¹ Pauli, siluvanasi, ne Timoti, ku Keleziya yawa Tesalonika mwe Leza e Tata witu ni Mfumu Yesu Kilisitu. ² Nkumbu kwe mwemwe numutende ukufuma kwe Tata witu ni Mfumu Yesu Kilisitu. ³ Tuzipizile penyee tuwasalisya kwe Leza umulandu namwemwe, wanitu, umulandu isuwilo lyinu likukulilakulila nulukundo wensi mwakwe mwemwe luno ali nalo kumuwuye lukuvulilila. ⁴ Achino sweswe swenga tukuvwanga umwakuyiwanzya pa vya kwe mwemwe muma Keleziya ye Leza pakuzizimichizya kwinu nisuwilo mukuvwimwa kwinu konsi, nivyakusunkana vino mukujimbilizya. ⁵ Awukamboni wi panzyo lyawulungamane uwe Leza, ukuti mwize mwelenganizwe ukuwa awayane muwufumu we Leza, nawuno swinya mukutamichila. ⁶ Amo nakawuzyenye, achawulungamane kwe Leza pakunyosya iviponelwa kwe wano wakuwaponezya, ⁷ nuwutalale kwe mwemwe wano muponezilwe nasweswe, ala pano Imfumu Yesu yawumbulikwa mwiyulu nawangelo wakwe awamaka ⁸ mwilungu lya mulilo, pakulanduzya pakwe wawo wano watamanyile Leza napa kwe wawo wano awantatontela ilandwe lya Mfumu yitu Yesu. ⁹ Walisundwa nuwononi wamuyaya pakufuma paminso ya Mfumu nuwuchindami wa maka yakwe. ¹⁰ Aliwomba choo pano wiza pawanda wakuchindamikwa muwantu wakwe awatele nukuwa achizungusyo pakwe wawo wonsi wano wasuwizile, umulandu ukusimichila kwitu kwakwe mwemwe kwasuwalizilwe. ¹¹ Pamulandu wakwe choo naswe tukutwalilila ukupepela mwemwe, ukuti Leza witu ayelenganizye mwemwe mwe awayane ulwito lwinu nga namaka yakwe afwile afichilisye uwuzima wamfundo yonsi numulimo wonsi uwisuwilo. ¹² Tukupepela choo ukuti izina lya Mfumu Yesu lichindamikwe mwakwe mwemwe, namwe mwakwe weliwe, ukulingana ni nkumbu zye Leza witu ni Mfumu Yesu Kilisitu.