¹ Pauli, umunyepwe we Kilisitu Yesu, ne munyina eTimoti, kwe Filimoni, echiwuza umukundikwe numuwonvi uwunji, nakwe kazi witu e Afiya, ² nga nakwe Arakippasi uwavita uwunji, nakwi Keleziya lino likalongana mukaya mwinu. ³ Inkumbu numutende viwe kwakwe mwemwe ukufuma kwe Leza eTata witu ni Mfumu Yesu Kilisitu. ⁴ Nkasalifya Leza penye pano nkulumbula mwemwe mumpepo yane, ⁵ umulandu inkwivwa ivyi suwilo lino mulinalyo ku Mfumu Yesu nga nulukundo luno muli nalo ku wantu wakwe awatele wonsinye. ⁶ Nkupepe kuno ukwankana kwi suwilo lyinu kuwe namaka, akulikuti mwize muwe nukwivwichisya ukwenecho ukwa chintu chonsi ichizima chino tuli nacho mwe Kilisitu. ⁷ Amuno nalinji ni nsansa invule nukumyalalikwa pamulandu nulukundo lwako, umulandu wa myenzo ya wantu watele awe Leza vyatosya wewe munyina. ⁸ Achaleka, chingatenga ndi nuwuwome wonsi mwe Kilisitu ukupingula mwemwe ukuwomba chino mufwile muwombe, ⁹ lelo umulandu walukundo, nkano fwendi nkuwalambilizya_ nene, Pauli, ne muntu mukote, nemunyepwe we Kilisitu Yesu. ¹⁰ Nkuwalenga mwemwe ukulingana numwanane onesimasi, wino namulezile muvingolo vyane. ¹¹ Amuno watezile awa awavye kwe mwemwe, kweni kanonzi amuzano kwe mwemwe mwensi nakwe nene. ¹² Nati munyochezya kwe mwemwe, weyo wino amwenzo wane uwenecho. ¹³ Nakunzile nge wasungwanga nane awampyunjila umulandu namwemwe pano ndi muvingololo pamulandu wi landwe zima. ¹⁴ Kweni ntavwambanga ukuwomba chimwi ukwawula mwemwe ukusimichila. Ntavwambanga imilimo yinu mizima ukufuma mukupatichizya kweni mukulonda kwinu ukuzima. ¹⁵ Pamwi pakwe choo wapawusilwe kwe mwemwe pampindi ntichi, ukuti muzipizile mumunyosye umuyaya. ¹⁶ Ataliwa swinya amuzya, kweni ichete ukulusya umuzya, emunyina umukundikwe. Amukundikwe nkaninkani kwe nene, nga nkaninkani ukulusya kwe mwemwe, konsi kumuwili namu Mfumu. ¹⁷ Achino ndi muli nane vino awakuwombela ponga, mupochelelani vino nene. ¹⁸ Ndiwa wononela pamwi wakongola kwakwe mwewmwe, chiletani kwe nene. ¹⁹ Nene, Pauli nkuwalika choo ni kasa lyane. Nenenye nenga ndi nyosya_nanti kulumbula kuno mwemwenye mwenga mwankongolela! ²⁰ eta, munyina, ntemwela nene mu Mfumu; nyochezya umwenzo wane mwe Kilisitu. ²¹ Suwilani pavya kutontela kwinu, vino nkuwa walichila mwemwe. Manyile kuno muliwomba ukulusya vino nkulenga. ²² Pampindi iyili yonga, penkanizyani ikasi yawa lendo, muno namanyile kuno ukupitila mumapepo yinu ndi nyochezwa kwe mwemwe. ²³ Epafurasi, ewunji umunyepwe mwe Kilisitu Yesu, wawavwanzya. ²⁴ Ne Maliko, Arisitakasi, Demasi, ne Luka awawonvi awanji. ²⁵ Inkumbu zya Mfumu yitu Yesu Kilisitu ziwe numuzimu winu. Amen.