڈھن اُو خمندر رے تڑے میں مانجی نظر خاں لُک جاوے را تو اُوتھے وی ہوں باخنیگ نا حکم کر یخ اُو اُواں نا ڈنگ ماریخے۔ ⁴ جیکڈھن اُو آپرے دخمناں رے آگے آگے بیہہ را غلامی میں جاوےتو وی ہوں اوتھے تلوار نا حکم ڈیٔیخ آن اُو اُواں نا قتل کرخے۔آن ہوں اُواں ری بھلایٔی رے پگاں کونی بلکہ برایٔی رے پگاں اُواں ماتھے دید راکھیخ۔ ⁵ پرمیشور ٹوڑاں رو ایشور ہے۔او دھرتی نا ہاتھ لگاویٔی تو اُو پگڑڹڹ شروع تھیٔ ری۔آن اُوے را خجا رہیوڹ آݪا ماتم کر خے ۔ہاوے اُو بلکل دریا نیل آݪی کݪ ٹپا کھاویٔی ۔آن ہوبہو مصر آݪی کݪ سکڑ جاوۓ۔ ⁶ اُوہی آخمان میں آپرا اُونچا خانہ بڹاوۓ۔اُوے دھرتی ماتھے آپرے گمبد ری بنیاد راکھی ۔اُوہی خمندر رے پانی نا ھلو کریٔیے۔آن پوری دھرتی تے ڈھوڑیٔیے۔اُوے رو ناں پرمیشور ہے۔ ⁷ اے بنی اسرایٔیل کی تھیٔں مانجے خارو کوشیاں ری اُولاد آݪی کݪ کونی؟(ایشور رو فرمان ہے) کی میں اسرایٔیل نا ملکھ مصر خاں فلسطیناں نا کفتور خاں آن ارام نا قیر خاں کونی کاڈھ لایو ھتو؟ ⁸ جو مالک ایشور رے آنکھیں ایٔیے خطاکار قوم ماتھے ہے۔ہوں ایٔیے نا پوری دھرتی خاں مٹا چھوڑیخ رو۔پڹ یعقوب رے گھر نا بالکل تباہ کونی کراں۔(ایشور فرمان ایاں جی ہے) ⁹ کیانکے ہوں حکم کریخ آن اسرایٔیل رے گھراڹے نا خجے قوماں میں ایاں چھأڹیح جاں چھاڹی میں کویٔی چھنڑۓ۔آن ہیک ڈاڹوں وی دھرتی ماتھے کھرے کونی۔ ¹⁰ پڹ مانجی اُمت را خجا خطاکار جکو کیہیے کہ مخیبت مانھرے نیڑی کونی آوے آن نی مھیں تک پُیجے۔اُو خجا را خجا تلوار خاں ماریا جاخے۔ ¹¹ اُوے ڈیھنں ہوں داؤد رےکھریو ڑے گھر نا بݪے اُبھاڹیخ۔آن اُوے رے پھوٹاں نا بند کریخ آن اُوے رے اُجاڑ ری مرمت کریخ۔آن پہلی آݪی کݪ اُوے نا ٹھایٔیخ۔ ¹² تاکہ اُو ادوم رے باقیاں نا آن اُواں خجے قوماں نا جکو مانجے ناں خاں کہلاوی میراخ میں لے ایشور رو فرمان ایاں جی ہے اُو ہی کر بتاڑخے۔ ¹³ جو اُو ڈیھنں آوۓ(ایشور رو فرمان ہے)جکاں میں ڈھکاوڹ آݪا نا کٹڹ آݪا آن انگور لتاڑڹ آݪو اُگاوڹ آݪے نا جا لیخے۔آن پہاڑاں خاں نوی مے ٹپخے آن خجا پہاڑ پگڑ جاخے را۔ ¹⁴ آن ہوں آپری اُمت اسرایٔیل ری قخمت بدل چھوڑیخ ری۔آن اُو برباد تھیوڑا شہراں نا ٹھاخے آن اُواں میں رھخے۔آن انگور را باغ لگاخے۔ آن اُواں رو رخ پیخے ۔آن باغ لگاخے ۔آن اُواں را پھڑ کھاخے۔ ¹⁵ ہوں اُواں نا اُواں ری دھرتی میں لگایٔیخ۔آن ہوں اُوے دھرتی خاں جکو میں اُواں نا ڈھنی ھاں پچھے کڈے وی اُوے نا پٹ کونی خگھے۔پرمیشور تاجو ایشور فرماویٔی پیو۔