¹ Daytoy ti listaan dagiti kaputotan ni Adan. Idi pinarsua ti Dios ti tao, pinagbalinna ida a kas kenkuana iti adu a wagas. ² Nangparsua ti Dios iti maysa a lalaki ken maysa a babai. Binendisionanna ida, ket iti aldaw a pinarsuana ida, inawaganna ida iti 'tao.' ³ Idi sangagasut ket tallo pulon ti tawen ni Adan, naaddaan isuna iti putot a lalaki a kas met laeng kenkuana. Dayta ti anak a pinanagananna iti Set. ⁴ Kalpasan a naipasngay ni Set, nagbiag pay ni Adan iti 800 a tawen, ket bayat kadagitoy a tawtawen, naaddaan pay isuna kadagiti annak a lallaki ken babbai. ⁵ Nagbiag ngarud ni Adan iti 930 a tawen, kalpasanna ket natay. ⁶ Idi agtawen ni Set iti sangagasut ket lima, naaddaan isuna iti putot a lalaki a napanaganan iti Enos. ⁷ Kalpasan a naipasngay ni Enos, nagbiag pay ni Set iti 807 a tawen ken naaddaan pay kadagiti annak a lallaki ken babbai. ⁸ Nagbiag ngarud ni Set iti 912 a tawen, kalpasanna ket natay. ⁹ Idi agtawen ni Enos iti siyam a pulo, naaddaan isuna iti putot a lalaki a napanaganan iti Kenan. ¹⁰ Kalpasan a naipasngay ni Kenan, nagbiag pay ni Enos iti 815 a tawen ken naaddaan pay kadagiti annak a lallaki ken babbai. ¹¹ Nagbiag ngarud ni Enos iti 905 a tawen, kalpasanna ket natay. ¹² Idi agtawen ni Kenan iti pitopulo, naaddaan isuna iti putot a lalaki a napanaganan iti Mahalalel. ¹³ Kalpasan a naipasngay ni Mahalalel, nagbiag pay ni Kenan iti 840 a tawen ken naaddaan pay kadagiti annak a lallaki ken babbai. ¹⁴ Nagbiag ngarud ni Kenan iti 910 a tawen, kalpasanna ket natay. ¹⁵ Idi agtawen ni Mahalalel iti innem a pulo ket lima, naaddaan isuna iti putot a lalaki a napanaganan iti Jared. ¹⁶ Kalpasan a naipasngay ni Jared, nagbiag pay ni Mahalalel iti 830 a tawen ken naaddaan pay kadagiti annak a lallaki ken babbai. ¹⁷ Nagbiag ngarud ni Mahalalel iti 895 a tawen, kalpasanna ket natay. ¹⁸ Idi agtawen ni Jared iti 162, naaddaan isuna iti putot a lalaki napanaganan iti Enoc. ¹⁹ Kalpasan a naipasngay ni Enoc nagbiag pay ni Jared iti 800 a tawen ken naaddaan pay kadagiti annak a lallaki ken babbai. ²⁰ Nagbiag ngarud ni Jared iti 962 a tawen, kalpasanna ket natay. ²¹ Idi agtawen ni Enoc iti innem a pulo ket lima, naaddaan isuna iti putot a lalaki a napanaganan iti Metusalem. ²² Nagbiag ni Enoc nga addaan iti nasinged a pannakikadua iti Dios iti 300 a tawen kalpasan a naipasngay ni Metusalem, ken naaddaan pay isuna kadagiti annak a lallaki ken babbai. ²³ Nagbiag ngarud ni Enoc iti 365 a tawen. ²⁴ Nasinged ti pannakiduana iti Dios ket iti maysa nga aldaw, nagpukaw isuna gapu ta innala isuna ti Dios tapno makikadua kenkuana. ²⁵ Idi agtawen ni Metusalem iti 187, naaddaan isuna iti putot a napanagan iti Lamek. ²⁶ Nagbiag pay ni Metusalem iti 782 a tawen kalpasan a naipasngay ni Lamek ken naaddaan pay kadagiti annak a lallaki ken babbai. ²⁷ Nagbiag ngarud ni Metusalem iti 969 a tawen, kalpasanna ket natay. ²⁸ Idi agtawen ni Lamek iti 182, naaddaan isuna iti putot a lalaki, ²⁹ a pinanagananna iti Noe gapu ta kinunana, "Iyegna kadatayo ti nam-ay manipud kadagiti amin a narigat a panagtrabtrabahotayo tapno makapataudtayo iti taraon manipud iti daga nga inlunod ni Yahweh." ³⁰ Nagbiag pay ni Lamek iti 595 a tawen kalpasan a naipasngay ni Noe, ken naaddaan pay kadagiti annak a lallaki ken babbai. ³¹ Nagbiag ngarud ni Lamek iti 777 a tawen, kalpasanna ket natay. ³² Idi agtawen ni Noe iti 500, naaddaan isuna kadagiti annak a pinanagananna iti Shem, Ham, ken Jafet.