1
۱۔شمعُون پطرس ری طرف خاں ہے۔ ہُوں ایہ خَط اُوئاں نا لِکھئیں وو جکو اَپݨے اِیشوَر اَن مُگتی ݙیوݨ آݪے یسوع مسیح ری خَچائی میں آپاں آݪِیکار اُوئے ماتھے قیمتی وشواس راکھئی۔
2
۲۔اِیشوَر اَن اَپݨے پربھُو یسوع مسیح نا اوݪکھݨ ری وجہ خاں تھاں ماتھے گھݨی کِرپا ہووے اَن او تھاں نا خُکھا راکھے۔
3
۳۔ایشوَر ری قُدرت خاں او خارے چیزاں جکو زندگی گُزارݨ اَن اُوئے ری مرضی پُوری کرݨ رے خارُو ضرُوری ہے، او آپاں نا اُوئے ری اوݪکھاݨ رے وسیلے لابھے ہے کیان٘کے اُوئے آپری شان اَن بھَلائی خاں آپاں نا ہیلو کریو ہے۔
4
۴۔اِیئاں اِیشوَر آپاں خاں موٹا اَن قیمتی وعدا کریا ہے کہ آپاں اُوئاں رے وسیلے خاں اُوئے تباہی خاں بَچ جاواں جکو اِیئے دُنیا ری بُری مرضی ری وجہ خاں ہے اَن اِیشوَر را گُݨ آپاں میں شامل ہو جاوے۔
5
۵۔اِیئے خارُو تھے پُوری کوشش کرو کہ وشواس خاں نیکی، نیکی خاں خَمجھ
6
۶۔خَمجھ خاں آپرے آپ ماتھے قاٻُو، آپرے آپ ماتھے قاٻُو خاں صبر، اَن صبر خاں اِیشوَر ری مرضی پُوری کرݨ،
7
۷۔اِیشوَر ری مرضی پُوری کرݨ خاں آپت میں پریم، اَن آپت میں پریم خاں خاراں خاں پریم میں بَدھتا جاؤ۔
8
۸۔کیان٘کے جے ایہ گُݨ تھاں میں ہوخے اَن تھے اِیئاں میں بَدھتا جاخو، تو تھے اَپݨے پربھُو، یسوع مسیح ری اوݪکھاݨ میں بیکار اَن بے پھل کونی ہووو۔
9
۹۔اَن جکے میں ایہ گُݨ کونی، اُوئے ری دِید اِتری گھٹ ہے کہ او اَندھے آݪِیکار ہے۔ او ایہ بات بھُول گیو رو کہ اُوئے را پہلکا پاپ دھُووِیج گیا را۔
10
۱۰۔اَے بھائیاں، اِیئے بات نا ثابت کرݨ ری کوشش کرتا رہو کہ تھاں نا اِیشوَر ہیلو کریو ہے اَن چُگ لِنا را۔ اِیئے خارُو جے تھے اِیئاں کرخو، تو کَݙے تھُݙو کونی کھاؤ۔
11
۱۱۔ پݨ اِیئے خاں تھے اَپݨے پربھُو اَن مُگتی ݙیوݨ آݪے یسوع مسیح ری ہمیشہ ری بادشاہی میں گھݨی عزت خاں شامل ہوخو۔
12
۱۲۔اِیئے خارُو ہُوں تھاں نا ایہ باتاں ہمیشہ یاد ݙِراوتو رئیخ۔ بھَلائیں تھاں نا اِیئاں باتاں ری ٹھاء ہے اَن اُوئے خَچائی ماتھے پَکا ہو جکو تھاں نا لابھی ہے۔
13
۱۳۔ہُوں ایہ آپرو فرض خَمجھئیں کہ جِتری تک جیوتو ہاں اُتری تک تھاں نا ایہ باتاں یاد ݙِراوݨ رے خارُو ہُشیار کرتو رہواں۔
14
۱۴۔مھناں ٹھاء ہے کہ مھارے مَرݨ رو ٹائیم نیڑو آ گیو رو کیان٘کے اَپݨے پربھُو، یسوع مسیح ایہ بات مھیں ماتھے ظاہر کی ہے۔
15
۱۵۔اِیئے خارُو ہُوں پُوری کوشش کرتو رئیخ کہ مھارے مَرݨ خاں پَچھے وی ایہ باتاں تھاں نا ہمیشہ یاد رہ۔
16
۱۶۔جَݙے مھاں تھاں نا اَپݨے پربھُو، یسوع مسیح ری قُدرت اَن آوݨ ری بات خُݨائی، تو ٹھَگی ری فرضی باتاں لارے کونی بُوہا پݨ مھاں اُوئے ری گواہی ݙِنی جکے ری شان مھاں آپ آپرے آن٘کھیاں خاں ݙِٹھی ہَتی۔
17
۱۷۔مھے اوتھج ہَتا جَݙے اِیشوَر ٻاپ اُوئے نا عزت اَن شان ݙے ری کَہیو کہ،”ایہ مھارو پیارو ݙِیکرو ہے،جکے خاں ہُوں راضی ہاں۔“
18
۱۸۔جَݙے مھے پویتر پہاڑ ماتھے اُوئے بھیݪا ہَتا، تو مھاں آپ اَکاش خاں ایہ اَواز خُݨی۔
19
۱۹۔ اِیئاں مھان٘رو وشواس نبیاں رے کَہیوڑے باتاں ماتھے ٻِجو وی پَکو ہو گیو۔ ایہ تھان٘رے خارُو وی بھَلو ہے کہ تھے اُوئے ماتھے دھیان ݙئی کیان٘کے او ہیک ݙِیئے آݪِیکار ہے جکو اَندھارے میں اُجاݪو کرئی، او اُتری تک اُجاݪو کرتو رہخے جِتری تک اَندھارو ختم نی ہووے اَن خبیݪے آݪو تارو یعنی پربھُو یسوع تھان٘رے مَن میں اُجاݪو نی کرے۔
20
۲۰۔خاراں خاں پہل ایہ بات خَمجھ لو کہ نبیاں شاستر ری کوئی وی بات آپری طرف خاں کونی لِکھی۔
21
۲۱۔کیان٘کے پہل خُݨایوڑی کوئی وی بات اِنسان ری مرضی خاں کونی ہوئی پݨ اُوئاں ایہ باتاں پویتر آتما ری قُدرت خاں اِیشوَر ری طرف خاں کَہیے۔