¹ او سیمی روچ ءَ کانای گلیل ءِ میتگ ءَ یک آروسِ بوھگ ءَ ات یسوع ءِ مات ھمودا اَت۔ ² یسوع ءُ آئی ءِ مرید اوں ھما آروس ءَ دعوت دیئگ بوتگ اَت اَنت۔ ³ او وھدے شراب ھلاس بوھگ ءَ اَت اَنت تو یسوع ءِ مات ءَ گُشت منی کِرّا شراب نیست۔ ⁴ یسوع ءَ آئرا گُشت اے حاتونیں بی بی! منا ءُ ترا چے،تنی وھدی منی وھد نرستگ۔ ⁵ آئی ءِ مات ءَ ھزمتکاراناں گُشت ھرچی ای شمارا گُش ایت بکن اِت۔ ⁶ او اودا یہودیانی پلگاری ءِ دستور ءِ مطابق ءَ سِنگ ءِ شش کُمب ایر اَت آیانانی تہا سد تاس آپ ءِ گنجائش ھست اَت۔ ⁷ یسوع آیانا گُشت کُمباں آپ مان کن اِت گڑا آیاں سریچ کرت اَنت۔ ⁸ پدا آئی ءَ آیاناں گُشت نوں بہ کشّ اِت دیون ءِ کماشانی کرّا بہ بر اِت او آیاں بُرت اَنت۔ ⁹ دیون ءِ کماشاں نہ زانت ای آپ کہ شراب بوتگ اَت اَنت چہ کجا آرگ بوتگ اَنت آیاں چَشِت ءُ نوش کرت اَنت۔بلے ھزمتکاران کہ آپ کشِتگ اَت اَنت زانتش،نوں دیون ءِ کماشاں سالونک توار جت۔ ¹⁰ او گُشت ھر کس مھماناں شرتریں شراباں پیسرا دنت،وھدے آ نوش اَنت ءُ مَلار بنت رَندا آرزانترین ءَ کار اَنت ،بلے تو شرتریں ایر کرتگ اَنت۔ ¹¹ ای اولی موجزہ اَت کہ یسوع ءَ کانای گلیل ءِ میتگ ءَ پیش داشت ءُ وتی جلال زاھر کت او آئی ءِ مریداں آئی ءِ سرا ایمان آورت۔ ¹² رَندا آ ءُ آئی ءِ مات ءُ برات ءُ آئی ءِ مرید کپر نحوم ءِ میتگ ءَ شُت اَنت بلے اُودا باز روچ ءَ نہ نِشت اَنت۔ ¹³ او یہودیانی پِسہ ءِ آئید نزدیک اَت پمشکا یسوع یروشلم ءَ شُت۔ ¹⁴ او آئی ءَ دیست کہ ہیکل ءِ تھا گوک،پس ءُ کپودر بھا کنوک ءُ زر پُروشوک نشتک اَنت۔ ¹⁵ گڑا گوں ساد ءُ چیلکاں ھئیزارانے جوڑِ کُرت ءُ تیوگیں سوداگرےچہ ہیکل ءَ در کُرت اَنت ءُ سرّاپانی زَرِ ریتک اَنت ءُ کرسی ءُ ٹیبلیں چپّی کرت اَنت۔ ¹⁶ او کپودر بھا کنوکانے گُشت اِشاں چہ اِدا در کن اِت منی آزمانی پت ءِ لوگا دکانِ جوڑ مہ کن اِت۔ ¹⁷ آئی ءِ مریداں یاد آتک کہ ای وڑ نِبشتہ اِنت ”تئی لوگ ءِ لج ءُ میار منا وارت ءُ ایر بارت“۔ ¹⁸ گڑا یہودیاں آئر ءَ گُشت تو کہ ای کاراں کنے مارا کجام نشانی ءَ پیشدارے؟ ¹⁹ یسوع پسّو دات کہ ای ہیکل ءَ بپروش اِت من سے روچ ءِ تھا پدا جوڑے کناں۔ ²⁰ یہودیاں گُشت ای ہیکل چھل ءُ شش سال ءَ جوڑ بوت،تو چطور اِشی سے روچ ءَ جوڑ کنے۔ ²¹ بلے ای گپ آئی ءَ وتی بدن ءِ ہیکل ءِ بارہ ءَ گُشتگ اَت۔ ²² پمشکا وھدے آ چہ مُردگاں پاد آتک،مرید یات ءُ ترانگاں کپت اَنت کہ آئی ءَ وت ای ھبر کتگ اَت،پمشکا ھدائے پاکیں نبشتہ ءُ یسوع ءِ ھبرانی سرا ایمانش آورت۔ ²³ وھدے آ پِسہ ءِ آئید ءِ وھدا یروشلم ءَ ات تو بازیں مردماں آ موجزہ دیست اَنت کہ ھمائی پیش داشت اَنت،آئی نام ءِ سرا ایمانش آورت۔ ²⁴ بلے یسوع ءَ واتارا آیانی دیم ءَ پدّر نہ کرت،چیّ ءَ کہ آئی ءَ تیوگیں مردم شریئے سرا زانت اَنت۔ ²⁵ آئی ءَ کسی گواھی ءُ شاھدی ءِ زلورت نہ اَت،چیّ ءَ کہ آئی ءَ وت زانتگ اَت کہ مردمانی باتن ءَ چے چے ھست۔