¹ Pampelelechezya, wanitu, tukuwawomya nukuwakwezya mu Mfumu Yesu. Ndivino mwapochelezile ivisambilizyo kwakwe sweswe kwe vino muzipizile mwapita, ukusechelezya Leza, swinya mwapita munzila yonye, ukuti mwawomba ukulusya. ² Amuno mumanyile ivisambilizyo vino twawapile ukupitila mu Mfumu Yesu. ³ Amuno ko akulonda kwe Leza, uwutele winu, ukuti mulewuke uwuzelele, ⁴ kuno wensi uwe mwemwe amanyile muno ni nsembo yakwe muwutele namumuchinzi, ⁵ asamulukundo ulwa chikumbuchilwa (ngati awamakandi wano watamanyile Leza). ⁶ Patawa umuntu uwakutala nukononola umunyina mwakwe choo; amuno Imfumu ayakulanduzya mwakwe vyo vyonsi, ngati vino twawasochezile zila nukusimichizya mwemwe. ⁷ Amuno Leza atatwisile sweswe kuwukandamane, kweni kuwutele. ⁸ Achaleka, weyo wino akukana choo atakukana awantu, kweni Eleza, wino akupa umuzimu wakwe umwimichile kwe mwemwe. ⁹ Ukuyana nulukundo lwapawunyina, musi nukuvwamba wumwi ukuwawalichila, amuno mwemwenye mwati musambilizwa nu Leza ukukundana; ¹⁰ Nakawuzyenye, muwomba choo kuwa munyina wonsi wano wali ku Makedoniya. Kweni tukuwachinchizya, wamunyina, ukuwomba ukulusya. ¹¹ Tukuwachinchizya swinya ukwezya pakwikala uwumyalale, sayililani imiwombele yinu, nga muwombe namakasa yinu, ndivino twawapinguzile, ¹² Alyakuti mupite ichete pankolelo pawa makandi nga mutasowelwa chimwi. ¹³ Tutakuvwamba mwemwe ukuwa awantamanya, wamunyina, kwe wawo wano waponechile, ukuti mutalwilwinta ndivino wanji wano wasi nukusuwila. ¹⁴ Muno ndi tukusuwila kuno Yesu wafwile nukuzyulupuka swinya, wowonye Eleza aliwaleta ne Yesu wawo wano wati waponechela mwakwe weliwe. ¹⁵ Muno tukuvwanga kwe mwemwe na mazwi ya Mfumu, kuno sweswe wano tuli kuwumi, swewano tusyazile pakwiza kwa Mfumu, nawuchisinkanye tutaliwakolelela wawo wano wati waponechela. ¹⁶ Mo Imfumu yoliyo yilisika kwiyulu. Yiliyiza nukupongomoka, namazwi ya mungelo umukulu, ni mbata yakwe Leza, nga awafwe mwe Kilisitu walitalichila ukuzyulupuka. ¹⁷ Nga pano sweswe wano tulikuwumi, wano tusyazile, apaliponga nawoliwo tulisompolwa mwi wingo ukusunkana ni Mfumu mwilewelewe. Munzila yoo tuliwawa penye ni Mfumu. ¹⁸ Achaleka, myalalikani we numuwuye na mazwi yaa.