¹ Ndipali ukuwomelezwa kumwi mwe Kilisitu, ndipali ukumyalalichizya kumwi ukwapwa nu lukundo, ndipali uwulilani wumwi mumuzimu, ndipali uwutonte wa vyaluse vimwi, ni vikuku, ² apano pangani ichimwemwe chane chizule pakuwa namelenganio ayaliyonga, pakuwa ponga mumuzimu, nukuwa nimfundo yonga. ³ Mutawomba chimwi kuwimi pamwi kumelenganio ayavye. Mumalo yakwe ukuyichefya nukwelenganizya wanji ukuwa awazima ukulusya mwemwe. ⁴ Lekani wensi uwe mwemwe atalolechesya ivya kweweliwe wenga, kweni swinya nivya wanji. ⁵ Mwakwelengenia choo mwakwe mwemwe mwenga chino swinya chalinji mwe Kilisitu Yesu, ⁶ wino , chingatenga walinji mumiwele ye Leza. Atelenginie uwuyane wakwe ne Leza vino achimwi ichakulemelako. ⁷ Nkano fwendi, wayiwisile ukuwa mumiwele yamuwonvi, nga swinya wakwasilwe umwakuyana na wantu. ⁸ Wayichefizye nga ayiza wawa awakwivwila ukufichila imfwa, ni mfwanye pawuchingane! ⁹ Achaleka swinya Leka wamwinuzile weliwe. Wamupile izina lino lilipapela pa mazina yonsi. ¹⁰ Wawonvile choo ukuti mwi zina lyakwe Yesu ikokola lyonsi lizipizile ukufukama, amakokola ya wawo awa mwiyulu nawa munsi yapansi nawa pansi yansi. ¹¹ Wawonvile choo ukuti ululimi lonsi luzipizile luzumilizye ukuti Yesu Kilisitu a Mfumu, kuwu chindami we Leza eTata. ¹² Achilichino, wakundikwe, ndivino mukakwivwila penye, asapano ndipo vye kweni ukulusya pano nsipo, womba ukutontolokwa kwako ni ntete nukuzakaza. ¹³ Amuno we Leza wino akuwomba mwakwe wewe vyonsi kukulonda naku mulimo pawuzima wakuyisechelesya. ¹⁴ Mutawomba ivintu vyonsi nukuyilumbusya pamwi ukupazika ¹⁵ ukuti mutawa nakampifya nuwutiswe, wana wakwe Leza ukwawula akampifya mukasi munkwatwa ya walyalya nawakawipizya, muno muwala munsi yapansi. ¹⁶ Lemansyani kwi zwi lya wumi ukuti pa wanda we Kilisitu zipizile ukuyitutuwalika ukuti intawomba pamwi ukusamala apavye. ¹⁷ Kweni ndi nati njitilwa vino achawupi pa zuwi nukupyunjila kwi suwilo lyinu, ne wakutemwa nukuzewela namwe mwensi. ¹⁸ Mumiwele iyiliyonga namwe swinya muzipizile ukutemwa nukuzewela nanene. ¹⁹ Kweni ndi nisuwilo mu Mfumu Yesu pakutuma Timoti kwakwe mwemwe kanonzi, ukuti nzipizile swinya ukuwomelezwa pano nkumanya ivintu ivya kwakwe mwemwe. ²⁰ Amuno nsi nanti wumwi umulingane namwemwe, wino nakawuzyenye akukwanfya ivya kwe mwemwe. ²¹ Amuno wonsi wakuvwamba ivya kulonda vyawo, asavintu vye Yesu Kilisitu. ²² Kweni mumanyile ukulondwa kwakwe, umulandu vino umwana ne Yisi wakwe, achino wawonvile nanene mwi landwe. ²³ Lelo nkusuwila ukumutuma kwakwe mwemwe ukufichila pano nalola muno ivintu vikupitila nane. ²⁴ Kweni ndi nisuwilo mu Mfumu ukuti nene nenga nkwiza swinya nombanye. ²⁵ Kweni nkwelengania achizima ukutuma Epafuloditusi ukunyochela kwakwe mwemwe. Amunyinane nekawomba uwunji nuwa vita uwunji, nekayamwite nu muwonvi pavya kulonda vyane. ²⁶ Amuno walinji awa kulanguluka, nga wavwambilizyanga ukuwa namwe mwensi umulandu mwivwile kuno amulwale. ²⁷ Amuno nakawuzyenye walinji amulwale wafisile pakufwa. Kweni Leza walinji nuwila pakwe weliwe, nga asakweweliwe mutupu, kweni swinya nape nene, ukuti nzipizile nichitima pa chitima. ²⁸ Lelo achino nkulimbichisya nkaninye ukuti nkutuma weliwe, ukuti ndi wamulola swinya wandi uzewele, nga ningawa nichitima katichi. ²⁹ Mwapochelelwa Epafuloditusi mu Mfumu nichitemwa chonsi. Chindikani awantu ndivyo weliwe. ³⁰ Amuno walinji amulimo we Kilisitu wino wasyazile katichi ukufwa. Wawisile uwumi wakwe pawutale ukupyunjila nene nukufichilisya chino mutawombanga kwakwe nene.